ಬೆಂಗಳೂರು : ದೇಶದಲ್ಲಿ ಗುಲಾಮಗಿರಿ ಇನ್ನೂ ಹೋಗಿಲ್ಲ. ಎಲ್ಲಿವರೆಗೆ ಗುಲಾಮಗಿರಿಯಿಂದ ಹೊರ ಬರುವುದಿಲ್ಲವೋ ಅಲ್ಲಿವರೆಗೆ ಸಮಾಜದಲ್ಲಿ ಬದಲಾವಣೆಯಾಗಲು ಸಾಧ್ಯವಿಲ್ಲ ಎಂದು ಮಾಜಿ ಮುಖ್ಯಮಂತ್ರಿ ಸಿದ್ದರಾಮಯ್ಯ ಹೇಳಿದರು.
ಕನ್ನಡ ಸಾಹಿತ್ಯ ಪರಿಷತ್ನಲ್ಲಿ ನಡೆದ ಅಕ್ಕನ ಮನೆ ದಶಮಾನೋತ್ಸವ ಸಂಭ್ರಮದ ಅಂಗವಾಗಿ ಅಕ್ಕನಮನೆ ಪ್ರತಿಷ್ಠಾನ ಹಮ್ಮಿಕೊಂಡಿದ್ದ ದೇಸಿ ದಿಬ್ಬಣ ಹಾಗೂ ಅಲ್ಲಮ ಶೂನ್ಯ ಸಿರಿ ಪ್ರಶಸ್ತಿ ಪ್ರದಾನ ಕಾರ್ಯಕ್ರಮದಲ್ಲಿ ಅವರು ಮಾತನಾಡಿದರು.
ಕೆಲ ಮೌಢ್ಯ, ಕಟ್ಟುಪಾಡುಗಳು, ಕಂದಾಚಾರಗಳನ್ನು ಹುಟ್ಟು ಹಾಕಿದ ಹಿನ್ನೆಲೆಯಲ್ಲಿ ಗುಲಾಮಗಿರಿ ಇನ್ನೂ ಜೀವಂತವಾಗಿದೆ. ನಮ್ಮದು ಪುರುಷ ಪ್ರಧಾನ, ಜಾತಿ ಪ್ರಧಾನ ಸಮಾಜವಾಗಿದೆ. ಹಿಂದೆ ಹೆಣ್ಣು ಮಕ್ಕಳು ಹಾಗೂ ಕೆಲ ಸಮುದಾಯ ಅಕ್ಷರ ಸಂಸ್ಕೃತಿಯಿಂದ ವಂಚಿತವಾಯಿತು. ಆರ್ಥಿಕ, ಸಾಮಾಜಿಕ ಅಸಮಾನತೆಗೆ ಅಕ್ಷರ ಸಂಸ್ಕೃತಿ ಕಾರಣವಾಗಿದೆ. ಚರಿತ್ರೆಯಲ್ಲಿ ದಾಖಲಾದ ಯುವಪುರುಷರನ್ನು ಇಂದಿನ ಪೀಳಿಗೆಗೆ ಪರಿಚಯಿಸಬೇಕಾದ ಅಗತ್ಯವಿದೆ ಎಂದರು.
ಬಳಿಕ ಸಾಹಿತಿ ಬರಗೂರು ರಾಮಚಂದ್ರಪ್ಪ ಮಾತನಾಡಿ, ದೇಸಿ ಎನ್ನುವುದು ಆಧುನಿಕವಾದ ಮಾನಸಿಕ ಗುಣ. ಅಕ್ಕಮಹಾದೇವಿ ಮತ್ತು ಅಲ್ಲಮ ಪ್ರಭುಗಳು ದೇಸಿ ಸಮಕಾಲೀನ ಸಂದರ್ಭದಲ್ಲಿ ಮುಖ್ಯವಾದವರು. ಜಾನಪದ ಕೇವಲ ಹಳ್ಳಗಳಲ್ಲಿ ಮಾತ್ರವಲ್ಲ, ನಗರ ಪ್ರದೇಶದಲ್ಲೂ ಇದೆ. ಗ್ರಾಮೀಣ ಭಾಗದ್ದು ಲಿಖಿತ ದೇಶಿ ಎಂಬುದು ನಿಜ ಆದರೆ, ದೇಸಿಯತೇ ಎನ್ನುವುದು ಹಳ್ಳಿಯಲ್ಲಿ ಮಾತ್ರ ಇರುತ್ತೆ ಅನ್ನುವುದು ಸಾಂಸ್ಕೃತಿಕ ಮೂಢನಂಬಿಕೆ. ಬಹುಸಂಸ್ಕೃತಿಗಳ ಸ್ವರೂಪ ಹೊಂದಿರುವುದೇ ದೇಸಿ ಸಂಸ್ಕೃತಿ. ಓದಿದವರೆಲ್ಲ ವಿವೇಕಿಗಳಲ್ಲ, ಓದದೇ ಇರುವವರು ಅವಿವೇಕಿಗಳಲ್ಲ ಎಂದರು.
ಇನ್ನು ಈ ಕಾರ್ಯಕ್ರಮದಲ್ಲಿ ಅಲ್ಲಮ ಶೂನ್ಯ ಸಿರಿ ಪ್ರಶಸ್ತಿಯನ್ನು ಜಾನಪದ ಕಲಾವಿದ ಗುರುರಾಜ ಹೊಸಕೋಟೆ, ಹೋಮ್ ಗಾರ್ಡ್ ಕಮಾಂಡೆಂಟ್ ಕೆ. ರವಿಕುಮಾರ್, ಹೋರಾಟಗಾರ ಪಾಲನೇತ್ರ, ರೈತ ಹೋರಾಟಗಾರ್ತಿ ಜಯಶ್ರೀ ಗುರನ್ನವರ್, ಸಮಾಜ ಸೇವಕರಾದ ಬಸವರಾಜ್ ಎಂ.ಪಾಟೀಲ್, ಸತೀಶ್ ಬಿ. ಗುಡ್ಡ ಅವರಿಗೆ ನೀಡಿ ಗೌರವಿಸಲಾಯಿತು.
