ಚಿಕ್ಕೋಡಿ : ಪ್ರವಾಹದ ನೀರಿನಲ್ಲಿ ತಮ್ಮ ಜೀವನದ ಆಸ್ತಿ-ಪಾಸ್ತಿ ಕಳೆದುಕೊಂಡು ನಿರಾಶ್ರಿತರಾಗಿರುವವರಿಗೆ ಪರಿಹಾರ ನೀಡಿ ಕಾಪಾಡಿ ಎಂದು ಜೈನ ಸಮಾಜದ ರಾಷ್ಟ್ರಸಂತರಾದ ಚಿನ್ಮಯಸಾಗರ (ಜಂಗಲವಾಲೆ ಬಾಬಾ) ಮುನಿ ಮಹಾರಾಜರು ಚಿನ್ಮಯಸಾಗರ ಚಾರಿಟೇಬಲ್ ಟ್ರಸ್ಟ್ ವತಿಯಿಂದ ದೇಶದ ಪ್ರಧಾನಿ ನರೇಂದ್ರ ಮೋದಿ, ಗೃಹ ಸಚಿವ ಅಮೀತ್ ಶಾ ಹಾಗೂ ರಾಜ್ಯ ಮುಖ್ಯಮಂತ್ರಿ ಬಿ.ಎಸ್.ಯಡಿಯೂರಪ್ಪ ಅವರಿಗೆ ಪತ್ರ ಬರೆದು ಮನವಿ ಮಾಡಿಕೊಂಡಿದ್ದಾರೆ.
ಬೆಳಗಾವಿ ಜಿಲ್ಲೆಯ ಕಾಗವಾಡ ತಾಲೂಕಿನ ಶೇಡಬಾಳ ಪಟ್ಟಣದ ಆಚಾರ್ಯ ಶಾಂತಿಸಾಗರ ಜೈನ ಆಶ್ರಮದಲ್ಲಿ ರಾಷ್ಟ್ರಸಂತ ಚಿನ್ಮಯಸಾಗರ ಮುನಿ ಮಹಾರಾಜರು ಭಕ್ತರನ್ನು ಉದ್ದೇಶಿಸಿ ಮಾತನಾಡಿದ, ಜೀವನದಲ್ಲಿ ಬದುಕಲು ನೀರು ಅತಿ ಅಮೂಲ್ಯ. ಆದರೆ ಮಹಾಪೂರ ಬಂದು ಸಂಪೂರ್ಣ ಜೀವನ ಅಸ್ತ-ವ್ಯಸ್ತವಾಗಿದೆ. ಇದೇ ನೀರನ್ನು ಬರಡು ಭೂಮಿಗಳಿಗೆ ಬಳಿಸಿ, ಅಲ್ಲಿಯ ರೈತರ ಜೀವನ ಉದ್ಧಾರ ಮಾಡಲು ಸಾಧ್ಯವಿದೆ. ಆದರೆ ಸರಕಾರ ಮನಸ್ಸು ಮಾಡಬೇಕಿದೆ ಎಂದು ಮಹಾರಾಜರು ಹೇಳಿದರು.
ಪ್ರವಾಹದಿಂದ ಜನರು ಮನೆ, ಆಸ್ತಿ, ಬೆಳೆದ ಬೆಳೆಗಳನ್ನು ಕಳೆದುಕೊಂಡು ನಿರಾಶ್ರಿತರಾಗಿದ್ದಾರೆ. ಅವರಿಗೆ ಆಶ್ರಯದ ಅವಶ್ಯಕತೆಯಿದೆ. ಸರಕಾರ 10 ಸಾವಿರ ರೂ. ಮಾತ್ರ ಪರಿಹಾರ ನೀಡಿದೆ. ಅವರಿಗೆ ಇಷ್ಟು ಹಣದಿಂದ ಏನಾಗುವುದು? ಸೂರು ಕಳೆದುಕೊಂಡವರಿಗೆ ಮನೆಗಳು ನಿರ್ಮಿಸುವುದು, ಬೆಳೆದ ಬೆಳೆಗೆ ಪರಿಹಾರ ನೀಡುವುದು ಅಗತ್ಯವಿದೆ. ದೇಶ ಮತ್ತು ರಾಜ್ಯದಲ್ಲಿನ ಉದ್ಯಮಿಗಳು, ರಾಜಕೀಯ ಮುಖಂಡರು, ಸಂಘ, ಸಂಸ್ಥೆಗಳು ನೆರವು ನೀಡಲು ಮುಂದೆ ಬರಬೇಕು. ನೆರೆಯಲ್ಲಿ ಹಾನಿಯಾದ ಕುಟುಂಬಗಳಿಗೆ ಮನೆ ಕಟ್ಟಿಸಿ, ಅವರಿಗೆ ನೆಮ್ಮದಿ ನೀಡುವುದು ಅಗತ್ಯವಿದೆ ಎಂದರು.
