ಬೆಂಗಳೂರು: ಬಿಎಂಟಿಸಿ ನಿಗಮದ ಪರಿಸ್ಥಿತಿ ಸದ್ಯ 'ಬಿಸಿ ತುಪ್ಪ ನುಂಗುವ ಹಾಗೂ ಇಲ್ಲ, ಉಗುಳುವ ಹಾಗೂ ಇಲ್ಲ' ಎಂಬಂತಾಗಿದೆ. ಕೋಟಿ ಕೋಟಿ ರೂ ತೆತ್ತು ಖರೀದಿ ಮಾಡಿರುವ ಬಸ್ಗಳಿಂದ ನಿಗಮಕ್ಕೆ ನಯಾಪೈಸೆ ಲಾಭ ಬರುತ್ತಿಲ್ಲವಂತೆ. ಹಾಗಂತ ಬಸ್ ಓಡಿಸಿಲ್ಲ ಅಂದ್ರೆ ಜನರ ಕೋಪಕ್ಕೂ ಗುರಿಯಾಗಬೇಕಾದ ಪರಿಸ್ಥಿತಿ ಇದೆ.
ವೋಲ್ವೋ ಬಸ್ ಪ್ರಯಾಣಿಕರನ್ನು ಸೆಳೆಯಲು ಎಷ್ಟೇ ಕಸರತ್ತು ಮಾಡುತ್ತಿದ್ದರೂ ಪ್ರಯೋಜವಾಗಿಲ್ಲ. ಹೀಗಾಗಿ ನಿಗಮಕ್ಕೆ ಈ ಐಷಾರಾಮಿ ಬಸ್ಗಳ ಸಹವಾಸ ಸಾಕು ಅನ್ನಿಸಿಬಿಟ್ಟಿದೆ. ಇವುಗಳ ನಿರ್ವಹಣೆ ನಿಗಮಕ್ಕೆ ತಲೆನೋವು ತಂದಿದ್ದು, ಪ್ರತಿ ವರ್ಷ ಕೋಟಿ ಕೋಟಿ ರೂ ಹೊರೆ ಬೀಳುತ್ತಿದೆ.
ಆರ್.ಅಶೋಕ್ ಸಾರಿಗೆ ಸಚಿವರಾಗಿದ್ದ ಕಾಲಾವಧಿಯಲ್ಲಿ ಬಿಎಂಟಿಸಿಗೆ 840 ಐಷಾರಾಮಿ ಬಸ್ಗಳು ಸೇರ್ಪಡೆಯಾದ್ದವು. ಪ್ರತಿ ವರ್ಷ ಈ ವೋಲ್ವೋ ಬಸ್ ಕಾರ್ಯಾಚರಣೆಯಿಂದ 80 ರಿಂದ 90 ಕೋಟಿ ರೂ ನಷ್ಟವಾಗಿದೆ. ಪ್ರತಿ ಕಿಮೀ ಮೀಟರ್ ಕಾರ್ಯಾಚರಣೆಯಿಂದ 70 ರೂ ಆದಾಯ ಬರುತ್ತಿದೆ. ಆದರೆ ಕಾರ್ಯಾಚರಣೆ ವೆಚ್ಚವೇ 85 ರೂ ಬರುತ್ತಿದೆ. ಆದರೆ, ಕಳೆದೆರಡು ವರ್ಷದಿಂದ ಕೋವಿಡ್ ಕಾರಣದಿಂದ ಮೂಲೆ ಸೇರಿದ್ದ ಈ ಬಸ್ಗಳು ನೂರಾರು ಕೋಟಿ ನಷ್ಟ ಉಂಟು ಮಾಡಿವೆ. ಬಿಎಂಟಿಸಿ ನೀಡಿರುವ ಅಂಕಿ ಅಂಶಗಳ ಪ್ರಕಾರ, 2020-21 ರಲ್ಲಿ 281 ಕೋಟಿ ಹಾಗೂ 2021- 22 ರ ಸಾಲಿನಲ್ಲಿ 268 ಕೋಟಿ ನಷ್ಟವಾಗಿದೆ.
