ಸುಷ್ಮಾ ಸ್ವರಾಜ್​​​​​​​ ನನಗೆ ತಾಯಿಯ ಪ್ರೀತಿ ಕೊಟ್ಟಿದ್ದಾರೆ: ಶಾಸಕ ಶ್ರೀರಾಮುಲು

ಸುಷ್ಮಾ ಸ್ವರಾಜ್ ಅವರ ಅಗಲಿಕೆ ಹಿನ್ನೆಲೆ ಮೊಳಕಾಲ್ಮೂರು ಶಾಸಕ ಬಿ.ಶ್ರೀರಾಮುಲು ಕೆಐಎಎಲ್​​ ವಿಮಾನ ನಿಲ್ದಾಣದಿಂದ ದೆಹಲಿಗೆ ಪ್ರಯಾಣ‌ ಬೆಳೆಸಿದ್ದಾರೆ.

ಬೆಂಗಳೂರು: ಕೇಂದ್ರದ ಮಾಜಿ ಸಚಿವೆ ಸುಷ್ಮಾ ಸ್ವರಾಜ್ ನಿಧನ ಹಿನ್ನೆಲೆ ಮೊಳಕಾಲ್ಮೂರು ಶಾಸಕ ಬಿ.ಶ್ರೀರಾಮುಲು ಕೆಐಎಎಲ್​​ ವಿಮಾನ ನಿಲ್ದಾಣದಿಂದ ದೆಹಲಿಗೆ ಪ್ರಯಾಣ‌ ಬೆಳೆಸಿದ್ರು.

ಕೆಂಪೇಗೌಡ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ಮಾತನಾಡಿದ ಅವರು, ಅಪ್ರತಿಮ ರಾಜಕಾರಣಿ ಸುಷ್ಮಾ ಸ್ವರಾಜ್ ಅವರ ಅಗಲಿಕೆ ಅಪಾರ ಅಭಿಮಾನಿಗಳಿಗೆ ನೋವುಂಟು ಮಾಡಿದೆ. ನನ್ನ ಹಾಗೂ ಅವರ ನಡುವೆ ತಾಯಿ ಮಗನ ಸಂಬಂಧವಿತ್ತು. 1991ರಲ್ಲಿ ಅವರು ಬಳ್ಳಾರಿಯಲ್ಲಿ ಚುನಾವಣೆಗೆ ನಿಂತಾಗಲಿಂದಲೂ ಅವರ ಪರಿಚಯವಿತ್ತು. ಅಂದು ಅವರು ಚು‌ನಾವಣೆಯಲ್ಲಿ ಸೋತರೂ ಧೃತಿಗೆಡಬೇಡಿ, ಪ್ರತಿ ವರ್ಷ ಬರ್ತಿನಿ ಅಂತ ಹೇಳಿದ್ರು‌. ಅದೇ ರೀತಿ ಬಂದು ಹೋಗ್ತಿದ್ರು‌‌ ಎಂದರು.

ಯಾವಾಗ ಅವರು ಕರ್ನಾಟಕಕ್ಕೆ ಬಂದ್ರೂ ನನಗಾಗಿ ಒಂದು ಗಿಫ್ಟ್​​ ತರುತ್ತಿದ್ರು. ಇದು ನಿನ್ನ ಬಳಿ ಇಟ್ಕೊ, ಇದನ್ನು ನೋಡಿದಾಗ ನನ್ನ ನೆನಪು ಬರುತ್ತೆ ಅಂತ ಹೇಳ್ತಿದ್ರು. ಅವರ ಮನೆಗೆ ಹೋದಾಗಲು ಅವರ ಮಕ್ಕಳು, ಯಜಮಾನರು, ನಿನ್ನ ಮಗ ಬಂದ ನೋಡು ಅಂತಿದ್ರು. ಒಬ್ಬ ತಾಯಿ ಮಗನ ಮೇಲೆ ತೋರಿಸುವ ಪ್ರೀತಿಗಿಂತಲೂ ಹೆಚ್ಚಿನ ಪ್ರೀತಿ ಅವರು ನನ್ನ ಮೇಲೆ ತೋರಿಸುತ್ತಿದ್ರು ಎಂದರು.

ಅವರ ಬಗ್ಗೆ ಎಷ್ಟು ಹೇಳಿದ್ರು ಸಾಕಾಗುವುದಿಲ್ಲ. ಇಂದು ಅವರು ನಮ್ಮನ್ನೆಲ್ಲ ಅಗಲಿದ್ದಾರೆ. ಅದು ಲಕ್ಷಾಂತರ ಅಭಿಮಾನಿಗಳಿಗೆ ನೋವು‌ಂಟು ಮಾಡಿದೆ. ಇಂದು ನಾನು ಈ ಸ್ಥಾನದಲ್ಲಿದ್ದೇನೆ ಅಂದ್ರೆ ಅದಕ್ಕೆ ಅವರು ಸಹ ಕಾರಣ‌. ಇಂದು ನಾನು ಸಹ ದೆಹಲಿಗೆ ಹೋಗ್ತಿದ್ದು, ಅವರ ಅಂತ್ಯ ಸಂಸ್ಕಾರದಲ್ಲಿ ಭಾಗವಹಿಸಿ ಸಂಜೆ ವಾಪಸ್ ಆಗ್ತೀನಿ ಎಂದರು.