ಬೆಂಗಳೂರು : ಕೋವಿಡ್ ಉಲ್ಬಣಿಸುತ್ತಿರುವ ಹೊತ್ತಲ್ಲೂ ನಗರದಲ್ಲಿರುವ ಖಾಸಗಿ ವೈದ್ಯಕೀಯ ಶಿಕ್ಷಣ ಸಂಸ್ಥೆಗಳು ರಾಜ್ಯ ಸರ್ಕಾರಕ್ಕೆ ಬೆಡ್ಗಳನ್ನು ನೀಡದೆ ಸತಾಯಿಸುತ್ತಿರುವ ಮಾಹಿತಿ ಈಟಿವಿ ಭಾರತ್ಗೆ ಲಭ್ಯವಾಗಿದೆ. ಯಾವ ಆಸ್ಪತ್ರೆ ಎಷ್ಟು ಬೆಡ್ ನೀಡಬೇಕು ಎಂಬ ನಿಖರ ಮಾಹಿತಿ ಇಲ್ಲಿದೆ.
ಬೆಂಗಳೂರಿನ ಖಾಸಗಿ ವೈದ್ಯಕೀಯ ಶಿಕ್ಷಣ ಸಂಸ್ಥೆಗಳು ಕೋವಿಡ್ ಚಿಕಿತ್ಸೆಗಾಗಿ ತಮ್ಮಲ್ಲಿರುವ ಶೇ.75ರಷ್ಟು ಬೆಡ್ಗಳನ್ನು ಬಿಬಿಎಂಪಿಗೆ ಮೀಸಲಿಡಬೇಕು ಎಂದು ರಾಜ್ಯ ಸರ್ಕಾರ ಈ ಹಿಂದೆಯೇ ಆದೇಶಿಸಿತ್ತು. ಆದರೆ, ಈವರೆಗೂ ಖಾಸಗಿ ವೈದ್ಯಕೀಯ ಶಿಕ್ಷಣ ಸಂಸ್ಥೆಗಳು ನೀಡಬೇಕಿದ್ದ 3,583 ಬೆಡ್ಗಳನ್ನು ಬಾಕಿ ಉಳಿಸಿಕೊಂಡಿವೆ.
ನಗರದಲ್ಲಿ ಒಟ್ಟು 12 ಖಾಸಗಿ ವೈದ್ಯಕೀಯ ಶಿಕ್ಷಣ ಸಂಸ್ಥೆಗಳಿವೆ. ಇಲ್ಲಿ ಒಟ್ಟು 11,642 ಹಾಸಿಗೆಗಳಿವೆ. ಸರ್ಕಾರದ ಆದೇಶದ ಪ್ರಕಾರ, ಈ ಸಂಸ್ಥೆಗಳು 8732 ಹಾಸಿಗೆಗಳನ್ನು ಸರ್ಕಾರಕ್ಕೆ ನೀಡಬೇಕಿದೆ. ಆದರೆ, ಈವರೆಗೆ 5149 ಬೆಡ್‌ಗಳನ್ನಷ್ಟೇ ನೀಡಿದ್ದು, ಇನ್ನೂ 3583 ಹಾಸಿಗೆಗಳನ್ನ ಬಾಕಿ ಉಳಿಸಿಕೊಂಡಿವೆ.
ಕರ್ನಾಟಕ ಖಾಸಗಿ ವೈದ್ಯಕೀಯ ಸಂಸ್ಥೆಗಳ ಸ್ಥಾಪನೆ(ಕೆಪಿಎಂಇ) ಪ್ರಕಾರ, 4888 ಸಾಮಾನ್ಯ ಹಾಸಿಗೆ, 3301 ಹೆಚ್ಡಿಯು ಬೆಡ್, 598 ಐಸಿಯು ಬೆಡ್ , 274 ವೆಂಟಿಲೇಟರ್ ಬೆಡ್ಗಳು ಖಾಸಗಿ ವೈದ್ಯಕೀಯ ಶಿಕ್ಷಣ ಸಂಸ್ಥೆಗಳಲ್ಲಿ ಲಭ್ಯವಿದೆ.
