ಬಸವಕಲ್ಯಾಣ: ಕೊರೊನಾ ಸೋಂಕಿನ ಹಾವಳಿ ಹೆಚ್ಚಾಗಿದೆ. ಇಂದು ಒಂದೇ ದಿನ 42 ಜನರಲ್ಲಿ ಸೋಂಕು ಪತ್ತೆಯಾಗಿದ್ದು, ಒಟ್ಟು ಪ್ರಕರಣ 173ಕ್ಕೆ ಏರಿಕೆಯಾಗಿದೆ.
ಶನಿವಾರ ಸೋಂಕು ಪೀಡಿತರಲ್ಲಿ 14 ಜನ ಮಹಿಳೆಯರು ಹಾಗೂ 28 ಜನ ಪುರುಷರಿದ್ದು, ಈ ಪೈಕಿ 5 ವರ್ಷದ ಮೂವರು ಬಾಲಕರು, 6 ಹಾಗೂ 8 ವರ್ಷದ ತಲಾ ಒಬ್ಬರು ಬಾಲಕಿಯರು ಸೋಂಕಿಗೆ ಒಳಗಾಗಿದ್ದಾರೆ. ಇನ್ನು ತಾಲೂಕಿನ ಭೋಸಗಾ ಒಂದೇ ಗ್ರಾಮದಲ್ಲಿ 13 ಜನರಿಗೆ ಸೋಂಕು ಪತ್ತೆಯಾಗಿದ್ದು, ಉಳಿದಂತೆ ಲಾಡವಂತಿ-6, ಎಕಲೂರ ವಾಡಿ, ಘಾಟಹಿಪ್ಪರ್ಗಾ ತಾಂಡಾ, ದಾಸರವಾಡಿ ಹಾಗೂ ಬೇಲೂರನಲ್ಲಿ ತಲಾ 3 ಜನ, ಸೀರೂರಿ-2, ಖೇರ್ಡಾ(ಕೆ), ಸಸ್ತಾಪೂರ, ಜನವಾಡಾ, ರಾಜೇಶ್ವರ, ಹತ್ಯಾಳ ತಾಂಡಾ, ಹಾಮುನಗರ ತಾಂಡಾದಲ್ಲಿ ತಲಾ ಒಬ್ಬರು ಹಾಗೂ ನಗರದಲ್ಲಿ ಒಬ್ಬ ಮಹಿಳೆ ಹಾಗೂ ಸಮೀಪದ ತ್ರಿಪುರಾಂತನಲ್ಲಿ ಒಬ್ಬರು ಸೇರಿದಂತೆ ಒಂದೇ ದಿನ 42 ಜನರಿಗೆ ಸೋಂಕು ಪತ್ತೆಯಾಗಿದೆ.
ಸೋಂಕಿತರಲ್ಲಿ ಇಬ್ಬರು ತೆಲಂಗಾಣ ಹಾಗೂ ಒಬ್ಬರು ಪೂನಾದಿಂದ ಬಂದವರಾದರೆ, ಉಳಿದವರೆಲ್ಲರು ಮುಂಬೈನಿಂದ ಮರಳಿ ಬಂದವರಾಗಿದ್ದಾರೆ. ಕ್ವಾರಂಟೈನ್ ಕೇಂದ್ರದಲ್ಲಿ ಅಡುಗೆ ಸಿಬ್ಬಂದಿಯಾಗಿ ಕೆಲಸ ಮಾಡಿದ 35 ವರ್ಷದ ಮಹಿಳೆಗೂ ಸೋಂಕು ಧೃಢಪಟ್ಟಿದೆ. ಅನ್ಯ ರಾಜ್ಯದಿಂದ ಆಗಮಿಸಿದವರಿಗೆ ಅಡುಗೆ ಮಾಡಿ ಬಡಿಸಿದ್ದಾರೆ. ಹೀಗಾಗಿ ಸೋಂಕಿತರಿಂದ ಇವರಿಗೆ ಸೋಂಕು ತಗುಲಿರಬಹುದು ಎಂದು ಹೇಳಲಾಗುತ್ತಿದೆ.
