ಹಣ ಪಡೆದು ಕೊರೊನಾ ನೆಗೆಟಿವ್ ವರ​ದಿ ನೀಡ್ತಿದ್ದ ಇಬ್ಬರು ಆರೋಪಿಗಳನ್ನ ಬಂಧಿಸಿದ ಸಿಸಿಬಿ

ಆಧಾರ್ ಕಾರ್ಡ್ ಹಾಗೂ ಹಣ ಪಡೆದು ನೆಗೆಟಿವ್ ವರದಿ ನೀಡುವ ಬಗ್ಗೆ ಖಚಿತ ಮಾಹಿತಿ ಮೇರೆಗೆ ಸಿಸಿಬಿ ವಿಶೇಷ ತನಿಖಾ ತಂಡ ಕಾರ್ಯಾಚರಣೆ ನಡೆಸಿ ಇಬ್ಬರನ್ನು ಬಲೆಗೆ ಬೀಳಿಸಿದೆ..

ಬೆಂಗಳೂರು : ಜನರಿಂದ ಹಣ ಪಡೆದು ಯಾವುದೇ ಸ್ವ್ಯಾಬ್ ಟೆಸ್ಟ್​ ಪಡೆಯದೇ ಕೊರೊನಾ ನೆಗೆಟಿವ್ ವರದಿ ನೀಡುತ್ತಿದ್ದ ಇಬ್ಬರು ಆರೋಪಿಗಳನ್ನು ಸಿಸಿಬಿಯ ವಿಶೇಷ ದಳ ಅಧಿಕಾರಿಗಳು ಬಂಧಿಸಿದ್ದಾರೆ.

ರಾಜಸ್ಥಾನ ಮೂಲದ ಮುಕೇಶ್ ಸಿಂಗ್, ಸ್ಥಳೀಯ ನಿವಾಸಿ ನಾಗರಾಜ್ ಬಂಧಿತ ಆರೋಪಿಗಳಾಗಿದ್ದು, ಇವರಿಂದ ಎರಡು ಫೋನ್ ಹಾಗೂ ಐದು ನೆಗೆಟಿವ್ ಇರುವ ಆರ್​ಟಿಪಿಸಿಆರ್ ವರದಿಗಳನ್ನು ವಶಕ್ಕೆ ಪಡೆದುಕೊಳ್ಳಲಾಗಿದೆ‌.

ಸಿಸಿಬಿ ಪೊಲೀಸರಿಂದ ಇಬ್ಬರು ಆರೋಪಿಗಳ ಬಂಧನ

ದೊಮ್ಮಸಂದ್ರ ಪ್ರಾಥಮಿಕ ಆರೋಗ್ಯ ಕೇಂದ್ರದಲ್ಲಿ ಕೆಲಸ ಮಾಡುತ್ತಿದ್ದ ಆರೋಪಿಗಳು ನೆಗೆಟಿವ್ ವರದಿ ಬೇಕಾದವರಿಂದ 700 ರೂ. ಹಣ ಪಡೆಯುತ್ತಿದ್ದರು. ಹಣ ಪಡೆದವರಿಂದ ಯಾವುದೇ ರೀತಿ ಸ್ವ್ಯಾಬ್​ ಸಂಗ್ರಹಿಸುತ್ತಿರಲಿಲ್ಲ. ಆರ್​ಟಿಪಿಸಿಆರ್ ನೆಗೆಟಿವ್ ಎಂದು ವರದಿ ನೀಡುತ್ತಿದ್ದರು.

ಆಧಾರ್ ಕಾರ್ಡ್ ಹಾಗೂ ಹಣ ಪಡೆದು ನೆಗೆಟಿವ್ ವರದಿ ನೀಡುವ ಬಗ್ಗೆ ಖಚಿತ ಮಾಹಿತಿ ಮೇರೆಗೆ ಸಿಸಿಬಿ ವಿಶೇಷ ತನಿಖಾ ತಂಡ ಕಾರ್ಯಾಚರಣೆ ನಡೆಸಿ ಇಬ್ಬರನ್ನು ಬಲೆಗೆ ಬೀಳಿಸಿದೆ.

ಈ ಕೃತ್ಯದಲ್ಲಿ ಇನ್ನಿತರರು ಭಾಗಿಯಾಗಿದ್ದಾರೆ ಎಂಬುದರ ಬಗ್ಗೆ ಸಿಸಿಬಿ ತನಿಖೆ ನಡೆಸುತ್ತಿದೆ. ಸದ್ಯ ಇಬ್ಬರು ಆರೋಪಿಗಳನ್ನು ವರ್ತೂರು ಪೊಲೀಸರಿಗೆ ಒಪ್ಪಿಸಲಾಗಿದ್ದು, ತನಿಖೆ ಮುಂದುವರಿದಿದೆ.