ಕೊರೊನಾ ಎಫೆಕ್ಟ್: 200 ರೂ.ಗೆ 5 ಕೋಳಿ, ಖರೀದಿಗೆ ಮುಗಿಬಿದ್ದ ಜನತೆ

ದೇಶದ ಹಲವೆಡೆ ಮಹಾಮಾರಿ ಕೊರೊನಾ ವೈರಸ್ ಪ್ರಕರಣಗಳು ಕಂಡುಬರುತ್ತಿರುವುದರಿಂದ ಕುಕ್ಕುಟೋದ್ಯಮಕ್ಕೆ ದೊಡ್ಡ ನಷ್ಟವಾಗುತ್ತಿದೆ. ಹೀಗಾಗಿ ಕೋಳಿ ಫಾರಂ ಮಾಲೀಕರು ತಾವೇ ವಾಹನದಲ್ಲಿ ಕೋಳಿಗಳನ್ನು ತುಂಬಿಕೊಂಡು ಹೋಗಿ ಮಾರಾಟ ಮಾಡುವ ಅನಿವಾರ್ಯತೆ ಎದುರಾಗಿದೆ.

ಬೆಳಗಾವಿ: ದೇಶಾದ್ಯಂತ ಕೊರೊನಾ ವೈರಸ್ ಭೀತಿ ಹಿನ್ನೆಲೆಯಲ್ಲಿ ಕುಕ್ಕುಟೋದ್ಯಮಕ್ಕೆ ದೊಡ್ಡ ಹೊಡೆತ ಬಿದ್ದಿದೆ‌. ಕೋಳಿ ಫಾರಂ ಮಾಲೀಕರು ಹಳ್ಳಿಗಳಿಗೆ ತೆರಳಿ ಅತಿ ಕಡಿಮೆ ಬೆಲೆಗೆ ಕೋಳಿಗಳನ್ನು ಮಾರಾಟ ಮಾಡುತ್ತಿದ್ದಾರೆ.

ಕೊರೊನಾ ವೈರಸ್ ಪ್ರಕರಣಗಳು ಪತ್ತೆಯಾಗುತ್ತಿರುವ ಹಿನ್ನೆಲೆಯಲ್ಲಿ ಚಿಕನ್​ ಸೇವನೆಗೆ ಜನರು ಹಿಂದೇಟು ಹಾಕುತ್ತಿದ್ದಾರೆ. ಚಿಕನ್​ ತಿನ್ನುವುದರಿಂದ ವೈರಸ್​ ಹರಡುತ್ತದೆ ಎಂಬ ತಪ್ಪು ತಿಳುವಳಿಕೆಯೂ ಕೂಡ ಕುಕ್ಕುಟೋದ್ಯಮದ ನಷ್ಟಕ್ಕೆ ಕಾರಣವಾಗಿದೆ. ಚಿಕನ್​ ಖರೀದಿಯಲ್ಲಿ ಇಳಿಮುಖವಾಗುತ್ತಿರುವುದರಿಂದ ಕೋಳಿಗಳ ಮಾರಾಟದ ದರದಲ್ಲಿ ಭಾರಿ ಪ್ರಮಾಣದಲ್ಲಿ ಇಳಿಕೆ ಆಗಿದೆ. ಹೀಗಾಗಿ ಕೋಳಿ ಫಾರಂ ಮಾಲೀಕರು ಹಳ್ಳಿಗಳಿಗೆ ತೆರಳಿ ಕೋಳಿಗಳನ್ನು ಮಾರುತ್ತಿದ್ದಾರೆ.

ಬೆಳಗಾವಿ ನಗರದ ವಡಗಾಂವ್​​ನಲ್ಲಿ ಫಾರಂ ಮಾಲೀಕರು ವಾಹನದಲ್ಲಿ ಕೋಳಿಗಳನ್ನು ತಂದು ಸಾರ್ವಜನಿಕ ಸ್ಥಳಗಳಲ್ಲೇ 200ಗೇ 5 ರಂತೆ ಕೋಳಿಗಳನ್ನು ಬಿಕರಿ ಮಾಡಿದ್ದಾರೆ. ಮೈಕ್ ಮೂಲಕ ಕೂಗಿ ನೂರಕ್ಕೆ ಎರಡು, ಇನ್ನೂರಕ್ಕೆ ಐದು ಕೋಳಿ ಎನ್ನುತ್ತ ಕೋಳಿಗಳನ್ನು ಬಿಕರಿ ಮಾಡುತ್ತಿರುವ ದೃಶ್ಯ ಕಂಡುಬಂದಿದೆ. ಅತ್ಯಂತ ಕಡಿಮೆ ಬೆಲೆಗೆ ಕೋಳಿಗಳು ಮಾರಾಟ ಆಗುವುದನ್ನು ಕಂಡ ಜನರು ಖರೀದಿಗೆ ಮುಗಿಬೀಳುತ್ತಿದ್ದಾರೆ.