ಆ. 17ರಿಂದ 30ರವರೆಗೆ ರಾಜಭವನ ಸಾರ್ವಜನಿಕರ ವೀಕ್ಷಣೆಗೆ ಮುಕ್ತ

ಸದಾ ಖಾಕಿ ಸರ್ಪಗಾವಲಿನಲ್ಲಿರುವ ರಾಜಭವನ ಆಗಸ್ಟ್ 17ರಿಂದ 30ರವೆರೆಗೆ ಸಾರ್ವಜನಿಕ ಪ್ರವೇಶಕ್ಕೆ ಮುಕ್ತವಾಗಲಿದೆ. ಸ್ವಾತಂತ್ರ್ಯ ದಿನಾಚರಣೆಯ ಪ್ರಯುಕ್ತ ಸಾರ್ವಜನಿಕರಿಗೆ ಈ ಅವಕಾಶ ನೀಡಲಾಗಿದ್ದು, ಪ್ರವೇಶ ಬಯಸುವವರು ಆನ್​​ಲೈನ್ ಮೂಲಕ ಪಾಸ್ ಪಡೆಯಬಹುದಾಗಿದೆ.

ಬೆಂಗಳೂರು: ಸ್ವಾತಂತ್ರ್ಯ ದಿನಾಚರಣೆ ಪ್ರಯುಕ್ತ ಆಗಸ್ಟ್ 17ರಿಂದ 30ರವರೆಗೆ ರಾಜಭವನ ಸಾರ್ವಜನಿಕ ವೀಕ್ಷಣೆಗೆ ಮುಕ್ತವಾಗಲಿದೆ.

ಮಧ್ಯಾಹ್ನ 3:30ರಿಂದ ಸಂಜೆ 7 ಗಂಟೆವರೆಗೆ ಸಾರ್ವಜನಿಕರಿಗೆ ರಾಜಭವನದೊಳಗೆ ಹೋಗಿ ವೀಕ್ಷಣೆ ಮಾಡಲು ಮುಕ್ತ ಅವಕಾಶ ಸಿಗಲಿದೆ. ಪ್ರವೇಶ ಬಯಸುವವರು ಆನ್​​ಲೈನ್ ಮೂಲಕ ಆಧಾರ್ ಸಂಖ್ಯೆ, ಮೊಬೈಲ್ ನಂಬರ್, ಇ-ಮೇಲ್ ವಿಳಾಸಗಳ ಸಂಪೂರ್ಣ ವಿವರ ಹಾಗೂ ಯಾವ ದಿನ ಭೇಟಿ ಮಾಡಲು ಇಚ್ಛಿಸುತ್ತಿದ್ದೀರಿ ಎಂಬ ಬಗೆಗಿನ ವಿವರಗಳೊಂದಿಗೆ ಹೆಸರನ್ನು ನೋಂದಾಯಿಸಿಕೊಳ್ಳಬೇಕು. ಆನ್​ಲೈನ್​​ನಲ್ಲಿ ದೃಢೀಕರಣವಾದ ಬಳಿಕ ರಾಜಭವನ ಕೌಂಟರ್​​ನಲ್ಲಿ ಪ್ರವೇಶ ಪಾಸ್​​ ಸಿಗಲಿದೆ.

ಪಾಸ್ ಪಡೆದವರನ್ನು ರಾಜಭವನದ ಗಾಜಿನ‌ ಮನೆ, ಬ್ಯಾಂಕ್ವೆಟ್ ಹಾಲ್​ಗೆ ಕರೆದೊಯ್ದು, ಅದರ ವಿಶೇಷತೆಗಳನ್ನು ವಿವರಿಸಲಾಗುವುದು. ರಾಜಭವನದ ವೈಶಿಷ್ಟ್ಯ, ರಾಜ್ಯಪಾಲರ ಕರ್ತವ್ಯ, ಜವಾಬ್ದಾರಿಗಳನ್ನು ವಿವರಿಸುವ ಕಿರು ಚಿತ್ರವನ್ನು ಪ್ರದರ್ಶಿಸಲಾಗುವುದು. ಬಳಿಕ ಪಾರಂಪರಿಕ ಕಟ್ಟಡದ ಮುಂದೆ ನಿಂತು ಫೋಟೋ ತೆಗೆಸಿಕೊಳ್ಳುವ ಅವಕಾಶವನ್ನೂ ನೀಡಲಾಗುತ್ತದೆ.

ಅಂತಿಮವಾಗಿ ರಾಜಭವನ ಭೇಟಿ ನೀಡಿದವರಿಗೆ ರಾಜಭವನದಲ್ಲಿ ಚಹಾ ಕೂಟವನ್ನೂ ಏರ್ಪಡಿಸಲಾಗುತ್ತದೆ.