ಬೆಂಗಳೂರು : ಪಂಚಮಸಾಲಿ ಸಮುದಾಯವನ್ನು ಪ್ರವರ್ಗ 2ಎಗೆ ಸೇರಿಸುವಂತೆ ಆಗ್ರಹಿಸಿ ಜನವರಿ 14ರಿಂದ ಆರಂಭಗೊಂಡಿದ್ದ ಕೂಡಲಸಂಗಮ ಶ್ರೀಗಳ ನೇತೃತ್ವದ ಪಾದಯಾತ್ರೆ ಮುಕ್ತಾಯಗೊಂಡರೂ ಬೇಡಿಕೆ ಮಾತ್ರ ಇನ್ನೂ ಈಡೇರಿಲ್ಲ. ಸರ್ಕಾರ ಸ್ಪಷ್ಟ ನಿರ್ಧಾರ ಪ್ರಕಟಿಸದ ಹಿನ್ನೆಲೆ ವಿಧಾನಸೌಧದ ಎದುರು ಧರಣಿ ನಡೆಸುವ ನಿರ್ಣಯವನ್ನು ಇಂದು ನಡೆದ ಬೃಹತ್ ಸಮಾವೇಶದಲ್ಲಿ ಕೈಗೊಳ್ಳಲಾಯಿತು.
ಅರಮನೆ ಮೈದಾನದಲ್ಲಿ ಬೃಹತ್ ಸಮಾವೇಶ : 705 ಕಿ.ಮೀ ಸುದೀರ್ಘ ಪಾದಯಾತ್ರೆಯ ಸಮಾರೋಪ ಸಮಾರಂಭದ ಅಂಗವಾಗಿ ನಗರದ ಅರಮನೆ ಮೈದಾನದಲ್ಲಿ ಬೃಹತ್ ಸಮಾವೇಶವನ್ನು ಇಂದು ನಡೆಸಲಾಯಿತು. ರಾಜ್ಯದ ಮೂಲೆ ಮೂಲೆಯಿಂದ ಪಂಚಮಸಾಲಿ ಸಮುದಾಯದ ಜನಸಾಗರವೇ ಹರಿದು ಬಂದಿತ್ತು. ಪಂಚಮಸಾಲಿ ಪರ ಘೋಷಣೆ ಮುಗಿಲು ಮುಟ್ಟಿತ್ತು.
ಸಿಎಂ ಬಿಎಸ್ವೈ ವಿರುದ್ಧ ಹರಿಹಾಯ್ದ ಯತ್ನಾಳ್ : ಕೂಡಲಸಂಗಮದಲ್ಲಿ ಪಾದಯಾತ್ರೆ ಉದ್ಘಾಟಿಸಿದ್ದ ಶಾಸಕ ಬಸನಗೌಡ ಪಾಟೀಲ್ ಯತ್ನಾಳ್, ಇಂದಿನ ಬೃಹತ್ ಸಮಾವೇಶವನ್ನೂ ಉದ್ಘಾಟಿಸಿದರು. ನಂತರ ಮಾತನಾಡಿದ ಅವರು, ಸಿಎಂ ಯಡಿಯೂರಪ್ಪ ಮಾತು ಕೊಟ್ಟಂತೆ ನಡೆದುಕೊಳ್ಳಬೇಕು. ಎಲ್ಲವೂ ನಿಮ್ಮ ಕೈಯಲ್ಲಿ ಇದೆ. ಆದರೆ, ನಿಮಗೆ ಮನಸ್ಸಿಲ್ಲ.
