ಅಯೋಧ್ಯಾ ರಾಮ ಮಂದಿರ ಉದ್ಘಾಟನೆ: ಈಟಿವಿ ಭಾರತ ಜೊತೆ ಸಂತಸ ಹಂಚಿಕೊಂಡ ಅರವಿಂದರಾವ್​ ದೇಶಪಾಂಡೆ

ಅಯೋಧ್ಯೆ ಶ್ರೀರಾಮ ಮಂದಿರ ಉದ್ಘಾಟನೆ ಬಗ್ಗೆ ಆರ್​ಎಸ್​ಎಸ್​ ಹಿರಿಯ ಮುಖಂಡ ಅರವಿಂದರಾವ್ ದೇಶಪಾಂಡೆ ಸಂತಸ ವ್ಯಕ್ತಪಡಿಸಿದ್ದಾರೆ.

ಚಿಕ್ಕೋಡಿ: ಮರ್ಯಾದಾ ಪುರುಷೋತ್ತಮ ಶ್ರೀರಾಮಚಂದ್ರ ದೇವರ ಮೂರ್ತಿ ಅಯೋಧ್ಯೆಯಲ್ಲಿ ಇದೇ 22ರಂದು ಪ್ರಾಣ ಪ್ರತಿಷ್ಠಾಪನೆಗೊಳ್ಳಲಿದ್ದು ದೇಶದಲ್ಲಿ ಸಂಭ್ರಮಾಚರಣೆ ಮನೆ ಮಾಡಿದೆ. ಹಿಂದೆ ಶಿವಾಜಿ ಮಹಾರಾಜರ ಪಟ್ಟಾಭಿಷೇಕ ಹಾಗೂ ವಿಜಯನಗರದ ಸಾಮ್ರಾಜ್ಯದ ಅವಧಿಯಲ್ಲಿ ಒಂದು ಪ್ರದೇಶಕ್ಕೆ ಮಾತ್ರ ಸಂಭ್ರಮ ಮನೆಮಾಡಿತ್ತು. ಆದರೆ, ಅಯೋಧ್ಯೆಯ ರಾಮ ಮಂದಿರ ಉದ್ಘಾಟನೆ ಭಾರತಾದ್ಯಂತ ಸಂಭ್ರಮಾಚರಣೆ ಮಾಡುತ್ತಿರುವುದು ನಾವೆಲ್ಲರೂ ಸ್ವಾಭಿಮಾನ ಹೆಮ್ಮೆಪಡುವ ದಿನ ಎಂದು ಕರಸೇವಕ ಹಾಗೂ ಆರ್​ಎಸ್​ಎಸ್​ (RSS) ಕರ್ನಾಟಕ ಉತ್ತರ ಪ್ರಾಂತ್ ಕಾರ್ಯಕಾರಿಣಿ ಸದಸ್ಯರಾದ ಹಿರಿಯ ಮುಖಂಡರಾದ ಅರವಿಂದ್ ರಾವ ದೇಶಪಾಂಡೆ ಸಂತಸ ವ್ಯಕ್ತಪಡಿಸಿದ್ದಾರೆ.

ಅವರು ಅಥಣಿಯಲ್ಲಿ ಈಟಿವಿ ಭಾರತ ಜೊತೆ ಮಾತನಾಡಿ, ಇಡಿ ಜಗತ್ತು, ಭಾರತ ಮತ್ತು ಹಿಂದೂ ಸಮಾಜದ ದೃಷ್ಟಿಯಿಂದ ರಾಮ ಮಂದಿರ ಉದ್ಘಾಟನೆ ಸಂತೋಷ ಸಂಭ್ರಮದಿಂದ ಆಚರಿಸಲಾಗುತ್ತಿದೆ. ರಾಮ ಮಂದಿರ ಪ್ರತಿಷ್ಠಾಪನೆ ಜಗತ್ತು ಸಂಭ್ರಮಿಸುತ್ತಿದೆ. ನಮ್ಮ ಸಮಾಜ ದೃಷ್ಟಿಯಿಂದ, ಭಾರತೀಯರ ದೃಷ್ಟಿಯಿಂದ, ಒಂದು ತಿರುವು ಕೊಡುವಂತಹ ದಿನವಾಗಿರುತ್ತದೆ, ನಾವು ಎಲ್ಲರೂ ಸ್ವಾಭಿಮಾನ ಹೆಮ್ಮೆಪಡುವ ದಿನವೆಂದು ಹೇಳಿದರು.

ರಾಮ ಮಂದಿರ ಹೋರಾಟ ಮೆಲುಕು ಹಾಕಿದ ದೇಶಪಾಂಡೆ: ರಾಮಜನ್ಮಭೂಮಿ ಹೋರಾಟಕ್ಕೆ ಹಿಂದೂ ವಿಶ್ವ ಪರಿಷತ್, ರಾಮನ ಭಕ್ತರು, ಕರಸೇವಕರು, ಆರ್​ಎಸ್​ಎಸ್ ನಮ್ಮ ಸಂಘಟನೆಗಳು ಹೊಂದಾಣಿಕೆ ಇತ್ತು. ಆದರೆ ರಾಜ್ಯದಲ್ಲಿ ಮತ್ತು ಕೇಂದ್ರದಲ್ಲಿ ಸರ್ಕಾರಗಳು ಇರುದರಿಂದ ನಮಗೆ ಅನುಕೂಲವಾದ ವಾತಾವರಣ ಇರಲಿಲ್ಲ. ರಾಮ ಕಾಲ್ಪನಿಕ ವ್ಯಕ್ತಿ ಎಂದು ಕೋರ್ಟಿಗೆ ವರದಿ ಸಲ್ಲಿಸಿದ ಸರ್ಕಾರ ಅವತ್ತು ಇತ್ತು. ಅಂತ ಹೊತ್ತಿನಲ್ಲಿ ನಾವು ಅಥಣಿಯಿಂದ 7 ಜನ ಬೆಳಗಾವಿಯಿಂದ ಒಟ್ಟು 63 ಜನರ ಒಂದು ತಂಡವಾಗಿ 1989ರಲ್ಲಿ ಕರಸೇವಕರು ಹೋರಾಟದಲ್ಲಿ ಭಾಗವಹಿಸಿದ್ದೆವು.

