ದೊಡ್ಡಬಳ್ಳಾಪುರ: ಪ್ರತಿಯೊಂದು ಗ್ರಾಮದಲ್ಲಿ ಪಂಚಾಯತ್ ವತಿಯಿಂದ ನೀರಿನ ವ್ಯವಸ್ಥೆ ಮಾಡಲಾಗುತ್ತಿದೆ. ಆದರೆ ಈ ಗ್ರಾಮ ಪಂಚಾಯತ್ನಲ್ಲಿ ಐದು ಕುಟುಂಬಳಿಗೆ ಮಾತ್ರ ನೀರಿನ ಭಾಗ್ಯ ಇಲ್ಲ. ರಾಜಕೀಯ ದ್ವೇಷದಿಂದ ಪಿಡಿಒ ನೀರಿನ ಸಂಪರ್ಕ ನೀಡುತ್ತಿಲ್ಲ ಎಂಬ ಆರೋಪ ಕೇಳಿ ಬಂದಿದೆ.
ತಾಲೂಕಿನ ಕೊನಘಟ್ಟ ಗ್ರಾಮ ಪಂಚಾಯತ್ ವ್ಯಾಪ್ತಿಯ ಹಮಾಮ್ ಗ್ರಾಮದ ಇಬ್ರಾಹಿಂ ಎಂಬುವವರು ತಮ್ಮ ಮಕ್ಕಳಿಗಾಗಿ 5 ಮನೆಗಳನ್ನು ನಿರ್ಮಿಸಿದ್ದಾರೆ. ಅವುಗಳಲ್ಲಿ ಕೆಲವು ಮನೆಯನ್ನು ಬಾಡಿಗೆ ನೀಡಿದ್ದಾರೆ. ಈ 5 ಮನೆಗಳಲ್ಲಿ 25 ಜನರು ವಾಸವಾಗಿದ್ದು, ಪಂಚಾಯತ್ ವತಿಯಿಂದ ಪ್ರತಿ ಮನೆಗೂ ನೀರಿನ ಪೂರೈಕೆ ಆಗುತ್ತಿದೆ. ಆದರೆ ಈ 5 ಕುಟುಂಬಗಳಿಗೆ ಮಾತ್ರ ನೀರು ಪೂರೈಕೆ ಆಗುತ್ತಿಲ್ಲ. ಇದರಿಂದ ಕುಟುಂಬಗಳು ಪ್ರತಿದಿನ ನೀರಿಗಾಗಿ ಪರದಾಡುತ್ತಿವೆ.
ಹಲವು ಬಾರಿ ಮನವಿ ಮಾಡಿದ್ರೂ ಪ್ರಯೋಜವಾಗಿಲ್ಲ:
ಮನೆ ಮಾಲೀಕ ನೀರಿನ ಸಂಪರ್ಕ ಕಲ್ಪಿಸುವಂತೆ ಕೊನಘಟ್ಟ ಗ್ರಾ.ಪಂ.ಗೆ ಹಲವು ಬಾರಿ ಮನವಿ ಮಾಡಿದ್ದಾರೆ. ಅಷ್ಟೇ ಅಲ್ಲದೆ ಕೊನಘಟ್ಟ ಗ್ರಾಪಂ ಪಿಡಿಒ ರಘು ಎಂಬುವವರಿಗೆ ಐದು ಮನೆಗಳಿಗೆ ನೀರಿನ ಸಂಪರ್ಕ ನೀಡುವಂತೆ ಖುದ್ದು ಶಾಸಕ ವೆಂಕಟರಮಣಯ್ಯ ತಾಲೂಕು ಪಂಚಾಯತ್ ಕಾರ್ಯ ನಿರ್ವಾಹಣಾಧಿಕಾರಿ ಮುರುಡಯ್ಯ, ತಾ.ಪಂ ಅಧ್ಯಕ್ಷ ನಾರಾಯಣಗೌಡ ಇತರೆ ಜನಪ್ರತಿನಿಧಿಗಳು ಸಾಕಷ್ಟು ಬಾರಿ ಹೇಳಿದರೂ ಪಿಡಿಒ ನೀರಿನ ಸಂಪರ್ಕ ನೀಡಿಲ್ಲವೆಂದು ಇಬ್ರಾಹಿಂ ಆರೋಪಿಸಿದ್ದಾರೆ.