ನಿಮ್ಮ ಜಾತಿಗಾದರೆ ತಕ್ಷಣ ಕೊಟ್ಟಿರಿ, ನಮಗೆ ಯಾಕೆ ಕೊಡುತ್ತಿಲ್ಲ?. ಕೇಳಿದರೆ ಪ್ರಾಣ ಕೊಡುತ್ತೇವೆ ಎನ್ನುತ್ತಾರೆ. ನಮಗೆ ಯಾರ ಪ್ರಾಣವೂ ಬೇಕಿಲ್ಲ. 2ಎ ಮೀಸಲಾತಿ ಕೊಡಿ ಸಾಕು. ಇಲ್ಲವೇ ಕೊಡಲು ಸಾಧ್ಯವಿಲ್ಲ ಎಂದು ಹೇಳಿ. ನಮಗೆ ಹೇಗೆ ತೆಗೆದುಕೊಳ್ಳಬೇಕು ಎಂದು ಗೊತ್ತಿದೆ ಎಂದು ಸಿಎಂ ಬಿಎಸ್ವೈ ವಿರುದ್ಧ ಹರಿಹಾಯ್ದರು.
ವಿಧಾನಸೌಧದ ಎದುರು ಧರಣಿ : ನಾವು ಮಾರ್ಚ್ 4ರವರೆಗೆ ವಿಧಾನಸೌಧದ ಎದುರು ಧರಣಿ ಮಾಡುತ್ತೇವೆ. 4ರಂದು ಅಧಿವೇಶನ ಕೂಡ ಆರಂಭವಾಗಲಿದೆ. ಅಲ್ಲಿ ನಾನು ಮತ್ತೆ ಎದ್ದು ನಿಲ್ಲುತ್ತೇನೆ, ಸಿಎಂ ಉತ್ತರ ಕೊಡಲೇಬೇಕು, ಇಲ್ಲದೇ ಇದ್ದಲ್ಲಿ ಸಮುದಾಯದ ಸಚಿವರು ರಾಜೀನಾಮೆ ಕೊಡಬೇಕು. ಈ ಅಧಿವೇಶನ ಮುಗಿಯುವುದರೊಳಗೆ 2ಎ ಘೋಷಣೆ ಮಾಡದೇ ಇದ್ದಲ್ಲಿ ಹೋರಾಟದ ಸ್ವರೂಪ ಬದಲಾಗಲಿದೆ ಎಂದು ಎಚ್ಚರಿಸಿದರು.
ಸಚಿವ ಸಿ ಸಿ ಪಾಟೀಲ್ ಮನವಿ : ನಂತರ ಸರ್ಕಾರದ ಪರ ಸಮಾವೇಶದ ಸ್ಥಳಕ್ಕೆ ತೆರಳಿದ್ದ ಸಚಿವ ಸಿ ಸಿ ಪಾಟೀಲ್, ಸರ್ಕಾರ ನಿಮ್ಮ ಬೇಡಿಕೆ ಬಗ್ಗೆ ಸಕಾರಾತ್ಮಕ ನಿಲುವು ಹೊಂದಿದೆ. ಈಗಾಗಲೇ ಬೇಡಿಕೆ ಕುರಿತು ಅಧ್ಯಯನ ವರದಿ ನೀಡಲು ಹಿಂದುಳಿದ ವರ್ಗಗಳ ಆಯೋಗಕ್ಕೆ ಸಿಎಂ ಸೂಚಿಸಿದ್ದಾರೆ.
ಸರ್ಕಾರಕ್ಕೆ ಏನು ಸಂದೇಶ ಕಳುಹಿಸಬೇಕೋ ಅದನ್ನು ವೇದಿಕೆ ಮೂಲಕ ಕಳಿಸಿದ್ದೀರಿ, ಆಶೀರ್ವಚನ ಮುಗಿದ ನಂತರ ಹೋರಾಟವನ್ನು ತಾತ್ಕಾಲಿಕವಾಗಿ ನಿಲ್ಲಿಸಿ ಎಂದು ಮನವಿ ಮಾಡಿದರು.
