ಬಳ್ಳಾರಿ: ಜಿಲ್ಲೆಯಲ್ಲಿ ಬ್ರಿಟಿಷರ ಕಾಲದ ಅನೇಕ ಪಾರಂಪರಿಕ ಕಟ್ಟಡಳಿದ್ದು, ಸುಮಾರು 150 ರಿಂದ 200 ವರ್ಷಗಳ ಇತಿಹಾಸವನ್ನು ಹೊಂದಿವೆ. ಇಂತಹ ಬಿರು ಬಿಸಿಲಿಗೆ ಬೇಸತ್ತು ಒಂದೊಮ್ಮೆ ಈ ಕಟ್ಟಡಗಳನ್ನು ಪ್ರವೇಶಿಸಿದರೆ ತಂಪಾದ ಅನುಭವವಾಗುತ್ತದೆ.
ಬ್ರಿಟಿಷರ ಕಾಲದ ಈ ಕಟ್ಟಡಗಳನ್ನು ಸಂಪೂರ್ಣವಾಗಿ ಕಲ್ಲು ಮತ್ತು ಸುಣ್ಣದ ಗಾರೆ ಹಾಗೂ ಬೆಲ್ಲದಿಂದ ನಿರ್ಮಾಣ ಮಾಡಲಾಗಿದ್ದು, ಈ ಕಟ್ಟಡಗಳನ್ನು ಪಿಲ್ಲರ್ಗಳಿಲ್ಲದೆ ಕೇವಲ ಕಮಾನುಗಳ ಮೂಲಕ ನಿರ್ಮಿಸಲಾಗಿದೆ. ಹಾಗಾಗಿ ಇವು ಸದಾ ಬೆಳಕು ಮತ್ತು ಗಾಳಿಯಿಂದ ಕೂಡಿವೆ.
ಇಂತಹ ಪಾರಂಪರಿಕ ಕಟ್ಟಡಗಳಲ್ಲಿ ಜಿಲ್ಲಾಡಳಿತ ಕಚೇರಿ ಕೂಡ ಒಂದು. ಈ ಕಟ್ಟಡಕ್ಕೆ ಅಂದಾಜು 180 ವರ್ಷಗಳ ಇತಿಹಾಸ ಇದೆ. ಅಂಚೆ ಅಧೀಕ್ಷಕರ ಕಚೇರಿ ಕಾರ್ಯ ನಿರ್ವಹಿಸುವ ಕಟ್ಟಡಕ್ಕೆ ಸುಮಾರು 150 ವರ್ಷಗಳ ಇತಿಹಾಸ ಇದ್ದರೆ, ಜಿಲ್ಲಾ ಪಂಚಾಯತ್ ಕಚೇರಿ ಹಾಗೂ ರೈಲ್ವೆ ನಿಲ್ದಾಣಕ್ಕೂ ಅದರಷ್ಟೇ ವರ್ಷಗಳ ಇತಿಹಾಸವಿದೆ. ಇಂಥಹ ಪಾರಂಪರಿಕ ಕಟ್ಟಡಗಳು ಬಿಸಿಲನಾಡು ಬಳ್ಳಾರಿಯಲ್ಲಿರೋದು ಹೆಮ್ಮೆಯ ವಿಷಯವಾಗಿದೆ.
ಪಾರಂಪರಿಕ ಕಟ್ಟಡಗಳೆಲ್ಲ ಕೂಲ್.. ಕೂಲ್
ಈ ಎಲ್ಲಾ ಪಾರಂಪರಿಕ ಕಟ್ಟಡಗಳು ಕಲ್ಲುಗಳಿಂದ ನಿರ್ಮಾಣವಾಗಿದ್ದು, ಕಮಾನು, ರಂಧ್ರಾಕಾರದ ಬಾಗಿಲು, ಬಹು ಎತ್ತರ, ಉದ್ದದ ಕಟ್ಟಡಗಳು ಇವಾಗಿರೋದರಿಂದ ಸದಾ ತಂಪಾದ ವಾತಾವರಣ ಇಲ್ಲಿರುತ್ತದೆ.
ಬಳ್ಳಾರಿ ಪೆಕ್ಸ್ ಅಂಚೆ ಲಕೋಟೆ:
ಬಳ್ಳಾರಿ ಪೆಕ್ಸ್ ಎಂಬ ಹೆಸರಿನಡಿ ಅಂಚೆ ಅಧೀಕ್ಷಕರ ಕಚೇರಿಯು ವಿಶೇಷ ಲಕೋಟೆಯನ್ನು ಮುದ್ರಿಸಿದೆ. ಅದರ ಮೇಲ್ಭಾಗದಲ್ಲಿ ಪಾರಂಪರಿಕ ಕಟ್ಟಡದ ಭಾವಚಿತ್ರವನ್ನ ಮುದ್ರಿಸಲಾಗಿದೆ. ಇದಲ್ಲದೆ ಈ ಪಾರಂಪರಿಕ ಕಟ್ಟಡವನ್ನು ವಸಾಹತುಶಾಹಿ ಯುಗದ ಕಟ್ಟಡದ ಶೈಲಿಯಲ್ಲೇ ನಿರ್ಮಿಸಲಾಗಿದೆ. ಕ್ರಿ.ಶ. 1870ರಲ್ಲಿ ಕಟ್ಟಡ ನಿರ್ಮಾಣವಾಗಿದೆ. 16 ಬಾಗಿಲು, 58 ಅಡಿ ಅಗಲ, 116 ಅಡಿ ಉದ್ದ, 34.6 ಅಡಿ ಎತ್ತರದ ಕಟ್ಟಡಕ್ಕೆ ಮುಖ್ಯ ಹಜಾರಕ್ಕೆ ಒಂದೇ ಒಂದು ಆಧಾರಸ್ತಂಭ ಇಲ್ಲದಿರೋದೆ ಇದರ ವಿಶೇಷವೆನಿಸಿದೆ.
