ಬೆಂಗಳೂರು: ಸಿಲಿಕಾನ್‌ ಸಿಟಿ ಬೆಂಗಳೂರಲ್ಲಿ ಒಂದು ಕಡೆಯಿಂದ ಮತ್ತೊಂದು ಕಡೆಗೆ ಹೋಗಬೇಕು ಅಂದರೆ ಟ್ರಾಫಿಕ್ನಲ್ಲೇ ಅರ್ಧ ದಿನ ಕಳೆದು ಹೋಗುತ್ತೆ. ಇನ್ನು ಏರ್ಪೋರ್ಟ್ ಹೋಗುವವರ ಗೋಳು ಕೇಳೋದೇ ಬೇಡ. ಆದರೆ ಇನ್ನು ಮುಂದೆ ಈ ಜಂಜಾಟ ಇರೋದಿಲ್ಲ. ಏರ್ಪೋರ್ಟ್ಗೆ ಹೋಗಬೇಕೆಂದರೆ ಕಡಿಮೆ ಸಮಯದಲ್ಲಿ, ಕಡಿಮೆ ವೆಚ್ಚದಲ್ಲಿ ಆರಾಮವಾಗಿ ಪ್ರಯಾಣ ಮಾಡಬಹುದು.
ಕೆಂಪೇಗೌಡ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ಕೆಲಸ ನಿರ್ವಹಿಸುವ 28 ಸಾವಿರ ಸಿಬ್ಬಂದಿಗೆ ಅನುಕೂಲವಾಗಲು ಜನವರಿ 4ರಿಂದ ಏರ್ಪೋರ್ಟ್ಗೆ ಹೆಚ್ಚು ರೈಲು ಸೇವೆಯನ್ನು ರೈಲ್ವೆ ಇಲಾಖೆ ಒದಗಿಸಿದೆ. ಕ್ರಾಂತಿವೀರ ಸಂಗೊಳ್ಳಿ ರಾಯಣ್ಣ ರೈಲು ನಿಲ್ದಾಣದಿಂದ 12 ಡೀಸೆಲ್ ಇಂಜಿನ್ ರೈಲು (ಡೆಮೊ), 30 ಎಲೆಕ್ಟ್ರಿಕಲ್ ಇಂಜಿನ್ ರೈಲು(ಮೆಮೊ)ಗಳು ಏರ್ಪೋರ್ಟ್ ಮಾರ್ಗವಾಗಿ ಸಂಚರಿಸಲಿವೆ. ಇದರ ಜತೆಗೆ ಇನ್ನೂ ಎರಡು ರೈಲುಗಳು ಸಂಚಾರ ನಡೆಸಲಿವೆ. ಯಶವಂತಪುರ ರೈಲು ನಿಲ್ದಾಣದಿಂದ ಬಂಗಾರಪೇಟೆಗೆ ಡೆಮೊ ರೈಲು ಸಂಚರಿಸಲಿದೆ.
ಇದನ್ನೂ ಓದಿ : ಅವತಾರ್ ತಂತ್ರಾಂಶದ ಮೂಲಕ ಏರ್ಪೋರ್ಟ್ಗೆ ಬಿಎಂಟಿಸಿ ಮುಂಗಡ ಬುಕ್ಕಿಂಗ್ ವ್ಯವಸ್ಥೆ
ಈ ರೈಲು ಯಶವಂತಪುರದಿಂದ ಬೆಳಗ್ಗೆ 8.30 ಹೊರಟು ಏರ್ಪೋರ್ಟ್ ರೈಲು ನಿಲ್ದಾಣಕ್ಕೆ 9.16ಕ್ಕೆ ತಲುಪಲಿದೆ. ಮರಳಿ ಬಂಗಾರಪೇಟೆಯಿಂದ ಸಂಜೆ 4ಕ್ಕೆ ಹೊರಟು ಏರ್ಪೋರ್ಟ್ ರೈಲು ನಿಲ್ದಾಣಕ್ಕೆ 6.42ಕ್ಕೆ ಬರಲಿದೆ. ಬೆಂಗಳೂರು ಕಂಟೋನ್ಮೆಂಟ್ ರೈಲು ನಿಲ್ದಾಣದಿಂದ ಮತ್ತೊಂದು ಡೆಮೊ ರೈಲು ಸಂಚರಿಸಲಿದ್ದು, ಇದು ಸಂಜೆ 5.55ಕ್ಕೆ ಹೊರಟು 6.50ಕ್ಕೆ ಏರ್ಪೋರ್ಟ್ ತಲುಪಲಿದೆ. ಬಂಗಾರಪೇಟೆಯಿಂದ ಯಶವಂತಪುರಕ್ಕೆ ಬರುವ ಡೆಮೊ ರೈಲು ಬಂಗಾರಪೇಟೆಯಲ್ಲಿ 5.30ಕ್ಕೆ ಹೊರಟು ಏರ್ಪೋರ್ಟ್ಗೆ 8.25ಕ್ಕೆ ಬರಲಿದೆ. ಅಲ್ಲಿಂದ 9.25ಕ್ಕೆ ಯಶವಂತಪುರ ರೈಲು ನಿಲ್ದಾಣಕ್ಕೆ ತಲುಪಲಿದೆ. ಸಾಮಾನ್ಯ ರೈಲು ದರ 10 ರೂ. ಆಗಿದ್ದು, ಎಕ್ಸ್ಪ್ರೆಸ್ ರೈಲು ದರ 30 ರೂ. ಇದೆ.