2ಎ ಕೊಡಿಸಲು ಶ್ರಮಿಸುತ್ತೇವೆ - ನಿರಾಣಿ : 2008ರಲ್ಲಿ ಯಡಿಯೂರಪ್ಪನವರು ಸಿಎಂ ಇದ್ದಾಗ 2ಎ ಮೀಸಲು ಬೇಡಿಕೆ ಬಂದಿತ್ತು. ಆಗ ಸಂಪುಟ ಉಪ ಸಮಿತಿ ರಚಿಸಿದ್ದರು, ಅಂದು ಕಾನೂನು ತೊಡಕು ಬಂದ ಕಾರಣಕ್ಕೆ 3ಬಿಗೆ ಸೇರಿಸಲಾಯಿತು. ಈಗ 2ಎ ಬೇಡಿಕೆ ಕುರಿತು ಅಧ್ಯಯನ ವರದಿಗೆ ಸೂಚಿಸಿದ್ದಾರೆ. 2ಎ ಕೊಡಿಸಲು ನಾವೆಲ್ಲಾ ಶ್ರಮಿಸುತ್ತಿದ್ದೇವೆ. ಸಮಾಧಾನದಿಂದ ಇರಿ, ಸಚಿವರು, ಶಾಸಕರು ಪ್ರಮಾಣಿಕ ಪ್ರಯತ್ನ ಮಾಡಲಿದ್ದೇವೆ ಎಂದು ಭರವಸೆ ನೀಡಿದರು.
ಸ್ಪಷ್ಟ ನಿರ್ಧಾರಕ್ಕೆ ಆಗ್ರಹ : ಉಭಯ ಸಚಿವರ ಭಾಷಣಕ್ಕೆ ಸಮುದಾಯದ ಜನರಿಂದ ಪದೇಪದೆ ಅಡ್ಡಿಯಾಯಿತು. ಸ್ಪಷ್ಟ ನಿರ್ಧಾರ ಹೇಳಬೇಕು ಎನ್ನುವ ಕೂಗು ಕೇಳಿ ಬಂದಿತು. ಆಯೋಜಕರು ಮಧ್ಯಪ್ರವೇಶಿಸಿ ಜನರನ್ನು ನಿಯಂತ್ರಿಸಬೇಕಾಯಿತು. ಜನರ ಘೋಷಣೆ ನಡುವೆ ಭಾಷಣ ಮುಗಿಸಲು ಸಚಿವರು ಹರಸಾಹಸ ಪಡಬೇಕಾಯಿತು.
ಈ ಸುದ್ದಿಯನ್ನೂ ಓದಿ: ಮೀಸಲಾತಿ ಕೊಡದಿದ್ರೆ, ಹೇಗೆ ಪಡೆಯಬೇಕು ಎನ್ನುವುದು ಗೊತ್ತು: ವಚನಾನಂದ ಶ್ರೀ
ಸರ್ಕಾರದ ಪ್ರತಿನಿಧಿಗಳಾಗಿ ಬಂದಿದ್ದ ಸಚಿವರ ಭರವಸೆ ನಂತರ ಮಾತನಾಡಿದ ಹರಿಹರ ಪಂಚಮಸಾಲಿ ಪೀಠದ ವಚನಾನಂದ ಶ್ರೀಗಳು, ಮುಖ್ಯಮಂತ್ರಿಗಳು ನಮ್ಮ ಸಮುದಾಯಕ್ಕೆ ಸಾಮಾಜಿಕ ನ್ಯಾಯ ಕೊಡಬೇಕು.
ನಮ್ಮ ಸಮುದಾಯದ ಎಲ್ಲ ಶಾಕಸರು ಪ್ರಯತ್ನ ಮುಂದುವರೆಸಬೇಕು. ನಮ್ಮ ಹೋರಾಟ ಮೀಸಲಾತಿ ಸಿಗುವವರೆಗೂ ನಿರಂತರವಾಗಿರಲಿದೆ ಎಂದರು. ಆ ಮೂಲಕ ಸಚಿವರ ಭರವಸೆಯನ್ನು ಸ್ಪಷ್ಟವಾಗಿ ತಿರಸ್ಕರಿಸಿದರು.
