ಆತ ಟಾಯ್ಲೆಟ್​​ಗೆ ಹೋಗಿ ಬರುವಷ್ಟರಲ್ಲಿ ಸೃಷ್ಟಿಯಾಯ್ತು ಬಾಂಬ್ ಕಥೆ, ತಡವಾಗಿದ್ದಕ್ಕೆ ಏನೆಲ್ಲಾ ಅನಾಹುತವಾಯ್ತು!

ವ್ಯಕ್ತಿಯೋರ್ವ ಟಾಯ್ಲೆಟ್​ಗೆ ಹೋಗುವಾಗ ಶೌಚಾಲಯದ ಹೊರಗಡೆ ಇರಿಸಿಹೋಗಿದ್ದ ಸೂಟ್​ಕೇಸ್​​ ಕಂಡು ಸಾರ್ವಜನಿಕರು ಭಯಭೀತರಾದ ಘಟನೆ ಸಿಲಿಕಾನ್​ ಸಿಟಿಯಲ್ಲಿ ನಡೆದಿದೆ.

ಬೆಂಗಳೂರು: ಜನನಿಬಿಡ ಪ್ರದೇಶದಲ್ಲಿ ಕಂಡುಬಂದ ಸೂಟ್​ಕೇಸ್​ ಕಂಡು ಜನರು ಆತಂಕಗೊಂಡ ಘಟನೆ ಮಾಗಡಿ ರೋಡ್ ಪೊಲೀಸ್ ಠಾಣೆಯ ಪೊಲೀಸ್ ಚೌಕಿ ಬಳಿ ನಡೆದಿದೆ.

ಅಪರಿಚಿತ ಸೂಟ್​​​ಕೇಸ್ ಕಂಡ ಸಾರ್ವಜನಿಕರು ಬಾಂಬ್ ಇರುವುದೆಂದು ಭಾವಿಸಿ ಆತಂಕಕ್ಕೆ ಒಳಗಾಗಿ ಪೊಲೀಸರಿಗೆ ಮಾಹಿತಿ ನೀಡಿದ್ದಾರೆ. ಕೂಡಲೇ ಆಲರ್ಟ್ ಅದ ಪೊಲೀಸರು ಸ್ಥಳಕ್ಕೆ ಬಂದು ಪರಿಶೀಲಿಸಿದರು. ಅಲ್ಲದೆ ಶ್ವಾನದಳವೂ ಬಂದು ತಪಾಸಣೆ ನಡೆಸಿತು. ಈ ಬೆಳವಣಿಗೆ ಮಧ್ಯೆ ತಮಿಳುನಾಡು ಮೂಲದ ರವಿ ಎಂಬುವರು ಬಂದು ಪೊಲೀಸರಿಗೆ ಸೂಟ್ ಕೇಸ್ ನನ್ನದು. ಸೂಟ್​​​ಕೇಸ್​​ನಲ್ಲಿ ಬಾಂಬ್ ಹಾಗೂ ಇತರ ಯಾವುದೇ ಅನುಮಾನಾಸ್ಪದ ವಸ್ತು ಇಲ್ಲ ಎಂದಿದ್ದಾನೆ. ಇದನ್ನು ಕೇಳಿದ ಎಲ್ಲರೂ ನೆಮ್ಮದಿಯ ನಿಟ್ಟುಸಿರುಬಿಟ್ಟಿದ್ದಾರೆ.

ಟಾಯ್ಲೆಟ್​​​ಗೆ ಹೋಗಿ ಬರುವಷ್ಟರಲ್ಲಿ ಸೃಷ್ಟಿಯಾಯ್ತು ಬಾಂಬ್ ಕಥೆ:

ತಮಿಳುನಾಡಿನ‌ ಮೂಲದ ರವಿ ಕೆಲಸ ಹುಡುಕಿಕೊಂಡು ಬೆಂಗಳೂರಿಗೆ ಬಂದಿದ್ದು, ಮಾಗಡಿ ರೋಡ್​​ ಬಳಿ ತೆರಳಿದ್ದ. ಸೂಟ್​​ಕೇಸ್​​ನ್ನು ಪ್ರಸನ್ನ ಥಿಯೇಟರ್ ಮುಂದಿದ್ದ ಪೊಲೀಸ್ ಚೌಕಿ ಬಳಿ ಇಟ್ಟು ಸಮೀಪದಲ್ಲಿರುವ ಸುಲಭ ಶೌಚಾಲಯ ಹೋಗಿದ್ದ. ಆದರೆ ಮರಳಿ ಬರೋದು ತಡವಾಗಿದ್ದರಿಂದ ಇಷ್ಟೆಲ್ಲ ಅವಾಂತರ ಸೃಷ್ಟಿಯಾಗಿತ್ತು.