ಬೆಳಗಾವಿ ಮಹಾಮಳೆ: ಮಾರ್ಗ ಮಧ್ಯೆ ನಿಂತ ಗೋವಾ-ಮಹಾರಾಷ್ಟ್ರ ರೈಲು

ಬೆಳಗಾವಿ ಜಿಲ್ಲೆಯಲ್ಲಿ ಮಳೆಯ ಆರ್ಭಟ ಮುಂದುವರೆದಿದ್ದು, ಮಹಾ ಮಳೆಗೆ ರೈಲ್ವೇ ಹಳಿಯಲ್ಲಿ ನೀರು ನಿಂತು ಸಂಚಾರ ಸ್ಥಗಿತಗೊಂಡಿದೆ, ಪರಿಣಾಮ ಗೋವಾ ಮಹಾರಾಷ್ಟ್ರ ಸಂಪರ್ಕ ಕಲ್ಪಿಸುವ ರೈಲು ಮಾರ್ಗ ಮಧ್ಯೆ ನಿಂತಿದೆ.

ಬೆಳಗಾವಿ: ಶತಮಾನದ ಮಹಾಮಳೆ ತನ್ನ ರೌದ್ರ ನರ್ತನ ಮುಂದುವರೆಸಿದ್ದು, ಜಿಲ್ಲೆಯ ಜನರ ಜನಜೀವನ ಅಸ್ತವ್ಯಸ್ತಗೊಂಡಿದೆ. ರೈಲು ಹಳಿಯಲ್ಲಿ ನೀರು ನಿಂತು ಸಂಚಾರ ಸ್ಥಗಿತಗೊಂಡಿದೆ.

ನಗರದ ಹೊರ ವಲಯದ ಟೀಳಕವಾಡಿ ಬಳಿ ರೈಲ್ವೇ ಹಳಿ ಮೇಲೆ ರಭಸದಿಂದ ನೀರು ಹರಿಯುತ್ತಿದೆ. ಪರಿಣಾಮ ಗೋವಾ ಮಹಾರಾಷ್ಟ್ರ ಸಂಪರ್ಕ ಕಲ್ಪಿಸುವ ರೈಲು ಮುಂದೆ ಚಲಿಸಲಾಗದೆ ಐದು ಗಂಟೆಗೆಳಿಂದ ಅರ್ಧ ದಾರಿಯಲ್ಲಿ ನಿಂತುಕೊಂಡಿದೆ. ರೈಲಿನಲ್ಲಿ ನೂರಾರು ಪ್ರಯಾಣಿಕರಿದ್ದು, ಸುತ್ತ ನೀರು ತುಂಬಿರುವುದರಿಂದ ಕೆಳಗೆ ಇಳಿಯಲು ಆಗದೆ ಪರದಾಡುವಂತಾಗಿದೆ.

ಮನೆ ಕುಸಿದು ಯುವತಿ ಸಾವು:

ಜಿಲ್ಲೆಯ ಲೋಳಸುರ ಗ್ರಾಮದಲ್ಲಿ ಮನೆ ಕುಸಿದು ಯುವತಿಯೊಬ್ಬಳು ಸಾವನ್ನಪ್ಪಿದ್ದಾಳೆ. ಪದ್ಮಾವತಿ ಪಾಟೀಲ್(21)ಮೃತ ದುರ್ದೈವಿ. ಘಟಪ್ರಭಾ ನದಿ ನೀರು ನುಗ್ಗಿ ಸಂಪೂರ್ಣ ಗ್ರಾಮ ಜಲಾವೃತಗೊಂಡಿದ್ದು, ಪರಿಣಾಮ ಮನೆ ಕುಸಿದು ಯುವತಿ ಸಾವನ್ನಪ್ಪಿದ್ದಾಳೆ. ಇದುವರೆಗೆ ಜಿಲ್ಲೆಯಲ್ಲಿ ಮಳೆಯಿಂದಾಗಿ ಒಟ್ಟು ಆರು ಜನರು ಸಾವನ್ನಪ್ಪಿದ್ದಾರೆ.