ಈ ಸುದ್ದಿಯನ್ನೂ ಓದಿ: 'ಮಾ.4 ರವರೆಗೆ ವಿಧಾನಸೌಧದ ಎದುರು ಧರಣಿ, ನಂತರ ಉಪವಾಸ ಸತ್ಯಾಗ್ರಹ'
ಅಂತಿಮವಾಗಿ ಕೂಡಲಸಂಗಮ ಪೀಠದ ಬಸವ ಜಯ ಮೃತ್ಯುಂಜಯ ಶ್ರೀಗಳು ಒಂದು ಕ್ಷಣ ಸರ್ಕಾರದ ಭರವಸೆಗೆ ಒಪ್ಪಿಗೆ ನೀಡುವ ನಿಲುವು ವ್ಯಕ್ತಪಡಿಸಿದ್ದು, ಇದಕ್ಕೆ ಸಮುದಾಯದ ಜನರಿಂದ ತೀವ್ರ ವಿರೋಧ ವ್ಯಕ್ತವಾಯಿತು. ಹೋರಾಟ ಮುಂದುವರೆಸಬೇಕು ಎನ್ನುವ ಘೋಷಣೆ ಮೊಳಗಿಸಲಾಯಿತು.
ನಂತರ ವೇದಿಕೆಯ ಮೇಲೆಯೇ ಸ್ವಾಗತ ಸಮಿತಿ ಅಧ್ಯಕ್ಷ ಬಸನಗೌಡ ಪಾಟೀಲ್ ಯತ್ನಾಳ್ ಅಭಿಪ್ರಾಯ ಪಡೆದು, ನೆರೆದಿದ್ದ ಪಂಚಮಸಾಲಿ ಸಮುದಾಯದ ಬೇಡಿಕೆಗೆ ಮಣಿದ ಕೂಡಲಸಂಗಮ ಶ್ರೀಗಳು, ಮಾರ್ಚ್ 4ರವರೆಗೆ ವಿಧಾನಸೌಧದ ಸಮೀಪ ಶಾಂತಿಯುತ ಧರಣಿ ನಡೆಸುವ ನಿರ್ಧಾರ ಪ್ರಕಟಿಸಿದರು.
ಧರಣಿಗೂ ಮಣಿಯದಿದ್ದಲ್ಲಿ ಆಮರಣಾಂತ ಉಪವಾಸ ಸತ್ಯಾಗ್ರಹದ ಘೋಷಣೆ ಮಾಡಿದರು. ವಿಧಾನಸೌಧದ ಮುಂದೆ ಧರಣಿ ನಡೆಸುವ ನಿರ್ಧಾರದೊಂದಿಗೆ ಬೃಹತ್ ಸಮಾವೇಶಕ್ಕೆ ತೆರೆ ಎಳೆಯಲಾಯಿತು. ಅರಮನೆ ಮೈದಾನದಿಂದ ವಿಧಾನಸೌಧಕ್ಕೆ ಶ್ರೀಗಳ ಪಾದಯಾತ್ರೆ ಮುಂದುವರೆಸಲಾಯಿತು.
ಸಮಾವೇಶಕ್ಕೆ ಮಳೆ ಅಡ್ಡಿ : ಕಾರ್ಯಕ್ರಮದ ನಡುವೆ 15 ನಿಮಿಷಗಳ ಕಾಲ ಮಳೆ ಸುರಿದ ಪರಿಣಾಮ ಸಮಾವೇಶದಲ್ಲಿ ಗೊಂದಲವಾಯಿತು. ಶ್ರೀಗಳು ಸೇರಿ ಪ್ರಮುಖರು ವೇದಿಕೆಯಲ್ಲಿ ಮಳೆಯನ್ನು ಲೆಕ್ಕಿಸದೇ ಆಸೀನರಾಗಿದ್ದು, ಜನರು ಮಾತ್ರ ಚದುರಿದರು. ಕುರ್ಚಿಗಳನ್ನೇ ಛತ್ರಿಯನ್ನಾಗಿ ಮಾಡಿಕೊಂಡ ದೃಶ್ಯ ಕಂಡು ಬಂದಿತು.