ಯುಪಿ ಸರ್ಕಾರದ ಅವತ್ತಿನ ಮುಖ್ಯಮಂತ್ರಿ ಹೋರಾಟಕ್ಕೆ ಬರುವ ಮಾರ್ಗ ಮಧ್ಯದಲ್ಲಿ ಕರಸೇವಕರ ಬಂಧನ ಮಾಡುವಂತೆ ಆದೇಶ ನೀಡಿದರು. ಕೆಲವರು ಮಾರ್ಗ ಮಧ್ಯದಲ್ಲಿ ಬಂಧನಕ್ಕೋಳಗಾಗಿ ಹೋರಾಟದಲ್ಲಿ ಭಾಗವಹಿಸದೇ ಇರುವ ಸನ್ನಿವೇಶ ಕೂಡ ನಿರ್ಮಾಣವಾಗಿತ್ತು. ಹತ್ತು ದಿನ ರಾಮ ಜನ್ಮಭೂಮಿಯಲ್ಲಿ ಇದ್ದು ಹೋರಾಟದಲ್ಲಿ ಭಾಗವಹಿಸಿದೆವು.

ಸರ್ಕಾರ ಕಟ್ಟುನಿಟ್ಟಿನ ಕ್ರಮ ವಹಿಸಿದ್ದರೂ ಮೂರು ಲಕ್ಷ ಜನ ಸೇರಬಹುದೆಂಬ ನಿರೀಕ್ಷೆ ಇತ್ತು, ಆದರೆ 10 ಲಕ್ಷಕ್ಕೂ ಹೆಚ್ಚು ಜನ ಅವತ್ತು ಕರ ಸೇವಕರು ಪ್ರತ್ಯಕ್ಷರಾಗಿದ್ದರು. ದಿನವೂ 11 ಗಂಟೆಗೆ ಹಾಗೂ ಸಂಜೆ ಐದು ಗಂಟೆಗೆ ಒಂದೂ ಸಭೆ ಆಗುತಿತ್ತು, ಆ ಸಭೆಯಲ್ಲಿ ಮುಖಂಡತ್ವವನ್ನು ಅಶೋಕ ಸಿಂಘಲ್​ ಜೀ, ಸ್ವಾತಿ ಎಲೆತುಂಬ್ರಾ, ಉಮಾ ಭಾರತಿ, ಮುರುಳಿ ಮನೋಹರ್ ಜೋಶಿ, ಇಂತಹ ಹಲವು ಘಟಾನುಘಟಿ ನಾಯಕರು ಉಪಸ್ಥಿತರಿದ್ದರು. ಎಲ್ಲರೂ ರಾಮಮಂದಿರಕ್ಕೆ ಅಳಿಲು ಸೇವೆ ಮುಖಾಂತರ ಸೇವೆಯನ್ನು ಮಾಡಿದ್ದಾರೆ ಎಂದು ಒಂದು ಕ್ಷಣ ಅರವಿಂದ್ ರಾವ್ ಅವರು ಭಾವಕರಾದರು.

ಸದ್ಯ ರಾಮ ಮಂದಿರ ಉದ್ಘಾಟನೆ ಅತಿ ಸಂತಸ ಮೂಡಿಸಿದೆ. ನಾವು ಇರುವಾಗಲೇ ಈ ಉದ್ಘಾಟನೆ ಕಾರ್ಯ ನಡೆಯುತ್ತಿರುವುದು ನಮ್ಮ ಸೌಭಾಗ್ಯ, ಸದ್ಯ ಈಗ ಎಲ್ಲರಿಗೂ ರಾಮಮಂದಿರಕ್ಕೆ ಆಹ್ವಾನ ನೀಡಿಲ್ಲ, ಯಾರ್ಯಾರಿಗೆ ಅನುಕೂಲವಾಗುತ್ತದೆ ಅವಾಗ ರಾಮಮಂದಿರವನ್ನು ನೋಡಿಕೊಂಡು ಬರುವುದಕ್ಕೆ ಸರ್ಕಾರ ಎಲ್ಲ ವ್ಯವಸ್ಥೆ ಮಾಡಿದೆ. ರಾಮಮಂದಿರ ಉದ್ಘಾಟನೆ ದಿನವು ತಮ್ಮ ತಮ್ಮ ಮನೆಗಳಲ್ಲಿ ಐದು ದೀಪಗಳನ್ನು ಬೆಳಗಿಸಿ ಸಂಭ್ರಮಾಚರಣೆ ಮಾಡಬೇಕು ಎಂದು ಹೇಳಿದರು.

ಇದನ್ನೂ ಓದಿ: ಭವ್ಯ ರಾಮ ಮಂದಿರದಲ್ಲಿ ಕರುನಾಡಿನ ರಾಮ; ಮೈಸೂರಿನ ಅರುಣ್​ ಯೋಗಿರಾಜ್​ ಕೆತ್ತನೆಯ ಮೂರ್ತಿ ಆಯ್ಕೆ