ಕೈ ಮೇಲಿನ ಕ್ವಾರಂಟೈನ್​​​ ಸೀಲ್​ ತಕ್ಷಣವೇ ಅಳಿಸಬಹುದು: ಸೀಲ್ ಬಣ್ಣ ಕಳಪೆನಾ?

ಅಥಣಿಯಲ್ಲಿ ಹೊರಗಿನಿಂದ ಬರುವವರ ಕೈ ಮೇಲೆ ಹಾಕಿದ ಕ್ವಾರಂಟೈನ್​ ಸೀಲ್​​ ತಕ್ಷಣವೇ ಅಳಿಸಬಹುದಾಗಿದ್ದು, ತಾಲೂಕು ಆರೋಗ್ಯ ಅಧಿಕಾರಿಗಳ ವಿರುದ್ಧ ಸಾರ್ವಜನಿಕರು ಆಕ್ರೋಶ ಹೊರಹಾಕಿದ್ದಾರೆ.

ಅಥಣಿ: ತಾಲೂಕಿನ ಆಸ್ಪತ್ರೆಯಲ್ಲಿ ಎಂಥಾ ಸೀಲ್​​ ನೀಡಿದ್ದೀರಾ ಕ್ವಾರಂಟೈನ್ ಮಾಡುವ ಸೀಲ್ ಹಾಕಿದ ತಕ್ಷಣವೇ ಕೈಯಿಂದ ಅಳಿಸಬಹುದು ಎಂದು ಸಾರ್ವಜನಿಕರು ಅಥಣಿ ತಾಲೂಕು ವೈದ್ಯಾಧಿಕಾರಿ ಅವರನ್ನ ತರಾಟೆಗೆ ತೆಗೆದುಕೊಂಡಿರುವ ಘಟನೆ ತಾಲೂಕು ಆಸ್ಪತ್ರೆಯಲ್ಲಿ ನಡೆದಿದೆ.

ಕೇಂದ್ರ ಹಾಗೂ ರಾಜ್ಯ ಸರ್ಕಾರಗಳು ಹೊರ ರಾಜ್ಯಗಳಿಂದ ಜನರು ತಮ್ಮ ಊರುಗಳಿಗೆ ತೆರಳಲು ಅನುಮತಿ ನೀಡಿವೆ. ಹೊರ ರಾಜ್ಯ ಹಾಗೂ ಜಿಲ್ಲೆಗಳಿಂದ ಬಂದ ಜನರನ್ನು ತಾಲೂಕು ಆಸ್ಪತ್ರೆಯಲ್ಲಿ ಪ್ರಾಥಮಿಕ ತಪಾಸಣೆ ಒಳಪಡಿಸಿ ಅವರ ಮೇಲೆ ನಿಗಾವಹಿಸಲು ಆರೋಗ್ಯ ಇಲಾಖೆ ಸಿಬ್ಬಂದಿ ಹೋಂ ಕ್ವಾರಂಟೈನ್ ಎಂದು ಅವರ ಕೈಮೇಲೆ ಸೀಲ್ ಹಾಕುತ್ತಾರೆ.

ಆದರೆ, ಆ ಸೀಲ್​​ ಬಣ್ಣವನ್ನು ತಕ್ಷಣವೇ ಅಳಿಸಬಹುದಾಗಿದೆ. ಹೀಗಾಗಿ ಅವರು ಎಲ್ಲಿ ಬೇಕಾದರೂ ಓಡಾಟ ಮಾಡಬಹುದು, ಗೊತ್ತೇ ಆಗುವುದಿಲ್ಲ ಎಂದು ಸಾರ್ವಜನಿಕರು ಅಥಣಿ ವೈದ್ಯಾಧಿಕಾರಿ ಮುಂದೆ ವಸ್ತು ಸ್ಥಿತಿ ಮನವರಿಕೆ ಮಾಡಿದರು.