ಬೆಂಗಳೂರು: ಭೂ ಸ್ವಾಧೀನ ತಿದ್ದುಪಡಿ ಕಾಯ್ದೆ ಇದೀಗ ರೈತರ ಕಣ್ಣು ಕೆಂಪಾಗಿಸಿದ್ದು, ರಸ್ತೆಗಿಳಿದು ಹೋರಾಟ ನಡೆಸುತ್ತಿದ್ದಾರೆ. ಅಷ್ಟಕ್ಕೂ ಮೈತ್ರಿ ಸರ್ಕಾರ ಜಾರಿಗೆ ತರಲು ಉದ್ದೇಶಿಸಿರುವ ಈ ಭೂ ಸ್ವಾಧೀನ ತಿದ್ದುಪಡಿ ಕಾಯ್ದೆ ರೈತರ ಕೆಂಗಣ್ಣಿಗೆ ಗುರಿಯಾಗಲು ಕಾರಣವೇನು?
ಕೇಂದ್ರದಲ್ಲಿ ಯುಪಿಎ ಸರ್ಕಾರ 2014ರಲ್ಲಿ ರೈತರಿಗೆ ಅನುಕೂಲವಾಗಲೆಂದು ದುಪ್ಪಟ್ಟು ಪರಿಹಾರ ನೀಡುವ, ಜನಾಭಿಪ್ರಾಯಕ್ಕೆ ಆದ್ಯತೆ ನೀಡುವ ಭೂ ಸ್ವಾಧೀನ ಅಧಿನಿಯಮ-2013ನ್ನು ಜಾರಿಗೆ ತಂದಿತ್ತು.
ರೈತ ಸ್ನೇಹಿಯಾಗಿದ್ದ ಈ ಮೂಲ ಕಾಯ್ದೆಗೆ ತಿದ್ದುಪಡಿ ತಂದಿರುವ ಮೈತ್ರಿ ಸರ್ಕಾರ, ಫೆ. 13, 2019ರ ಬಜೆಟ್ ಅಧಿವೇಶನದಲ್ಲಿ ಯಾವುದೇ ಚರ್ಚೆಗಳಲಿಲ್ಲದೆ ಗದ್ದಲದ ನಡುವೆ 'ಭೂ ಸ್ವಾಧೀನ (ಕರ್ನಾಟಕ ತಿದ್ದುಪಡಿ) ವಿಧೇಯಕ-2019'ನ್ನು ಅಂಗೀಕರಿಸಿತ್ತು.
ಸದನದಲ್ಲಿ ಅಂಗೀಕರಿಸಿದ ತಿದ್ದುಪಡಿ ವಿಧೇಯಕವನ್ನು ಸದ್ಯ ರಾಷ್ಟ್ರಪತಿ ಅನುಮೋದನೆಗಾಗಿ ಕಳುಹಿಸಿಕೊಡಲಾಗಿದೆ. ರೈತರ ಹಿತಾಸಕ್ತಿಗೆ ಮಾರಕವಾಗಿರುವ ಈ ಭೂ ಸ್ವಾಧೀನ ತಿದ್ದುಪಡಿ ಕಾಯ್ದೆ ರೈತ ಹೋರಾಟಗಾರರನ್ನು ಬೀದಿಗಿಳಿಯುವಂತೆ ಮಾಡಿದೆ.
ತಿದ್ದುಪಡಿ ತರಲು ಸರ್ಕಾರ ಕೊಟ್ಟ ಕಾರಣ
- ಗುಜರಾತ್, ತೆಲಂಗಾಣ, ತಮಿಳುನಾಡು, ಮಹಾರಾಷ್ಟ್ರ, ಆಂಧ್ರ ಪ್ರದೇಶ ಸರ್ಕಾರಗಳು ತಮಗೆ ಅನುವಾಗುವಂತೆ ಮೂಲ ಭೂ ಸ್ವಾಧೀನ ಕಾಯ್ದೆ-2013ಕ್ಕೆ ಕೆಲ ತಿದ್ದುಪಡಿಗಳನ್ನು ತಂದಿವೆ
- ಮೂಲಭೂತ ಸೌಕರ್ಯ ಯೋಜನೆ, ರಾಷ್ಟ್ರೀಯ ಹೆದ್ದಾರಿ ಯೋಜನೆ, ಕುಡಿಯುವ ನೀರಿನ ಯೋಜನೆ, ಇತರ ಬೃಹತ್ ಯೋಜನೆಗಳ ತ್ವರಿತ ಅನುಷ್ಠಾನಕ್ಕೆ ಮೂಲ ಭೂ ಸ್ವಾಧೀನ ಕಾಯ್ದೆ ಅಡ್ಡಿ
- ರಾಜ್ಯದಲ್ಲಿ ಹಲವು ಪ್ರಮುಖ ಯೋಜನೆಗಳಿಗಾಗಿ ಭೂ ಸ್ವಾಧೀನ ಪಡಿಸಿಕೊಳ್ಳಲು ಮೂಲ ಅಧಿನಿಯಮ ತೊಂದರೆ
- ರಾಜ್ಯದಲ್ಲಿ ವಿವಿಧ ಅಭಿವೃದ್ಧಿ ಯೋಜನೆಗಳಿಗಾಗಿ ಭೂ ಸ್ವಾಧೀನಕ್ಕೆ ಅನುವಾಗಲು ಕಾಯ್ದೆಗೆ ತಿದ್ದುಪಡಿ
ಕೇಂದ್ರದ ಮೂಲ ಅಧಿನಿಯಮದಲ್ಲಿ ಏನಿದೆ?
