ಬೆಂಗಳೂರು: ಬೆಳ್ಳಂಬೆಳಗ್ಗೆ ಮತ್ತೆ ಪೊಲೀಸರ ರಿವಾಲ್ವರ್ ಸದ್ದು ಮಾಡಿದೆ. ಇಬ್ಬರು ಕೊಲೆ ಆರೋಪಿಗಳ ಕಾಲಿಗೆ ಗುಂಡು ಹಾರಿಸಿದ ಪೊಲೀಸರು ಆರೋಪಿಗಳನ್ನು ಸೆರೆ ಹಿಡಿಯುವಲ್ಲಿ ಯಶಸ್ವಿಯಾಗಿದ್ದಾರೆ.
ಪ್ರವೀಣ್ ಅಲಿಯಾಸ್ ಹಿಟಾಚಿ, ಅಭಿ ಅಲಿಯಾಸ್ ಅಂದ್ರಳ್ಳಿ ಎಂಬುವರೇ ಪೊಲೀಸರ ಗುಂಡೇಟಿಗೆ ಗಾಯಗೊಂಡವರು. ಆರೋಪಿಗಳಿಗೆ ಸದ್ಯ ಲಕ್ಷ್ಮಿ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಕೊಡಿಸಲಾಗುತ್ತಿದೆ. ಆರೋಪಿಗಳು ಕಾಮಾಕ್ಷಿಪಾಳ್ಯ ಪೊಲೀಸ್ ಠಾಣಾ ವ್ಯಾಪ್ತಿಯ ಹೆಗ್ಗನಹಳ್ಳಿ ಬಳಿ ಮಹೇಶ್‌ಕುಮಾರ್ ಎಂಬಾತನ ಕೊಲೆ ಮಾಡಿದ್ದರು. ಅದೇ ಕಾರಣಕ್ಕೆ ಕಾಮಾಕ್ಷಿಪಾಳ್ಯದ ಕಾವೇರಿಪುರ ಗುಡ್ಡದ ಬಳಿ ಆ ಕೊಲೆ ಆರೋಪಿಗಳಿರುವ ಮಾಹಿತಿ ಮೇರೆಗೆ ಕಾಮಾಕ್ಷಿಪಾಳ್ಯ ಪೊಲೀಸರು ಹೋಗಿದ್ದರು.
ಈ ವೇಳೆ ಆರೋಪಿಗಳು ಕಾನ್ಸ್‌ಟೇಬಲ್ ವಸಂತ ಕುಮಾರ್ ಕೈಗೆ ಮಾರಾಕಾಸ್ತ್ರದಿಂದ ಹಲ್ಲೆ ಮಾಡಿದ್ದಾರೆ. ಆಗ ಆರೋಪಿಗಳ ಕಾಲಿಗೆ ಇನ್ಸ್‌ಪೆಕ್ಟರ್ ಗೌತಮ್ ಫೈರಿಂಗ್ ಮಾಡಿದಾಗ ಅಭಿ ಬಲಗಾಲಿಗೆ, ಪ್ರವೀಣನ ಎಂಬಾತನ ಎಡಗಾಲಿಗೆ ಗುಂಡು ಹೊಕ್ಕಿದೆ.
2014ರಲ್ಲಿ ತಾವರೆಕೆಯಲ್ಲಿ ರೌಡಿ ಸೂರಿ ಕೊಲೆಯಾಗಿತ್ತು. ಸೂರಿ ಹತ್ಯೆ ಪ್ರಕರಣದಲ್ಲಿ ಮಹೇಶ್ ಭಾಗಿಯಾಗಿದ್ದ, ಇದೇ ಪ್ರತೀಕಾರಕ್ಕೆ ಮಹೇಶನನ್ನು ಕೊಲೆ ಮಾಡಲಾಗಿದೆ. ಸದ್ಯ ಆರೋಪಿಗಳು ಸ್ಲಂ ಭರತನ ಸಹಚರರಾಗಿದ್ದು ಹಲವಾರು ಕೊಲೆ, ಕೊಲೆಯತ್ನ, ಡಕಾಯಿತಿ ಪ್ರಕರಣದಲ್ಲಿ ಭಾಗಿಯಾಗಿದ್ದಾರೆ. ಸದ್ಯ ಕಾಮಾಕ್ಷಿಪಾಳ್ಯ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು, ತನಿಖೆ ಮುಂದುವರೆದಿದೆ.
