ಬೆಂಗಳೂರು: ಸರ್ಕಾರಿ ಶಾಲೆ ಹಾಗೂ ಆಟದ ಮೈದಾನಕ್ಕೆ ಬೆಂಗಳೂರು ಪೂರ್ವ ತಾಲೂಕು ಕೆ.ಆರ್.ಪುರ ಹೋಬಳಿಯ ಮಹದೇವಪುರ ಗ್ರಾಮದ ಸರ್ವೇ ನಂಬರ್ 199ರಲ್ಲಿ ಕಾಯ್ದಿರಿಸಿದ್ದ ಜಮೀನು ಒತ್ತುವರಿಯನ್ನು ತೆರವುಗೊಳಿಸಲಾಗುತ್ತದೆ. ಎಷ್ಟೇ ಪ್ರಭಾವಿಗಳಿದ್ದರೂ ಮಣಿಯದೇ ಕ್ರಮ ಕೈಗೊಳ್ಳಲಾಗುತ್ತದೆ ಎಂದು ಕಂದಾಯ ಸಚಿವ ಆರ್.ಅಶೋಕ್ ಹೇಳಿದ್ದಾರೆ.
ವಿಧಾನ ಪರಿಷತ್ನ ಕಲಾಪ ವೇಳೆ ಬೆಂಗಳೂರು ಪೂರ್ವ ತಾಲೂಕಿನ ಕೆ.ಆರ್.ಪುರಂ ವಾರ್ಡ್ 81ರ ಸರ್ವೇ ನಂಬರ್ 199ರ ಸರ್ಕಾರಿ ಜಾಗದಲ್ಲಿ ಅಕ್ರಮವಾಗಿ ಮನೆಗಳನ್ನು ನಿರ್ಮಿಸಿ ಮಾರಾಟ ಮಾಡುತ್ತಿರುವ ಬಗ್ಗೆ ಕಾಂಗ್ರೆಸ್ ಮುಖ್ಯ ಸಚೇತಕ ನಾರಾಯಣಸ್ವಾಮಿ, ಕಂದಾಯ ಸಚಿವ ಆರ್.ಅಶೋಕ್ ಗಮನ ಸೆಳೆದರು.
ಇದಕ್ಕೆ ಉತ್ತರಿಸಿದ ಸಚಿವ ಅಶೋಕ್, ಸರ್ವೇ ನಂಬರ್ 199ರಲ್ಲಿ 7 ಎಕರೆ ಖರಾಜು ಬಂಡೆ ಜಮೀನಿದ್ದು, ಅದರಲ್ಲಿ 2 ಎಕರೆ ಜಾಗದಲ್ಲಿ 100 ಮನೆಗಳಿವೆ. ಈ ಒತ್ತುವರಿ ಇಂದು ನಿನ್ನೆಯದಲ್ಲ. 30-40 ವರ್ಷದಿಂದ ಇದೆ. ಹೆಚ್ಚುವರಿ 10 ಮನೆ ಕಟ್ಟಿದ್ದಾರೆ ಅವುಗಳ ತೆರವಿಗೆ ಒತ್ತಾಯಿಸಿದ್ದಾರೆ. ಆದರೆ ನಾವು ಏಕಾಏಕಿ ಡೆಮಾಲಿಷ್ ಮಾಡುವಂತಿಲ್ಲ. ಕಾನೂನು ಪ್ರಕಾರ ನೋಟಿಸ್ ನೀಡಿ, ಸರ್ವೇ ಮಾಡಿ ನಂತರ ತೆರವು ಮಾಡಬೇಕಾಗುತ್ತದೆ. ಯಾರೇ ಒತ್ತುವರಿ ಮಾಡಿರಲಿ ನಿರ್ದಾಕ್ಷಿಣ್ಯವಾಗಿ ಕ್ರಮ ಕೈಗೊಳ್ಳಲಾಗುತ್ತದೆ ಎಂದು ಭರವಸೆ ನೀಡಿದರು.
ಸರ್ಕಾರದ ಉತ್ತರಕ್ಕೆ ಅಸಮಾಧಾನ ವ್ಯಕ್ತಪಡಿಸಿದ ಪ್ರತಿಪಕ್ಷ ನಾಯಕ ಎಸ್.ಆರ್.ಪಾಟೀಲ್, ಸರ್ಕಾರಿ ಜಾಗದಲ್ಲಿ ಮನೆ ಕಟ್ಟುವವರೆಗೂ ಅಧಿಕಾರಿಗಳು ಏನು ಮಾಡುತ್ತಿದ್ದಾರೆ. ಸರ್ಕಾರಿ ಜಾಗದಲ್ಲಿ ರಾಜಾರೋಷವಾಗಿ ಹೋಗಿ ಮನೆ ಕಟ್ಟಲು ಅವಕಾಶ ನೀಡಬಾರದಿತ್ತಲ್ಲವೆ? ಅಧಿಕಾರಿಗಳೂ ಪ್ರಭಾವಿಗಳ ಜೊತೆ ಶಾಮೀಲಾಗಿರಬೇಕು. ಹಾಗಾಗಿ ತಪ್ಪಿತಸ್ಥ ಅಧಿಕಾರಿಗಳನ್ನು ಅಮಾನತು ಮಾಡಿ ಎಂದು ಆಗ್ರಹಿಸಿದರು.
ಇದಕ್ಕೆ ಉತ್ತರಿಸಿದ ಅಶೋಕ್, 2 ಎಕರೆ ಜಮೀನಿನಲ್ಲಿ 100 ಮನೆ ಈಗಾಗಲೇ ಕಟ್ಟಿಕೊಂಡು ಮೂರ್ನಾಲ್ಕು ದಶಕದಿಂದ ವಾಸ ಮಾಡುತ್ತಾ ಬಂದಿದ್ದಾರೆ. ನಾರಾಯಣಸ್ವಾಮಿ ಹೇಳುತ್ತಿರುವುದು ಈಗ 100 ಜನರ ನಿವಾಸ ತೆರವು ಬೇಡ. ಹೊಸದಾಗಿ ಕಟ್ಟಿರುವ 10 ಜನರ ನಿವಾಸ ತೆರವು ಮಾಡಿ ಎಂದಿದ್ದಾರೆ, ಅದಕ್ಕೆ ಒಪ್ಪಿಕೊಂಡಿದ್ದೇನೆ. ಹಳಬರೆಲ್ಲಾ ಸಕ್ರಮಕ್ಕಾಗಿ 94ಸಿ ಅಡಿ ಅರ್ಜಿ ಹಾಕಿಕೊಂಡಿದ್ದಾರೆ. ಅದಕ್ಕೂ ನನ್ನ ಸಹಮತ ಇದೆ. ಈಗ ಹೊಸದಾಗಿ ಕಟ್ಟಿರುವ ಮನೆಗಳ ತೆರವು ಮಾಡಲಾಗುತ್ತದೆ. ತಕ್ಷಣವೇ ಅಧಿಕಾರಿಗಳನ್ನು ಕಳುಹಿಸಿ ಕ್ರಮ ಕೈಗೊಳ್ಳಲಾಗುತ್ತದೆ ಎಂದು ಭರವಸೆ ನೀಡಿದರು.
ಇದನ್ನೂ ಓದಿ: ನಮ್ಮ ಬೇಡಿಕೆ ಒಪ್ಪುವವರೆಗೆ ಸದನದಲ್ಲಿ ಧರಣಿ ಮುಂದುವರೆಸುತ್ತೇವೆ: ಸಿದ್ದರಾಮಯ್ಯ