ಪ್ರತಿ ವರ್ಷ ಬಿಎಂಟಿಸಿಗೆ ಆಗಿರುವ ನಷ್ಟದ ವಿವರ ಹೀಗಿದೆ..:
- 2015-2016-40 ಕೋಟಿ
- 2016-2017-45 ಕೋಟಿ
- 2017-2018-50 ಕೋಟಿ
- 2018-2019-90 ಕೋಟಿ
- 2020-2021-281 ಕೋಟಿ
- 2021-2022-268 ಕೋಟಿ
ಪ್ರಸ್ತುತ ವೋಲ್ವೋ ಬಸ್ಗಳು ನಗರದಲ್ಲಿ ಏರ್ ಪೋರ್ಟ್, ಕಾಡುಗೋಡಿ, ಬನ್ನೇರುಘಟ್ಟ ಸೇರಿದಂತೆ ಆಯ್ದ ಮಾರ್ಗಗಳಲ್ಲಿ ಸಂಚರಿಸುತ್ತಿವೆ. ವಿಮಾನ ನಿಲ್ದಾಣ ಹಾಗೂ ಐಟಿ ಬಿಟಿ ಪ್ರದೇಶಗಳಿಗೆ ಪ್ರಯಾಣಿಸುವ ಪ್ರಯಾಣಿಕರಿಂದ ಬಸ್ಗಳಿಗೆ ಉತ್ತಮ ಪ್ರತಿಕ್ರಿಯೆ ವ್ಯಕ್ತವಾಗುತ್ತಿದೆ. ಆದರೆ ಆದಾಯಕ್ಕಿಂತ ಕಾರ್ಯಾಚರಣೆ ವೆಚ್ಚವೇ ಅಧಿಕ. ಆದರೂ ಪ್ರಯಾಣಿಕರಿಗೆ ತೊಂದರೆಯಾಗದಂತೆ ವೋಲ್ವೋ ಸೇವೆ ಕಲ್ಪಿಸಲಾಗುತ್ತಿದೆ.
ಇದನ್ನೂ ಓದಿ: ರಾಜ್ಯದಲ್ಲಿ ಅನಾವಶ್ಯಕ ಕೋವಿಡ್ ನಿರ್ಬಂಧ ಇಲ್ಲ: ಸಿಎಂ ಬೊಮ್ಮಾಯಿ
ಕೊರೊನಾ ಮಹಾಮಾರಿಯಿಂದಾಗಿ 2020 ಮಾರ್ಚ್ ತಿಂಗಳಿಂದ ಈವರೆಗೆ ಸಾರಿಗೆ ಸಂಸ್ಥೆಗೆ ಸಾಕಷ್ಟು ನಷ್ಟವಾಗಿದೆ. ಸಾಂಕ್ರಾಮಿಕ ರೋಗದ ಹಿನ್ನೆಲೆ ಎಸಿ ಬಸ್ಗಳನ್ನು ರಸ್ತೆ ಇಳಿಸಿಲ್ಲ ಜೊತೆಗೆ ಬಸ್ ಆರಂಭಿಸಿದ್ರೂ ಪ್ರಯಾಣಿಕರು ಈ ಬಸ್ಗಳಲ್ಲಿ ಸಂಚರಿಸುತ್ತಿಲ್ಲ. ಇದೀಗ ಬೇಸಿಗೆ ಹಿನ್ನೆಲೆಯಲ್ಲಿ ದರದಲ್ಲಿ ಕಡಿತಗೊಳಿಸಿ ಕೆಲ ಎಸಿ ಬಸ್ಸುಗಳನ್ನು ರಸ್ತೆಗೆ ಇಳಿಸಿದ್ದೇವೆ ಎಂದು ಬಿಎಂಟಿಸಿ ಉಪಾಧ್ಯಕ್ಷ ಎಂ.ಆರ್.ವೆಂಕಟೇಶ್ ತಿಳಿಸಿದ್ದಾರೆ.
ಒಟ್ಟಿನಲ್ಲಿ ವೋಲ್ವೋ ಬಸ್ಗಳ ನಿರ್ವಹಣೆ ವೆಚ್ಚ ಅಧಿಕವಾಗಿರುತ್ತಿದೆ. ಅಲ್ಲದೆ ಈ ಬಸ್ಗಳ ಮೈಲೇಜ್ ಕೂಡ ಕಡಿಮೆ ಇದೆ. ಹಾಗಾಗಿ ಲಾಭ ತರೋಕೆ ಆಗ್ತಿಲ್ಲ. ಇದು ಅಧಿಕಾರಿಗಳಿಗೆ ಇನ್ನಷ್ಟು ಸಂಕಷ್ಟ ತಂದಿದ್ದು, ವೋಲ್ವೋ ಯಾಕಪ್ಪ ಖರೀದಿ ಮಾಡಿದ್ವಿ ಅನ್ನೋ ಸ್ಥಿತಿ ನಿರ್ಮಾಣವಾಗಿದೆ.