ದೇಶದ ಪ್ರಧಾನಿ ನರೇಂದ್ರ ಮೋದಿಯವರು ಇಲ್ಲಿಯ ಜನರ ಸಮಸ್ಯೆಗಳನ್ನು ಆಲಿಸಿ, ಬೇಗನೇ ಪರಿಹಾರ ನೀಡಿ ಕುಟುಂಬಗಳಿಗೆ ಆಧಾರರಾಗಬೇಕೆಂದು ಮುನಿ ಮಹಾರಾಜರು ಪತ್ರದ ಮುಖಾಂತರ ತಮ್ಮ ಬೇಡಿಕೆ ಮಂಡಿಸಿದ್ದಾರೆ. ಜೊತೆಗೆ ದೇಶದಲ್ಲಿನ ರಾಜಕೀಯ ಪಕ್ಷಗಳು ಪಕ್ಷ-ಭೇದ ಮರೆತು ಎಲ್ಲರು ಒಂದುಗೂಡಿ ಸಮಸ್ಯೆಗಳಿಗೆ ಸ್ಪಂದಿಸಿರಿ. ಧರ್ಮಸ್ಥಳದ ವಿರೇಂದ್ರ ಹೆಗ್ಡೆ, ಶ್ರವಣಬೆಳಗೊಳದ ಚಾರುಕೀರ್ತಿ ಭಟ್ಟಾರಕರು ಇತರ ಸಂಸ್ಥೆಗಳು ಕೋಟಿ-ಕೋಟಿಗಳಷ್ಟು ನೆರೆ ಸಂತ್ರಸ್ತರಿಗೆ ಸಹಾಯ ನೀಡಿದ್ದಾರೆ. ಇದನ್ನು ಇತರ ಸಂಘ, ಸಂಸ್ಥೆಗಳು, ಅನುಕರಿಸಿ ಸರಕಾರಕ್ಕೆ ಕೈಜೊಡಿಸಬೇಕೆಂದು ರಾಷ್ಟ್ರಸಂತರು ಕರೆ ನೀಡಿದರು.
ಗ್ರಾಮಗಳನ್ನು ದತ್ತು ತೆಗೆದುಕೊಳ್ಳಿರಿ :
ನದಿ ನೀರಿನಲ್ಲಿ ಸಂಪೂರ್ಣ ಜೀವನ ಕಳೆದುಕೊಂಡ ಗ್ರಾಮಸ್ಥರನ್ನು ಸಂಪೂರ್ಣವಾಗಿ ಸ್ಥಳಾಂತರಿಸಲು ಉದ್ಯಮಿಗಳು, ರಾಜಕೀಯ ಮುಖಂಡರು, ಗ್ರಾಮಗಳನ್ನು ದತ್ತು ತೆಗೆದುಕೊಳ್ಳಿರಿ. ಸಮಾಜದ ವತಿಯಿಂದ ಉದ್ಯಮಿಗಳಿಗೆ ನಾನು ಕೂಡ ಈ ಮಾಹಿತಿ ನೀಡಿ, ಸ್ಪಂದಿಸುವಂತೆ ಕೇಳಿಕೊಳ್ಳುತ್ತೇನೆ ಎಂದು ರಾಷ್ಟ್ರಸಂತ ಚಿನ್ಮಯಸಾಗರ ಮಹಾರಾಜರು ಹೇಳಿದರು.