- ಯಾವುದೇ ಯೋಜನೆಗಳ ಭೂ ಸ್ವಾಧೀನಕ್ಕಾಗಿ ಶೇ. 80ರಷ್ಟು ಜನರ ಸಮ್ಮತಿ ಅಗತ್ಯ.
- ಯೋಜನೆಯಿಂದ ಸಮುದಾಯ, ಪರಿಸರದ ಮೇಲಾಗುವ ದುಷ್ಪರಿಣಾಮದ ಪೂರ್ವಭಾವಿ ಅಂದಾಜು ಸಲ್ಲಿಸಬೇಕು.
- ಸ್ವಾಧೀನ‌ಪಡಿಸಿಕೊಂಡ ಭೂಮಿಗೆ ಮಾರುಕಟ್ಟೆ ಬೆಲೆಯ ನಾಲ್ಕು ಪಟ್ಟು ಪರಿಹಾರ ನೀಡಬೇಕು.
- ನೀರಾವರಿ ಭೂಮಿ, ಬಹು ಬೆಳೆ ಭೂಮಿ ಸ್ವಾಧೀನ ಮಾಡುವಂತಿಲ್ಲ.
- ಯೋಜನೆಗೆ ಬೇಕಾದಷ್ಟೇ ಭೂ ಸ್ವಾಧೀನ ಮಾಡಬೇಕು.
- ಐದು ವರ್ಷದೊಳಗೆ ಭೂಮಿಯನ್ನು ಅದೇ ಉದ್ದೇಶಕ್ಕೆ ಬಳಸದಿದ್ದರೆ ರೈತರಿಗೆ ಭೂಮಿ ವಾಪಸ್.
ರಾಜ್ಯ ಸರ್ಕಾರದ ತಿದ್ದುಪಡಿ ಕಾಯ್ದೆಯಲ್ಲೇನಿದೆ?
- ರಾಷ್ಟ್ರೀಯ ಭದ್ರತೆ, ಮೂಲ ಸೌಕರ್ಯ, ನೀರಾವರಿ, ಕುಡಿಯುವ ನೀರು, ಕೈಗಾರಿಕೆ, ವಸತಿ ಇತರ ಬೃಹತ್ ಯೋಜನೆಗಳಿಗೆ ಭೂ ಪರಿಹಾರ ಕಾಯ್ದೆ ಅನ್ವಯಿಸಲ್ಲ.
- ಈ ವಿನಾಯಿತಿಯಿಂದ ರೈತರಿಗೆ ಭೂ ಪರಿಹಾರವಾಗಿ ಮಾರುಕಟ್ಟೆ ಬೆಲೆಯ ದುಪ್ಪಟ್ಟು ಪರಿಹಾರ ಸಿಗುವುದಿಲ್ಲ. ಮಾರ್ಗಸೂಚಿ ದರದಲ್ಲಿ ಪರಿಹಾರ ಸಿಗಲಿದೆ.
- ಗೃಹ ಮಂಡಳಿ, ಹೆದ್ದಾರಿ, ಕೈಗಾರಿಕೆ, ವಸತಿ ಹಾಗೂ ನಿವೇಶನ ಯೋಜನೆಗಳಿಗಾಗಿ ರಾಜ್ಯದ ಆರು ವಿವಿಧ ಕಾಯ್ದೆಗಳಡಿ ಸ್ವಾಧೀನ ಪಡಿಸುವ ಭೂಮಿಗಳಿಗೆ ಕೇಂದ್ರದ ಭೂ ಸ್ವಾಧೀನ ಕಾಯ್ದೆ ಅನ್ವಯಿಸಲ್ಲ.
- ಕೇಂದ್ರದ ಕಾಯ್ದೆಯಲ್ಲಿ ಪುನರ್ವಸತಿ, ಪುನರ್ವ್ಯವಸ್ಥೆ ಕಡ್ಡಾಯವಾಗಿದ್ದರೆ, ತಿದ್ದುಪಡಿ ಕಾಯ್ದೆಯಲ್ಲಿ ಅದರ ಬದಲಿಗೆ ಭೂಮಿ ಕಳೆದುಕೊಂಡವರಿಗೆ ಸರ್ಕಾರ ನಿರ್ಧರಿಸುವ ಇಡುಗಂಟು (ಇಂತಿಷ್ಟು ಮೊತ್ತ) ಪಾವತಿಸಬಹುದಾಗಿದೆ.
- ಭೂಮಿಯನ್ನು ಐದು ವರ್ಷದೊಳಗೆ ಬಳಸದಿದ್ದರೆ ಭೂ ಮಾಲೀಕನಿಗೆ ವಾಪಾಸು ಕೊಡುವ ನಿಯಮಕ್ಕೆ ತಿದ್ದುಪಡಿ. ಯೋಜನೆ ಜಾರಿಗೆ ನಿರ್ದಿಷ್ಟಪಡಿಸಿದ ಅವಧಿ ಎಂದು ಮಾರ್ಪಾಡು.
- ಭೂ ಸ್ವಾಧೀನ ಪ್ರಕ್ರಿಯೆಯಲ್ಲಿ ಜಿಲ್ಲಾಧಿಕಾರಿಗೆ ಹೆಚ್ಚಿನ ಅಧಿಕಾರ.
