ಬೆಂಗಳೂರು: ಸರ್ಕಾರಿ ನೌಕಕರಿಗೆ ಸಿಹಿ ಸುದ್ದಿ ಸಿಕ್ಕಿದೆ. 2019-2020ನೇ ಸಾಲಿನ ವರ್ಗಾವಣೆ ಮಿತಿಯನ್ನು ಮೈತ್ರಿ ಸರ್ಕಾರ ಶೇ. 6 ಕ್ಕೆ ಏರಿಸಿ ಮರು ಆದೇಶ ಹೊರಡಿಸಿದೆ.
ಈ ಸಂಬಂಧ ಆದೇಶ ಹೊರಡಿಸಿರುವ ರಾಜ್ಯ ಸರ್ಕಾರ, 2019-20ನೇ ಸಾಲಿನಲ್ಲಿ ಸಂಬಂಧಿತ ವೃಂದದ ಸಂಖ್ಯಾಬಲದ ಶೇ. 6ರಷ್ಟು ಸೀಮಿತಗೊಳಿಸಿ ವರ್ಗಾವಣೆ ಮಾಡುವಂತೆ ನಿರ್ದೇಶನ ನೀಡಿದೆ.
ಜೊತೆಗೆ 2019-20ನೇ ಸಾಲಿನ ಸಾರ್ವತ್ರಿಕ ವರ್ಗಾವಣೆಗಳನ್ನು ಜೂನ್ 30 ರೊಳಗೆ ಪೂರ್ಣಗೊಳಿಸುವಂತೆ ಆದೇಶ ನೀಡಿದೆ. ಈ ಮುಂಚೆ ವರ್ಗಾವಣೆ ಮಿತಿಯನ್ನು ಶೇ.2ಕ್ಕೆ ಮಿತಿಗೊಳಿಸಿ ಆದೇಶ ಹೊರಡಿಸಲಾಗಿತ್ತು. ಆದರೆ ಎರಡು ಶೇ. ಮಿತಿ ಅಲ್ಪ ಪ್ರಮಾಣವಾಗಿರುವ ಹಿನ್ನೆಲೆ ಮರುಪರಿಶೀಲಿಸುವಂತೆ ಒತ್ತಡ ಬಂದಿತ್ತು. ಇದೀಗ ವರ್ಗಾವಣೆ ಮಿತಿಯನ್ನು ಶೇ. 6ಕ್ಕೆ ಏರಿಕೆಗೊಳಿಸಿ ಸರ್ಕಾರ ಮರು ಆದೇಶ ಹೊರಡಿಸಿದೆ.
ಕಳೆದ ವರ್ಷ ದೋಸ್ತಿ ಸರ್ಕಾರ ವರ್ಗಾವಣೆ ಮಿತಿಯನ್ನು ಶೇ. 4ಕ್ಕೆ ಮಿತಿಗೊಳಿಸಿತ್ತು. ಆದರೂ ಹಲವು ಇಲಾಖೆಗಳಲ್ಲಿ ತಮ್ಮ ಒಟ್ಟು ಸಿಬ್ಬಂದಿ ಸಂಖ್ಯಾ ಬಲದ ಶೇ.4ರ ಮಿತಿಯನ್ನು ಮೀರಿ ವರ್ಗಾವಣೆ ನಡೆಸಲಾಗಿತ್ತು. ಈ ಹಿನ್ನೆಲೆಯಲ್ಲಿ ಸರ್ಕಾರದ ಮುಖ್ಯ ಕಾರ್ಯದರ್ಶಿ ವಿಜಯ ಭಾಸ್ಕರ್ ಅವರು ಎಲ್ಲಾ ಇಲಾಖೆಗಳ ಕಾರ್ಯದರ್ಶಿಗಳಿಗೆ ಸುತ್ತೋಲೆ ಹೊರಡಿಸಿ, ಶೇ.4ರ ಮಿತಿ ಮೀರದಂತೆ ಸೂಚನೆ ನೀಡಿದ್ದರು.
ಈ ಬಾರಿ ದೋಸ್ತಿ ಸರ್ಕಾರ ವರ್ಗಾವಣೆ ಮಿತಿಯನ್ನು ಶೇ. 2 ರಿಂದ ಶೇ.6ಕ್ಕೆ ಏರಿಸಿ ಸಿಬ್ಬಂದಿಗೆ ಸಿಹಿ ಸುದ್ದಿ ನೀಡಿದೆ.
