ಬೆಂಗಳೂರು: ಮಾಜಿ ಸಚಿವ ಡಿ.ಕೆ.ಶಿವಕುಮಾರ್ ಮನೆ ಮತ್ತು ಕಚೇರಿ ಮೇಲೆ ಐಟಿ ದಾಳಿ ನಡೆಸಿದಾಗಿನಿಂದ ವಿ.ಜಿ.ಸಿದ್ಧಾರ್ಥ್ಗೆ ಸಂಕಷ್ಟಗಳು ಶುರುವಾದವು ಎಂಬ ಮಾತು ಬೆಂಗಳೂರಿನ ಉದ್ಯಮಿ ಮತ್ತು ರಾಜಕಾರಣಿಗಳ ವಲಯದಲ್ಲಿ ಕೇಳಿಬರುತ್ತಿದೆ.
ತೆರಿಗೆ ಇಲಾಖೆ ಅಧಿಕಾರಿಗಳ ಮಾಹಿತಿ ಪ್ರಕಾರ ಸಿದ್ಧಾರ್ಥ್ ಮತ್ತು ಡಿ.ಕೆ.ಶಿವಕುಮಾರ್ ನಡುವೆ ಆರ್ಥಿಕ ವ್ಯವಹಾರವಿತ್ತು ಎಂದು ಹೇಳಲಾಗುತ್ತಿದೆ. 2017 ಆಗಸ್ಟ್ 2 ರಂದು ಡಿಕೆಶಿ ಮತ್ತು ಅವರ ಆರ್ಥಿಕ ಸಲಹೆಗಾರ ಚಂದ್ರಶೇಖರ್ ಸುಕಪುರಿ ಮನೆ ಮೇಲೆ ದಾಳಿ ನಡೆಸಿ, ದಾಖಲೆಗಳನ್ನ ಪರಿಶೀಲನೆ ನಡೆಸಿದಾಗ ಕೆಫೆ ಕಾಫಿ ಡೇ ಲಿಮಿಟೆಡ್ ಮತ್ತು ಎಂ ಸೋಲ್ ಸ್ಪೇಸ್‌ ನೊಂದಿಗೆ ಹಣಕಾಸಿನ ವಹಿವಾಟು ಇರುವುದು ಬೆಳಕಿಗೆ ಬಂದಿದೆ.
ಇದೇ ಮಾಹಿತಿಯನ್ನ ಆಧರಿಸಿ ಐಟಿ ಅಧಿಕಾರಿಗಳು ಸಿದ್ಧಾರ್ಥ್ ಬೆನ್ನಿಗೆ ಬೀಳುತ್ತಾರೆ. ಹೀಗಾಗಿ ಸಾವಿಗೆ ಮುನ್ನ ಸಿದ್ಧಾರ್ಥ ಬರೆದ ಪತ್ರದಲ್ಲಿ ಐಟಿ ಡಿಜಿ ತುಂಬಾ ಕಿರುಕುಳ ನೀಡುತ್ತಿದ್ದಾರೆ ಎಂದು ಉಲ್ಲೇಖಿಸಿರುತ್ತಾರೆ. ಈ ಬಗ್ಗೆ ಮಾತನಾಡಿದ್ದ ಐಟಿ ಡಿಜಿ ಪಿ.ಆರ್.ಬಾಲಕೃಷ್ಣನ್ ನಮಗೆ ಸಿಕ್ಕ ದಾಖಲೆಗಳ ಆಧಾರದ ಮೇಲೆ ತನಿಖೆ ನಡೆಸುವುದು ಸಹಜ. ಅದೇ ರೀತಿ ಸಿದ್ಧಾರ್ಥ್ ಪ್ರಕರಣದಲ್ಲಿ ತನಿಖೆ ನಡೆಸಿದ್ದೆವು ಯಾವುದೇ ರೀತಿಯ ಕಿರುಕುಳ ನೀಡಿಲ್ಲ ಎಂದಿದ್ದರು.
ಮೈಂಡ್ ಟ್ರೀ ಕಂಪನಿಯಲ್ಲಿ ಸಿದ್ಧಾರ್ಥ್ ಹೊಂದಿದ್ದ ಷೇರುಗಳನ್ನ ಐಟಿ ಇಲಾಖೆ ವಶಪಡಿಸಿಕೊಂಡಿತ್ತು ಎಂಬ ಆರೋಪ ಕೇಳಿ ಬಂದಿತ್ತು. ಇದಕ್ಕೆ ಪ್ರತಿಕ್ರಿಯಿಸಿರುವ ಐಟಿ ಇಲಾಖೆ ಮೈಂಡ್ ಟ್ರೀ ಕಂಪನಿ ಷೇರ್ ಡೀಲ್ನಲ್ಲಿ ಸಿದ್ಧಾರ್ಥ್ ಅವರಿಗೆ ತೊಂದರೆ ಕೊಟ್ಟಿಲ್ಲ. ಅವರ ಮನವಿಯಂತೆ ಷೇರು ರಿಲೀಸ್ ಮಾಡಿದ್ವಿ, ಆ ನಂತರ ಸಿದ್ದಾರ್ಥ್ ತಮ್ಮಿಚ್ಚೆ ಯಂತೆ ಷೇರು ಮಾರಾಟ ಮಾಡಿದ್ದಾರೆ ಎಂದಿದೆ.
ಒಟ್ಟಾರೆಯಾಗಿ ಡಿಕೆಶಿ ಮೇಲೆ ಐಟಿ ದಾಳಿ ನಡೆದ ನಂತರದಿಂದ ಕಾಫಿ ದೊರೆಗೆ ಸಂಕಷ್ಟ ಶುರುವಾಗಿದ್ದು ಎಂಬುದು ಈಗ ಚರ್ಚಿತ ವಿಷಯವಾಗಿದೆ.
