ಬಳ್ಳಾರಿ: ನವಜಾತ ಶಿಶುವಿಗೆ ಜಿಲ್ಲಾಧಿಕಾರಿಯ ಹೆಸರಿಡುವ ಮೂಲಕ ಇಲ್ಲೊಂದು ದಂಪತಿ ಜಿಲ್ಲೆಯ ಡಿಸಿಗೆ ವಿಶೇಷವಾಗಿ ಅಭಿನಂದಿಸಿದೆ.
ಕೊರೊನಾ ಸೋಂಕಿತ ಗರ್ಭಿಣಿಯ ಹೆರಿಗೆಯಾದ ಬಳಿಕ ಎರಡು ತಿಂಗಳೊಳಗೆ ಆ ನವಜಾತ ಶಿಶುವಿನ ನಾಮಕರಣ ಕಾರ್ಯಕ್ರಮವನ್ನು ಗಣಿನಗರಿ ಬಳ್ಳಾರಿಯಲ್ಲಿ ಆಯೋಜಿಸಲಾಗಿತ್ತು. ಆ ಮಗುವಿಗೆ ಮೂರು ಬಾರಿ ನಕುಲ್, ನಕುಲ್, ನಕುಲ್ ಎಂದು ಹೇಳುವ ಮೂಲಕ ನಾಮಕರಣ ಮಾಡಿದ್ದಾರೆ.
ಪಕ್ಕದ ದಾವಣಗೆರೆ ಜಿಲ್ಲೆಯಲ್ಲಿ ತನ್ನ ಗಂಡನೊಂದಿಗೆ ನೆಲೆಸಿರುವ ಆ ಗರ್ಭಿಣಿಯು ಹೆರಿಗೆಗಾಗಿ ತನ್ನ ತವರೂರು ಬಳ್ಳಾರಿಗೆ ಬಂದಿದ್ದರು. ಅವರನ್ನು ಕೋವಿಡ್ ಪರೀಕ್ಷೆಗೆ ಒಳಪಡಿಸಿದ್ದು, ಸೋಂಕು ತಗುಲಿರುವುದು ದೃಢಪಟ್ಟಿತ್ತು. ಈ ಹಿನ್ನೆಲೆಯಲ್ಲಿ ಆಕೆಯನ್ನು ಜಿಲ್ಲಾ ಕೋವಿಡ್ ಆಸ್ಪತ್ರೆಯಲ್ಲಿ ದಾಖಲಿಸಿ, ಬಳಿಕ ಹೆರಿಗೆ ಶಸ್ತ್ರ ಚಿಕಿತ್ಸೆ ಮಾಡಲಾಗಿತ್ತು.
ಹೆರಿಗೆ ಶಸ್ತ್ರ ಚಿಕಿತ್ಸೆಗೆ ಒಳಗಾಗಿದ್ದ ಅವರು ಕೋವಿಡ್ ಆಸ್ಪತ್ರೆಯಿಂದ ಗುಣಮುಖರಾಗಿ ಹೊರ ಬರುತ್ತಿದ್ದಂತೆಯೇ ದಂಪತಿಯ ಕುಶಲೋಪರಿಯನ್ನು ಡಿಸಿ ನಕುಲ್ ವಿಚಾರಿಸಿದ್ದಾರೆ. ಅವರ ಕಾಳಜಿ, ಕರ್ತವ್ಯ, ಸರಳತೆ, ನಡೆ-ನುಡಿಗೆ ಈ ದಂಪತಿ ಅಭಿಮಾನಿಗಳಾಗಿದ್ದಾರೆ. ಜಿಲ್ಲಾಧಿಕಾರಿ ನಕುಲ್ ಅವರ ಈ ವಿಶೇಷ ಗುಣಕ್ಕೆ ಮನ ಸೋತ ಈ ದಂಪತಿ ಸದ್ಯ ತಮ್ಮ ಗಂಡು ಮಗುವಿಗೆ ಅವರ ಹೆಸರನ್ನೇ ನಾಮಕಾರಣ ಮಾಡಿದ್ದಾರೆ.
ಈ ವಿಷಯದ ಕುರಿತು ಜಿಲ್ಲಾಧಿಕಾರಿ ಎಸ್.ಎಸ್.ನಕುಲ್ ಅವರ ಗಮನ ಸೆಳೆದಾಗ, ಅವರಿಗೆ ಆಶ್ಚರ್ಯವಾಗಿದೆ. ಜೊತೆಗೆ ಸಂತಸ ವ್ಯಕ್ತಪಡಿಸಿದ್ದಾರೆ. ಇದೊಂದು ಅವಿಸ್ಮರಣೀಯ ಘಟನೆ. ನಿಜಕ್ಕೂ ಅಚ್ಚರಿಯಾಗುತ್ತಿದೆ. ದಂಪತಿ ಮತ್ತು ಮಗುವಿಗೆ ಶುಭವಾಗಲಿ ಎಂದು ಹಾರೈಸಿದ್ದಾರೆ.
