ಬಳ್ಳಾರಿ: ಹೈದರಾಬಾದ್ ಕರ್ನಾಟಕ ಭಾಗದ ರಾಯಚೂರು, ಕೊಪ್ಪಳ ಹಾಗೂ ಬಳ್ಳಾರಿಯಲ್ಲಿ ಮಣ್ಣೆತ್ತಿನ ಅಮಾವಾಸ್ಯೆಯನ್ನು ಸಂಭ್ರಮ-ಸಡಗರದಿಂದ ಆಚರಿಸಲಾಯಿತು. ಜೋಡಿ ಮಣ್ಣೆತ್ತುಗಳು ಹಾಗೂ ಗೋದಲಿಯನ್ನು ಖರೀದಿಸಿ ಈ ದಿನ ವಿಶೇಷ ಹೂವಿನ ಅಲಂಕಾರದ ಮೂಲಕ ಪೂಜೆ ಸಲ್ಲಿಸಲಾಯಿತು.
ಬಳ್ಳಾರಿ ಜಿಲ್ಲೆಯ ಗ್ರಾಮೀಣ ಪ್ರದೇಶದ ಪ್ರತಿಯೊಬ್ಬರ ಮನೆಗಳಲ್ಲೂ ಕೂಡ ದೇವರ ಜಗುಲಿಯ ಮೇಲೆ ಈ ಮಣ್ಣಿನಿಂದ ತಯಾರಿಸಿದ ಜೋಡೆತ್ತುಗಳನ್ನು ಇಟ್ಟು ಪೂಜೆ ಮಾಡುತ್ತಾರೆ. ಗೋಧಿ ಹುಗ್ಗಿ, ಕಾಯಿಪಲ್ಯೆ, ಅನ್ನ, ಸಾಂಬಾರ್ ಮಡೆಸ್ನಾನದಿಂದ ತಯಾರಿಸಿ, ಮಾದ್ಲಿ ಮಾಡಿ ಜೋಡಿ ಮಣ್ಣೆತ್ತುಗಳಿಗೆ ನೈವೇದ್ಯ ಮಾಡುತ್ತಾರೆ. ಬಳಿಕ ಮನೆಮಂದಿ ಸಹಭೋಜನ ಸವಿಯುತ್ತಾರೆ. ನಾಳೆಯ ದಿನ ಈ ಜೋಡಿ ಮಣ್ಣೆತ್ತುಗಳ ಕರಿಹರಿಬಿಡುವ ಭರಾಟೆ ಜೋರಾಗಿಯೇ ಇರುತ್ತದೆ.
ರೈತಾಪಿ ವರ್ಗದ ಅಚ್ಚುಮೆಚ್ಚಿನ ಹಬ್ಬಗಳಲ್ಲೊಂದು:
ಉತ್ತರ ಕರ್ನಾಟಕ ಹಾಗೂ ಹೈ-ಕ ಭಾಗದ ನಾನಾ ಜಿಲ್ಲೆಗಳಲ್ಲಿನ ಗ್ರಾಮೀಣ ಪ್ರದೇಶ ವ್ಯಾಪ್ತಿಯಲ್ಲಿ ಜೀವಿಸುವ ರೈತಾಪಿ ವರ್ಗದಲ್ಲಿ ಈ ಮಣ್ಣೆತ್ತಿನ ಅಮಾವಾಸ್ಯೆಯು ಒಂದು. ಈ ಅಮಾವಾಸ್ಯೆ ಆಚರಣೆ ಮಾಡಲು ರೈತಾಪಿ ವರ್ಗದವರ ಮನೆಗಳಲ್ಲಿ ಸಂಭ್ರಮ ಮೂಡುತ್ತದೆ. ನಗರ ಪ್ರದೇಶಗಳಲ್ಲಿ ವಾಸಿಸುತ್ತಿರುವ ರೈತರು ಈ ದಿನ ತಮ್ಮ ಗ್ರಾಮಗಳತ್ತ ತೆರಳಿ, ಭೂಮಿ ತಾಯಿಗೆ ವಿಶೇಷ ಪೂಜೆ ಸಲ್ಲಿಸುತ್ತಾರೆ. ಕೆಲವರು ಆ ಭೂಮಿಯ ಮಣ್ಣಿನಿಂದಲೇ ಜೋಡೆತ್ತುಗಳನ್ನು ತಯಾರಿಸುತ್ತಾರೆ. ನಗರ ಪ್ರದೇಶಗಳಲ್ಲಿ ಜೀವಿಸುವವರು ಕುಂಬಾರರು ತಯಾರಿಸಿದ ಮಣ್ಣೆತ್ತುಗಳನ್ನು ಖರೀದಿಸುವ ವಾಡಿಕೆ ಈ ಭಾಗದಲ್ಲಿದೆ.
ಮಣ್ಣೆತ್ತುಗಳ ಮಾರಾಟದ ಭರಾಟೆ ಜೋರು:
ಗಣಿನಾಡಿನಲ್ಲಿ ಮಣ್ಣೆತ್ತುಗಳ ಮಾರಾಟದ ಭರಾಟೆ ಜೋರಾಗಿಯೇ ಸಾಗಿತ್ತು. ಬಳ್ಳಾರಿ ನಗರದ ಕುಂಬಾರ ಓಣಿ, ಬೆಂಗಳೂರು ರಸ್ತೆ, ಗಡಿಗಿ ಚನ್ನಪ್ಪ ವೃತ್ತ, ಸತ್ಯನಾರಾಯಣ ಪೇಟೆಯಲ್ಲಿನ ರಾಘವೇಂದ್ರ ಸ್ವಾಮಿ ದೇಗುಲ, ಕನಕದುರ್ಗಮ್ಮ ದೇಗುಲ, ಕುಮಾರಸ್ವಾಮಿ ದೇಗುಲ ಸೇರಿದಂತೆ ಇತರೆಡೆ ನಿನ್ನೆ ಹಾಗೂ ಈ ದಿನವೂ ಮಣ್ಣೆತ್ತುಗಳ ಮಾರಾಟ ನಡೆಯಿತು.
