ಬೆಂಗಳೂರು: ರೌಡಿಶೀಟರ್ ಒಬ್ಬ ಜೈಲಿನಲ್ಲೇ ಕುಳಿತು ತನ್ನ ಎದುರಾಳಿಯ ಹತ್ಯೆಗೆ ಸಂಚು ಹಾಕಿರುವ ಘಟನೆ ಬೆಳಕಿಗೆ ಬಂದಿದೆ. ಪ್ರಕರಣವೊಂದಕ್ಕೆ ಸಂಬಂಧಿಸಿದಂತೆ ಸಾಕ್ಷ್ಯ ಹೇಳುತ್ತಾನೆ ಎಂದು ನಾರಾಯಣಸ್ವಾಮಿ ಎಂಬುವರ ಹತ್ಯೆಗೆ ರೌಡಿಶೀಟರ್ ಸುಂದರೇಶ್ ಜೈಲಿಂದಲೇ ಯೋಜನೆ ರೂಪಿಸಿದ್ದ.
ನಾರಾಯಣಸ್ವಾಮಿಯನ್ನು ಹತ್ಯೆ ಮಾಡಲು ಸುಂದರೇಶ್ನ ಸಹಚರರಾದ ಮುನಿರಾಜು ಮತ್ತು ವೆಂಕಟೇಶ ಅಲಿಯಾಸ್ ಚಿಕ್ಕ ಹೊಸಕೋಟೆಯ ತಂಡ ಡೀಲ್ ಕೂಡಾ ಒಪ್ಪಿಕೊಂಡಿದ್ದರು ಎಂದು ತಿಳಿದುಬಂದಿದೆ.
ಪ್ರಕರಣದ ಹಿನ್ನೆಲೆ:
ಜುಲೈ 31 ರಂದು ಬೈಯ್ಯಪ್ಪನಹಳ್ಳಿಯ ಸುರಂಜನಾದಾಸ್ ರಸ್ತೆಯಲ್ಲಿ ವಾಯುವಿಹಾರಕ್ಕೆ ತೆರಳಿದ್ದ ನಾರಾಯಣಸ್ವಾಮಿ ಎಂಬುವರ ಮೇಲೆ ಮಾರಣಾಂತಿಕ ಹಲ್ಲೆ ನಡೆದಿತ್ತು. ಈ ವೇಳೆ ಬೈಕ್ನಲ್ಲಿ ಬಂದ ದುಷ್ಕರ್ಮಿಗಳು ಕೊಲೆ ಯತ್ನ ನಡೆಸಿದ್ದರು.
ದುಷ್ಕರ್ಮಿಗಳು ಲಾಂಗ್ನಿಂದ ಹಲ್ಲೆ ಮಾಡಲು ಪ್ರಯತ್ನಿಸಿದಾಗ ರಸ್ತೆ ವಿಭಜಕ ದಾಟಿ ನಾರಾಯಣಸ್ವಾಮಿ ಜೀವ ಉಳಿಸಿಕೊಂಡಿದ್ದರು. ಈ ಕುರಿತ ದೃಶ್ಯ ಸಿಸಿಟಿವಿಯಲ್ಲಿ ಸೆರೆಯಾಗಿತ್ತು. ಪ್ರಕರಣ ದಾಖಲಿಸಿಕೊಂಡಿದ್ದ ಬೈಯಪ್ಪನಹಳ್ಳಿ ಪೊಲೀಸರು ಇಬ್ಬರು ಆರೋಪಿಗಳಾದ ಮುನಿರಾಜು ಮತ್ತು ವೆಂಕಟೇಶ್ ಎಂಬುವರನ್ನು ಬಂಧಿಸಿದ್ದಾರೆ.
ಆರೋಪಿಗಳನ್ನು ತೀವ್ರ ವಿಚಾರಣೆಗೆ ಒಳಪಡಿಸಿದಾಗ ಪ್ರಕರಣದ ಸತ್ಯಾಂಶ ಗೊತ್ತಾಗಿದೆ. ಜೈಲಿನಲ್ಲಿದ್ದುಕೊಂಡೇ ರೌಡಿ ಸುಂದರೇಶ್, ನಾರಾಯಣಸ್ವಾಮಿ ಹತ್ಯೆಗೆ ಸುಪಾರಿ ನೀಡಿದ್ದ ಎಂದು ತಿಳಿದುಬಂದಿದೆ. ಪ್ರಕರಣಕ್ಕೆ ಸಂಬಂಧಿಸದಂತೆ ಸುಂದರೇಶ್ನನ್ನು ಬಾಡಿವಾರೆಂಟ್ ಮೂಲಕ ಬೈಯ್ಯಪ್ಪನಹಳ್ಳಿ ಪೊಲೀಸರು ಕರೆತಂದು ವಿಚಾರಣೆ ನಡೆಸಿದ್ದಾರೆ. ಈ ವೇಳೆ ಕೊಲೆ ಯತ್ನದ ಕುರಿತು ಸುಂದರೇಶ್ ಬಾಯ್ಬಿಟ್ಟಿದ್ದಾನೆ.
2017ರಲ್ಲಿ ನಾಗಾವಾರಪಾಳ್ಯದ ಬಳಿ ಶಿವಕುಮಾರ್ ಎಂಬಾತನನ್ನು ಸುಂದರೇಶ್ ಸಹಚರರು ಕೊಲೆ ಮಾಡಿದ್ದರು. ಕೊಲೆಯಾದ ಶಿವಕುಮಾರ್ ನಾರಾಯಣಸ್ವಾಮಿಯ ಮೈದುನ. ಈ ಕಾರಣಕ್ಕೆ ಕೊಲೆ ಸಂಬಂಧ ಸಾಕ್ಷಿ ಹೇಳುವುದಾಗಿ ನಾರಾಯಣಸ್ವಾಮಿ ಕೋರ್ಟ್ ಮೆಟ್ಟಿಲೇರಿದ್ದರು. ನಾರಾಯಣಸ್ವಾಮಿ ಸಾಕ್ಷಿ ಹೇಳುತ್ತಾರೆ ಎನ್ನುವ ಕಾರಣಕ್ಕೆ ಇದೀಗ ಕೊಲೆಗೆ ಸ್ಕೆಚ್ ಹಾಕಿದ್ದ. ಈ ಕೊಲೆ ಯತ್ನ ಪ್ರಕರಣಕ್ಕೆ ಸಂಬಂಧಿಸಿದಂತೆ ಇನ್ನೂ ಇಬ್ಬರು ಆರೋಪಿಗಳು ತಲೆಮರೆಸಿಕೊಂಡಿದ್ದಾರೆ ಎಂದು ಪೊಲೀಸರು ತಿಳಿಸಿದ್ದಾರೆ.