ವಿನಯ್ ಕುಲಕರ್ಣಿ ಸ್ಮರಣೆ : ಕಾರ್ಯಕ್ರಮದುದ್ದಕ್ಕೂ ಮಾಜಿ ಸಚಿವ ವಿನಯ್ ಕುಲಕರ್ಣಿ ಅವರನ್ನು ನೆನಪಿಸಿಕೊಳ್ಳಲಾಯಿತು. ಪಾದಯಾತ್ರೆ ನಡೆಸುವಂತೆ ಮೊದಲು ಹೇಳಿದ್ದೇ ವಿನಯ್ ಕುಲಕರ್ಣಿ ಎಂದು ಬಸವ ಜಯ ಮೃತ್ಯುಂಜಯ ಶ್ರೀಗಳು ನೆನಪಿಸಿಕೊಂಡರು.
ಸಮಾಜ ಕಷ್ಟದಲ್ಲಿದ್ದಾಗ ಅವರು ನೆರವಿಗೆ ಬರುತ್ತಿದ್ದರು. ಆದರೆ, ಈಗ ಅವರು ಕಷ್ಟದಲ್ಲಿದ್ದಾರೆ. ಇಡೀ ಸಮಾಜ ಅವರ ಬೆನ್ನಿಗಿರಬೇಕು, ಆದಷ್ಟು ಬೇಗ ಅವರು ಎಲ್ಲಾ ಸಂಕಷ್ಟಗಳಿಂದ ಹೊರ ಬರಲಿ ಎಂದು ಆಶಿಸಿದರು.
ಸಮಾವೇಶಕ್ಕೆ ಜನಸಾಗರ : ರಾಜ್ಯದ ಮೂಲೆ ಮೂಲೆಯಿಂದ ಸಹಸ್ರ ಸಹಸ್ರ ಸಂಖ್ಯೆಯಲ್ಲಿ ಪಂಚಮಸಾಲಿ ಸಮುದಾಯದ ಜನರು ಸಮಾವೇಶಕ್ಕೆ ಆಗಮಿಸಿದ್ದರು. ಬಂದ ಎಲ್ಲರಿಗೂ ಊಟೋಪಚಾರ ಹಾಗೂ ಕಲ್ಯಾಣ ಮಂಟಪದಲ್ಲಿ ವಸತಿ ವ್ಯವಸ್ಥೆಯನ್ನ ಅಖಿಲ ಭಾರತ ಪಂಚಮಸಾಲಿ ಮಹಾಸಭಾ ರಾಷ್ಟ್ರೀಯ ಅಧ್ಯಕ್ಷ ವಿಜಯಾನಂದ ಕಾಶಪ್ಪನವರ್ ಕಲ್ಪಿಸಿ ಸಮುದಾಯದ ಹೋರಾಟಕ್ಕೆ ನೆರವಾಗಿದ್ದಾರೆ.
ಪಂಚಮಸಾಲಿ 2ಎ ಹೋರಾಟ ಇಂದು ಮುಕ್ತಾಯಗೊಳ್ಳಲಿದೆ ಎನ್ನುವ ನಿರೀಕ್ಷೆ ಹುಸಿಯಾಗಿದೆ. 2ನೇ ಹಂತದ ಹೋರಾಟಕ್ಕೆ ಇಂದು ಮುನ್ನುಡಿ ಬರೆಯಲಾಗಿದೆ. ಮಾರ್ಚ್ 4ರವರೆಗೆ ವಿಧಾನಸೌಧದ ಎದುರು ಧರಣಿ ನಡೆಸಲಾಗುತ್ತಿದೆ. ನಂತರ 3ನೇ ಹಂತದ ಹೋರಾಟವಾಗಿ ಉಪವಾಸ ಸತ್ಯಾಗ್ರಹ ಆರಂಭಗೊಳ್ಳಲಿದೆ. ಮೀಸಲಾತಿ ಹೋರಾಟ ಸರ್ಕಾರಕ್ಕೆ ಬಿಸಿತುಪ್ಪವಾಗಿ ಪರಿಣಮಿಸಿದೆ.
