ಬೆಳಗಾವಿ: ಗೋಕಾಕ್ ವಿಧಾನಸಭೆ ಅಖಾಡದಲ್ಲಿರುವ ಜಾರಕಿಹೊಳಿ ಸಹೋದರರ ಮಾತಿನ ಕಾಳಗ ವಿಕೋಪಕ್ಕೆ ತಿರುಗುತ್ತಿದೆ. ರಮೇಶ್ ಜಾರಕಿಹೊಳಿ ವಿರುದ್ಧ ವಾಗ್ದಾಳಿ ನಡೆಸಿರುವ ಸತೀಶ ಜಾರಕಿಹೊಳಿ ವಿಭಿನ್ನವಾಗಿ ಅಣಕಿಸಿದ್ದಾರೆ.
ಬಿಜೆಪಿ ಅಭ್ಯರ್ಥಿಯಾಗಿ ಸ್ಪರ್ಧಿಸಿರುವ ರಮೇಶ್ ಜಾರಕಿಹೊಳಿ ಕಣದಲ್ಲಿದ್ದರೆ, ಕಾಂಗ್ರೆಸ್ ಅಭ್ಯರ್ಥಿಯಾಗಿ ಲಖನ್ ಜಾರಕಿಹೊಳಿ ಸ್ಪರ್ಧಿಸುತ್ತಿದ್ದಾರೆ.
ಈ ಬಗ್ಗೆ ವಿಡಿಯೋ ಮಾಡಿ ಮಾತನಾಡಿರುವ ಸತೀಶ್ ಜಾರಕಿಹೊಳಿ, ಇತ್ತೀಚಿಗೆ ರಮೇಶ್ ಜಾರಕಿಹೊಳಿಯವರು ಲಖನ್ ಜಾರಕಿಹೊಳಿ ನನ್ನ ಬೆನ್ನಿಗೆ ಚೂರಿ ಇರಿದಿದ್ದಾರೆ, ಮೋಸ ಮಾಡಿದ್ದಾರೆ ಎಂಬ ಹೇಳಿಕೆಯನ್ನು ನೀಡಿದ್ದರು. ನನ್ನ ಪ್ರಕಾರ ಅವರು ಯಾವುದೇ ಮೋಸ ಮಾಡಿಲ್ಲ, ಲಖನ್ ಬಿಜೆಪಿಯಲ್ಲಿದ್ದು ಕಾಂಗ್ರೆಸ್‌ಗೆ ಬಂದಿದ್ದರೆ ಮೋಸ ಅನ್ನಬಹುದಿತ್ತು. ಲಖನ್ ಬೆನ್ನಿಗೆ ಚೂರಿ ಹಾಕಿಲ್ಲ. ಆದ್ರೆ, ರಮೇಶ್ ಜಾರಕಿಹೊಳಿಯವರು ಜನ ನಾನು ಹೇಳಿದಂತೆಯೇ ಕೇಳಬೇಕು, ನಾನು ಮಾಡಿದ್ದನ್ನೇ ಜನ ಒಪ್ಪಬೇಕು, ಆಗ ಮಾತ್ರ ಆತ ಒಳ್ಳೆಯವ ಮತ್ತು ಪ್ರಶಂಸೆಗೆ ಒಳಗಾಗುತ್ತಾನೆ. ಅಲ್ಲದೇ ರಮೇಶ್‌ಗೆ ವಿರೋಧ ಮಾಡಿದರೆ ಯಾವುದೋ ಒಂದು ಹಣೆಪಟ್ಟಿ ಕಟ್ಟುವ ಕೆಲಸ ನಿರಂತರವಾಗಿ ನಡೆಯುತ್ತದೆ. ರಮೇಶ್ ಜಾರಕಿಹೊಳಿ ಹೇಳಿದಂತೆ ಕುಣಿಯಬೇಕು, ಯಾವ ರೀತಿ ಕುಣಿಯಬೇಕು ಅಂತಂದ್ರೆ ಈ ಚಿತ್ರದ ರೀತಿ ಎಂದಿರುವ ಅವರು, ಈ ದೃಶ್ಯವನ್ನು ನೋಡಿ ಎಂದಿದ್ದಾರೆ.
ಈ ಮೂಲಕ ರಮೇಶ್ ಕಾರ್ಯವೈಖರಿಯನ್ನು ಸತೀಶ್ ಜಾರಕಿಹೊಳಿ ಅಣಕಿಸಿದ್ದಾರೆ. ಈ ವಿಡಿಯೋ ವೈರಲ್ ಆಗಿದೆ.