ಸರ್ಕಾರದ ಆದೇಶದಂತೆ ಈ ಪೈಕಿ ಶೇ 75 ರಷ್ಟು ಬೆಡ್ಗಳನ್ನು ಕೋವಿಡ್ ಚಿಕಿತ್ಸೆಗಾಗಿ ಬಿಬಿಎಂಗೆ ನೀಡಬೇಕು. ಇದೀಗ ಈಟಿವಿ ಭಾರತಕ್ಕೆ ಸಿಕ್ಕಿರುವ ಮಾಹಿತಿ ಪ್ರಕಾರ, ಬಿಬಿಎಂಪಿಗೆ 3089 ಸಾಮಾನ್ಯ ಹಾಸಿಗೆ , 1806 ಹೆಚ್ಡಿಯು ಬೆಡ್, 114 ಐಸಿಯು ಬೆಡ್, 140 ವೆಂಟಿಲೇಟರ್ ಬೆಡ್ಗಳನ್ನು ಮಾತ್ರ ನೀಡಲಾಗಿದೆ.
ಕೋವಿಡ್ ಚಿಕಿತ್ಸೆಗೆ ಬೆಡ್ಗಳನ್ನು ನೀಡುವಂತೆ ಸರ್ಕಾರ ಖಾಸಗಿ ವೈದ್ಯಕೀಯ ಶಿಕ್ಷಣ ಸಂಸ್ಥೆಗಳಿಗೆ ಆದೇಶಿಸಿ ವಾರ ಕಳೆದಿದ್ದರೂ, ಬಾಕಿ ಬೆಡ್ಗಳು ಈವರೆಗೆ ಲಭ್ಯವಾಗಿಲ್ಲ. ಈ ಬಗ್ಗೆ ಈಟಿವಿ ಭಾರತ್ ಆರೋಗ್ಯ ಇಲಾಖೆಯ ಹೆಚ್ಚುವರಿ ಮುಖ್ಯ ಕಾರ್ಯದರ್ಶಿ ಜಾವೇದ್ ಅಕ್ತರ್ ಅವರಿಗೆ ದೂರವಾಣಿ ಹಾಗೂ ಇ-ಮೇಲ್ ಮೂಲಕ ಸಂಪರ್ಕಿಸಿ ಮಾಹಿತಿ ಕೋರಿದ್ದರೂ ಸ್ಪಷ್ಟನೆ ನೀಡಿಲ್ಲ.
ಯಾವ ಕಾರಣಕ್ಕಾಗಿ ಖಾಸಗಿ ವೈದ್ಯಕೀಯ ಶಿಕ್ಷಣ ಸಂಸ್ಥೆಗಳು ಬೆಡ್ ನೀಡಿಲ್ಲ. ಈ ಸಂಬಂಧ ಸಂಸ್ಥೆಗಳಿಗೆ ಆರೋಗ್ಯ ಇಲಾಖೆ ನೋಟಿಸ್ ಜಾರಿ ಮಾಡಿದೆಯೇ? ಕೋವಿಡ್ ಮೊದಲ ಅಲೆ ವೇಳೆ ಪಡೆದಿದ್ದ ಸೇವೆಗೆ ಸರ್ಕಾರ ಹಿಂಬಾಕಿ ಪಾವತಿಸುವ ಕುರಿತು ಸಂಸ್ಥೆಗಳು ಮನವಿ ಸಲ್ಲಿಸಿವೆಯೇ? ಎಂಬ ಬಗ್ಗೆ ಪ್ರಶ್ನಿಸಿದ್ದರೂ ಮಾಹಿತಿ ನೀಡಿಲ್ಲ. ಇನ್ನು, ಸರ್ಕಾರಕ್ಕೆ ಬೆಡ್ ನೀಡಿಲ್ಲವೇಕೆ ಎಂಬ ಬಗ್ಗೆ ಕೆಲ ಖಾಸಗಿ ವೈದ್ಯಕೀಯ ಶಿಕ್ಷಣ ಸಂಸ್ಥೆಗಳನ್ನು ಪ್ರಶ್ನಿಸಿದಾಗಲೂ ಅವು ಪ್ರತಿಕ್ರಿಯೆ ನೀಡಿಲ್ಲ.
