ವರ್ಗಾವಣೆಯಾದರೂ ಕುರ್ಚಿ ಬಿಡದ ಇನ್ಸ್​ಪೆಕ್ಟರ್​: ಅಧಿಕಾರಿಗಳ ನಡುವೆ ಹೈಡ್ರಾಮಾ

ಎಸ್.ಎಸ್.ಮಂಜು ಜಾಗಕ್ಕೆ ಶಿವಕುಮಾರ್ ಮುಚ್ಚಂಗಿ ವರ್ಗಾವಣೆ ಆಗಿದ್ದಾರೆ. ಇನ್ಸ್​​​ಪೆಕ್ಟರ್​ ಮಂಜು ಅವರನ್ನು ಸಿಐಡಿಗೆ ವರ್ಗಾವಣೆ ಮಾಡಲಾಗಿದೆ. ಆದರೆ ಸ್ಟೇಷನ್ ಬಿಟ್ಟು ಕೊಡಲು ಎಸ್.ಎಸ್ ಮಂಜು ಈಗಲೂ ನಿರಾಕರಿಸುತ್ತಿದ್ದು ಜಗಳ ಮೇಲಾಧಿಕಾರಿಗಳಿಗೂ ತಲೆನೋವಾಗಿ ಪರಿಣಮಿಸಿದೆ.

ಬೆಂಗಳೂರು: ಬೇಗೂರು ಪೊಲೀಸ್ ಠಾಣೆಯಲ್ಲಿ ನಿನ್ನೆ ಸಂಜೆಯಿಂದ ಫುಲ್ ಹೈಡ್ರಾಮಾ ನಡೆಯುತ್ತಿದ್ದು, ಠಾಣೆಯ ಇನ್ಸ್​​​ಪೆಕ್ಟರ್​ ಪೋಸ್ಟ್​​ಗೆ ಇಬ್ಬರ ನಡುವೆ ಕಿತ್ತಾಟ ಮುಂದುವರಿದಿದೆ.

ಇನ್ಸ್​​ಪೆಕ್ಟರ್​​ ಮಂಜು ಎಸ್.ಎಸ್ ಹಾಗೂ ಶಿವಕುಮಾರ್ ನಡುವೆ ಕಿತ್ತಾಟ ನಡೆಯುತ್ತಿದ್ದು. ಮೂರು ದಿನಗಳ ಹಿಂದೆ ಇನ್ಸ್​​ಪೆಕ್ಟರ್​​​ಗಳ ವರ್ಗಾವಣೆ ಮಾಡಿ ಇಲಾಖೆ ಆದೇಶ ಹೊರಡಿಸಿತ್ತು.

ಎಸ್.ಎಸ್ ಮಂಜು ಜಾಗಕ್ಕೆ ಶಿವಕುಮಾರ್ ಮುಚ್ಚಂಗಿ ವರ್ಗಾವಣೆ ಆಗಿದ್ದಾರೆ. ಇನ್ಸ್​​​ಪೆಕ್ಟರ್​ ಮಂಜು ಅವರನ್ನು ಸಿಐಡಿಗೆ ವರ್ಗಾವಣೆ ಮಾಡಲಾಗಿದೆ. ಆದರೆ ಸ್ಟೇಷನ್ ಬಿಟ್ಟು ಕೊಡಲು ಎಸ್.ಎಸ್ ಮಂಜು ಈಗಲೂ ನಿರಾಕರಿಸುತ್ತಿದ್ದು ಜಗಳ ಮೇಲಾಧಿಕಾರಿಗಳಿಗೂ ತಲೆನೋವಾಗಿ ಪರಿಣಮಿಸಿದೆ.

ಸೋಮವಾರ ಸಂಜೆ 6 ಗಂಟೆಗೆ ಚಾರ್ಜ್​​​ಗಾಗಿ ಹೋಗಿದ್ದ ಶಿವಕುಮಾರ್​​ಗೆ ಅಧಿಕಾರ ಹಸ್ತಾಂತರಿಸದೆ ಎಸ್.ಎಸ್ ಮಂಜು ಠಾಣೆಯಿಂದ ಹೊರನಡೆದಿದ್ದರು. ಸ್ಟೇಷನ್ ಪ್ರಮುಖ ವಸ್ತುಗಳಾದ ಡೈರಿ ಹಾಗೂ ಜೀಪ್ ಸಮೇತ ತೆರಳಿದ್ದರು.

ಠಾಣೆಗೆ ಬಂದ ಹೊಸ ಇನ್ಸ್​ಪೆಕ್ಟರ್​​ ರಾತ್ರಿವರೆಗೂ ಕಾದು ಕುಳಿತಿದ್ದರೂ ಚಾರ್ಜ್ ಕೊಟ್ಟಿರಲಿಲ್ಲ, ಇಂದೂ ಸಹ ಸಿಬ್ಬಂದಿ ಬಳಿ ಡೈರಿ ನೀಡಲು ಕೋರಿಕೆ ಮಾಡಿದರೂ ಇನ್ಸ್​​ಪೆಕ್ಟರ್​​ ಎಸ್​​​​.ಎಸ್ ಮಂಜು ಮಾತ್ರ ಡೈರಿ ನೀಡಿಲ್ಲ.

ಇದೀಗ ಈ ಇನ್ಸ್​ಪೆಕ್ಟರ್ ಗಲಾಟೆಯ ಹಿಂದೆ ಸ್ಥಳೀಯ ಶಾಸಕರ ಪ್ರತಿಷ್ಠೆಯ ಕಾರಣ ಅಡಗಿದೆ ಎನ್ನಲಾಗುತ್ತಿದೆ. ಈ ನಡುವೆ ಆಗ್ನೇಯ ವಿಭಾಗದ ಡಿಸಿಪಿ ಶ್ರೀನಾಥ್ ಜೋಶಿ ಎರಡು ದಿನ ರಜೆಯಲ್ಲಿದ್ದು ಇನ್ನೂ ಪರಿಸ್ಥಿತಿ ಬಿಗಡಾಯಿಸಿದೆ.

ಇನ್ಸ್​​ಪೆಕ್ಟರ್​ಗಳ ವರ್ಗಾವಣೆಯ ಹಿಂದೆ ರಾಜಕೀಯ ಕೈವಾಡವಿಲ್ಲ ಎಂದು ಇಲಾಖೆ ಇದಕ್ಕೂ ಮೊದಲೇ ಸ್ಪಷ್ಟನೆ ನೀಡಿತ್ತು. ಆದರೆ ಇದೀಗ ಇನ್ಸ್​​​ಪೆಕ್ಟರ್​ ವರ್ಗಾವಣೆಯಲ್ಲಿ ಮತ್ತೆ ರಾಜಕೀಯ ನಡೆಯುತ್ತಿರುವುದು ವಿಪರ್ಯಾಸವಾಗಿದೆ.

ಇದನ್ನೂ ಓದಿ: ನೂತನ ಸಚಿವರಿಗೆ ಖಾತೆ ಹಂಚಿಕೆ ಸರ್ಕಸ್: ರಾತ್ರಿ ಹಿರಿಯ ಸಚಿವರೊಂದಿಗೆ ಸಿಎಂ‌ ಸಭೆ?