ಜಿಂದಾಲ್ ಸಮೂಹ ಸಂಸ್ಥೆಗೆ ಭೂಮಿ ಪರಭಾರೆ ವಿಚಾರ ನ್ಯಾಯಯುತವಾಗಿದೆ: ಶಾಸಕ ಈ.ತುಕಾರಾಂ

ಜಿಂದಾಲ್ ಸಮೂಹ ಸಂಸ್ಥೆಗೆ ಭೂಮಿ ಪರಭಾರೆ ವಿಚಾರದ ಬೆಂಬಲಕ್ಕೆ ಕಾಂಗ್ರೆಸ್​​ನ ಎರಡನೇ ಶಾಸಕರಾಗಿ ಈ‌.ತುಕಾರಾಂ ಬೆಂಬಲಕ್ಕೆ ನಿಂತಿದ್ದಾರೆ.

ಬಳ್ಳಾರಿ: ಜಿಲ್ಲೆಯ ಸಂಡೂರು ತಾಲೂಕಿನ ತೋರಣಗಲ್ಲಿನ ಜಿಂದಾಲ್ ಸಮೂಹ ಸಂಸ್ಥೆಗೆ ಅಂದಾಜು 3,667 ಎಕರೆ ಭೂಮಿಯನ್ನ ಪರಭಾರೆ ಮಾಡಿರೋದು ನ್ಯಾಯಯುತವಾಗಿದೆ ಎಂದು ಸಂಡೂರಿನ ಶಾಸಕ ಈ.ತುಕಾರಾಂ ಹೇಳಿದ್ದಾರೆ.

ಸಂಡೂರು ಪಟ್ಟಣದ ಸರ್ಕಾರಿ ಪ್ರವಾಸಿ ಮಂದಿರದಲ್ಲಿಂದು ನಡೆದ ಮಾಧ್ಯಮಗೋಷ್ಠಿಯಲ್ಲಿ ಮಾತನಾಡಿದ ಅವರು, ಈ ವಿಚಾರವಾಗಿ ಈಗಾಗಲೇ ನಾನು ವಿರೋಧ ಪಕ್ಷದ ನಾಯಕ ಸಿದ್ದರಾಮಯ್ಯ ಅವರೊಂದಿಗೆ ಮಾತನಾಡಿರುವೆ. ಅವರು ನನಗೆ ನ್ಯಾಯಯುತವಾಗಿರುವ ಅಂಶಗಳನ್ನ ಒಳಗೊಂಡಂತಹ ಕಡತಗಳನ್ನ ತೆಗೆದುಕೊಂಡು ಬನ್ನಿ ಮಾತನಾಡೋಣ ಎಂದಿದ್ದಾರೆ. ಜಿಂದಾಲ್ ಸಮೂಹ ಸಂಸ್ಥೆಗೆ ಭೂಮಿ ಪರಭಾರೆ ವಿಚಾರವನ್ನ ಈ ರಾಜ್ಯ ಸರ್ಕಾರ ಕೈಬಿಟ್ಟಿರುವ ಬಗ್ಗೆ ನಾನೇ ಕಲಾಪದಲ್ಲಿ ಮಾತನಾಡುವೆ. ಸದ್ಯ ಕಲಾಪ ಇಲ್ಲ. ಮುಂದೆ ಇದನ್ನ ನಾನು ರೈಸ್ ಮಾಡುವೆ ಎಂದರು.

ಕಳೆದ 2008ರ ಸಮ್ಮಿಶ್ರ ಸರ್ಕಾರದ ಸಿಎಂ ಆಗಿದ್ದ ಹೆಚ್.ಡಿ.ಕುಮಾರಸ್ವಾಮಿ ಹಾಗೂ ಉಪ ಮುಖ್ಯಮಂತ್ರಿ ಆಗಿದ್ದ ಬಿ.ಎಸ್.ಯಡಿಯೂರಪ್ಪನವರ ಅಧಿಕಾರದ ಅವಧಿಯಲ್ಲಿ ಈ ಲೀಸ್ ಕಂ ಸೇಲ್ ಡೀಡ್ ಆಗಿತ್ತು. ಅಂದಿನ ಸರ್ಕಾರದಲ್ಲಿ ಎಲ್ಲರೂ ಒಪ್ಪಿದ್ದರು. ಈಗ್ಯಾಕೆ ಅಪೋಸ್ ಮಾಡುತ್ತಿದ್ದಾರೆ ಅಂತ ಗೊತ್ತಿಲ್ಲ. ಇದು ಲೀಗಲ್ ಆಗಿ ಸಮಸ್ಯೆ ಆಗುತ್ತೆ. ಬಹಳ ಎಚ್ಚರಿಕೆ ವಹಿಸಿ ಭೂಮಿ ಪರಭಾರೆ ಮಾಡಲೇಬೇಕು ಎಂದರು.

ಜಿಲ್ಲಾ ಉಸ್ತುವಾರಿ ಸಚಿವ ಆನಂದ್​ ಸಿಂಗ್ ಅವರು ಸತ್ಯಾಂಶವನ್ನ ಅರಿತುಕೊಂಡು ಮಾತಾಡಬೇಕು. ತಾವೊಬ್ಬರು ಇಂಡಸ್ಟ್ರಿಯಲಿಸ್ಟ್ ಆಗಿ ದೂರಾಲೋಚನೆ ಮಾಡಬಾರದು. ರಾಜಕಾರಣ ಎಲ್ಲ ಸಂದರ್ಭದಲ್ಲೂ ಮಾಡೋದು ಸರಿಯಲ್ಲ. ಮ್ಯಾನಿಫೆಸ್ಟೋ ಏನಿದೆ ಅದರಂತೆಯೇ ನುಡಿಯಬೇಕು,‌ ನಡೆಯಬೇಕು ಎಂದರು.