ಸರ್ಕಾರ ಪಾರದರ್ಶಕವಾಗಿರಬೇಕು : ಸರ್ಕಾರ ಹಾಗೂ ಖಾಸಗಿ ವೈದ್ಯಕೀಯ ಸಂಸ್ಥೆಗಳು ಕೋವಿಡ್ ಮಹಾಮಾರಿಯ ಸಮಯವನ್ನು ದುರ್ಬಳಕೆ ಮಾಡಿಕೊಳ್ಳುತ್ತಿವೆ. ಇವರಿಬ್ಬರ ಒಳ ಒಪ್ಪಂದದಿಂದ ಬಡವರಿಗೆ ಹಾಗೂ ತುರ್ತು ಚಿಕಿತ್ಸೆ ಅಗತ್ಯವಿರುವವರೆಗೆ ಚಿಕಿತ್ಸೆ ಸಿಗುತ್ತಿಲ್ಲ.
ಈಗಲಾದರೂ ಸರ್ಕಾರ ಎಚ್ಚೆತ್ತು ಖಾಸಗಿ ಹಾಗೂ ಸರ್ಕಾರಿ ಬೆಡ್‌ಗಳ ಲಭ್ಯತೆ ಬಗ್ಗೆ ಪ್ರತಿನಿತ್ಯ ಸಾರ್ವಜನಿಕರಿಗೆ ಮಾಹಿತಿ ನೀಡಬೇಕು. ಸರ್ಕಾರ ಈ ಸಂದರ್ಭದಲ್ಲಾದರೂ ಪಾರದರ್ಶಕತೆಯಿಂದ ವರ್ತಿಸಬೇಕು ಎಂದು ಕರ್ನಾಟಕ ಜನಾರೋಗ್ಯ ಚಳವಳಿ ಸಹಸಂಚಾಲಕ ವಿಜಯಕುಮಾರ್ ಆಗ್ರಹಿಸಿದ್ದಾರೆ.
| ವೈದ್ಯಕೀಯ ಶಿಕ್ಸಣ ಸಂಸ್ಥೆ | ಕೊಟ್ಟಿರುವ ಹಾಸಿಗೆ ಸಂಖ್ಯೆ | ಕೊಡಬೇಕಿದ್ದ ಹಾಸಿಗೆ ಸಂಖ್ಯೆ | ಬಾಕಿ |
| ಆಕಾಶ್ ಆಸ್ಪತ್ರೆ | 632 | 638 | 6 |
| ಬಿಜಿಎಸ್ | 300 | 533 | 233 |
| ಡಾ ಬಿ ಆರ್ ಅಂಬೇಡ್ಕರ್ | 225 | 518 | 293 |
| ಈಸ್ಟ್ ಪಾಯಿಂಟ್ | 295 | 488 | 193 |
| ಕಿಮ್ಸ್ | 550 | 922 | 372 |
| ಎಂ ಎಸ್ ರಾಮಯ್ಯ | 450 | 1013 | 563 |
| ಎಂ ವಿ ಜೆ | 320 | 625 | 305 |
| ರಾಜರಾಜೇಶ್ವರಿ | 575 | 1050 | 475 |
| ಸಪ್ತಗಿರಿ | 573 | 563 | 10 |
| ಸೇಂಟ್ ಜಾನ್ಸ್ | 629 | 998 | 369 |
| ದಿ ಆಕ್ಸ್ ಫರ್ಡ್ | 200 | 488 | 288 |
| ವೈದೇಹಿ | 400 | 900 | 500 |
| ಒಟ್ಟು | 5149 | 8732 | 3583 |