ಪಿಡಿಒ ರಘು ಅವರ ಪ್ರಕಾರ ಇಬ್ರಾಹಿಂ ನಿರ್ಮಿಸಿರುವ ಮನೆಗಳು ಸರ್ಕಾರಿ ಜಾಗದಲ್ಲಿವೆ. ಆದ್ದರಿಂದ ಆ ಮನೆಗಳಿಗೆ ನೀರಿನ ಸಂಪರ್ಕ ಕೊಡಲು ಸಾಧ್ಯವಿಲ್ಲ ಎಂದು ಹೇಳುತ್ತಿದ್ದಾರೆ. 1995ರಲ್ಲಿ ಇಬ್ರಾಹಿಂ ತಮ್ಮ ಜಾಗದಲ್ಲಿನ 6 ಗುಂಟೆ ಜಾಗವನ್ನು ದೇವಸ್ಥಾನದ ರಸ್ತೆಗಾಗಿ ಬಿಟ್ಟು ಕೊಟ್ಟಿದ್ದಾರೆ. ಆದರೆ ಪಿಡಿಒ 5 ಆಡಿ ಜಾಗ ಒತ್ತುವರಿ ಮಾಡಿಕೊಂಡರೆಂದು ಮನೆಗಳಿಗೆ ನೀರಿನ ಸಂಪರ್ಕ ಕೊಡದಿರುವುದು ಯಾವ ನ್ಯಾಯ ಎಂಬುದು ಇಬ್ರಾಹಿಂ ಅವರ ವಾದವಾಗಿದೆ.
ಓದಿ: ಮುದಗಲ್ನಲ್ಲಿ ಬಿಎಸ್ವೈ ಮಠಗಳಿಗೆ ಭೇಟಿ: ಆಲಂ ದರ್ಗಾದತ್ತ ಸುಳಿಯದ ಸಿಎಂ
ರಾಜಕೀಯ ದ್ವೇಷ:
ಕಳೆದ ಗ್ರಾ.ಪಂ. ಚುನಾವಣೆಯಲ್ಲಿ ಇಬ್ರಾಹಿಂ ಅವರ ಮಗ ಸ್ಪರ್ಧಿಸಿದ್ದರು. ಇದು ರಾಜಕೀಯ ದ್ವೇಷಕ್ಕೆ ಕಾರಣವಾಗಿದೆ. ಗ್ರಾಮದ ಇಬ್ಬರು ಗ್ರಾಮ ಪಂಚಾಯತ್ ಸದಸ್ಯರು ನೀರಿನ ಸಂಪರ್ಕ ಕೊಡದಂತೆ ಪಿಡಿಒ ಮೇಲೆ ಒತ್ತಡ ಹಾಕಿದ್ದಾರೆಂಬ ಆರೋಪ ಸಹ ಕೇಳಿ ಬಂದಿದೆ. ಗ್ರಾಮದಲ್ಲಿನ ಕೆಲವು ಮನೆಗಳಿಗೆ ಖಾತೆಯೇ ಇಲ್ಲ. ಇಂತಹ ಮನೆಗಳಿಗೆ ನೀರಿನ ಸಂಪರ್ಕವನ್ನು ಗ್ರಾ.ಪಂ ಕೊಟ್ಟಿರುವಾಗ ಈ ಮನೆಗಳಿಗೆ ನೀರಿನ ಸಂಪರ್ಕ ಕೊಡಲು ಯಾವ ಕಾನೂನು ತೊಡಕಿದೆ ಎಂಬ ಪ್ರಶ್ನೆ ಸಹ ಗ್ರಾಮಸ್ಥರನ್ನು ಕಾಡುತ್ತಿದೆ.