ಕ್ವಾರಂಟೈನ್ ಅವಧಿ ಪೂರ್ಣಗೊಳಿಸಿ ಮನೆಗೆ ಬಂದವರಲ್ಲಿ ಸೋಂಕು ಪತ್ತೆಯಾಗಿರುವ ಕಾರಣ ಇವರ ಸಂಪರ್ಕಕ್ಕೆ ಬಂದವರೆಷ್ಟು, ಸೋಂಕಿತರಿಂದ ಇನ್ನೆಷ್ಟು ಜನರಿಗೆ ಸೋಂಕು ಹರಡಿದೆ ಎನ್ನುವ ಭಯ ಜನರಿಗೆ ಕಾಡುತ್ತಿದೆ.
ಸೋಂಕು ಪತ್ತೆಯಾದ ಗ್ರಾಮ ಹಾಗೂ ನಗರದ ಬಡಾವಣೆಗಳಲ್ಲಿ 100 ಮೀಟರ್ ವ್ಯಾಪ್ತಿಯನ್ನು ಕಂಟೈನ್ಮೆಂಟ್ ಪ್ರದೇಶವೆಂದು ಘೋಷಿಸಲಾಗುತ್ತಿದೆ. ಆದರೆ ಕೆಲವು ಕಡೆ ಹೊರತು ಪಡಿಸಿ ಬಹುತೇಕ ಪ್ರದೇಶಗಳಲ್ಲಿ ಸ್ಯಾನಿಟೈಜರ್ ಮಾಡುವುದು ಸೇರಿದಂತೆ ಯಾವುದೇ ಮುಂಜಾಗ್ರತಾ ಕ್ರಮಗಳನ್ನು ಕೈಗೊಳ್ಳಲಾಗುತ್ತಿಲ್ಲ. ಸೋಂಕಿತರ ಪ್ರಾಥಮಿಕ ಸಂಪರ್ಕಕ್ಕೆ ಬಂದವರನ್ನು ಗುರುತಿಸಿ ಕ್ವಾರಂಟೈನ್ ಮಾಡಲಾಗುತ್ತಿಲ್ಲ. ಸೋಂಕಿತರ ಕುಟುಂಬದ ಸದಸ್ಯರು ಬಿಂದಾಸ್ ಆಗಿ ಓಡಾಡುತಿದ್ದಾರೆ ಎನ್ನುವ ಆರೋಪಗಳು ಜನರಿಂದ ವ್ಯಾಪಕವಾಗಿ ಕೇಳಿಬರುತ್ತಿವೆ.
ಇನ್ನೂ ಕ್ವಾರಂಟೈನ್ ಕೇಂದ್ರದಿಂದ ಮರಳಿ ಮನೆಗೆ ಬಂದವರಲ್ಲಿ ಸೋಂಕು ಪತ್ತೆಯಾಗುತ್ತಿದೆ. ವರದಿ ಬರುವುದಕ್ಕೂ ಮುನ್ನ ಅನೇಕ ದಿನಗಳ ಕಾಲ ಸೋಂಕಿತರು ಕುಟುಂಬದವರೊಂದಿಗೆ ಬೆರೆತು ಉಳಿದಿದ್ದಲ್ಲದೇ ಎಲ್ಲೆಡೆ ಸುತ್ತಾಡಿದ್ದಾರೆ. ಇವರಿಂದ ಇತರರಿಗೆ ಸೋಂಕು ಹರಡುವ ಸಾಧ್ಯತೆ ದಟ್ಟವಾಗಿರುವ ಕಾರಣ ನಗರ ಸೇರಿದಂತೆ ತಾಲೂಕಿನಾದ್ಯಂತ ಈಗ ಜನ ಭಯದಲ್ಲಿಯೇ ಕಾಲ ಕಳೆಯುವಂತಾಗಿದೆ.
