ಬೆಂಗಳೂರು/ಬೆಳಗಾವಿ/ವಿಜಯಪುರ: ದೇಶದೆಲ್ಲೆಡೆ ಮಹಾಮಾರಿ ಸೋಂಕು ಹೊಸ ಸ್ವರೂಪದಲ್ಲಿ ಅತ್ಯಂತ ವೇಗವಾಗಿ ಹಬ್ಬಿ ಜನರ ನಿದ್ದೆಗೆಡಿಸಿದೆ. ಲಾಕ್ಡೌನ್ನಿಂದ ಸೋಂಕು ಪ್ರಕರಣಗಳು ಇಳಿಕೆಯಾಗುತ್ತಿದ್ದರೂ ಸಮಸ್ಯೆ ಸಂಪೂರ್ಣ ಸರಿಯಾಗೋ ತನಕ ಜನ್ರಿಗೆ ಕೊರೊನಾ ಕಾಟ ತಪ್ಪಿದ್ದಲ್ಲ. ಕೋವಿಡ್ ಎರಡನೇ ಅಲೆ ಆರ್ಭಟಕ್ಕೆ ಬೆಚ್ಚಿಬಿದ್ದಿರುವ ಜನ ಲಸಿಕೆ ಮೊರೆ ಹೋಗುತ್ತಿದ್ದು, ಇದರಲ್ಲೂ ಹಲವು ಗೊಂದಲಗಳು ಸೃಷ್ಟಿಯಾಗಿವೆ. ಲಸಿಕೆಯ ಮೊದಲ ಡೋಸ್ ಪಡೆದವರಿಗೆ ಎರಡನೇ ಡೋಸ್ನ ಮೆಸೇಜ್ ಬರದೇ ಪರದಾಡುತ್ತಿದ್ದಾರೆ.
ಬೆಂಗಳೂರಿನಲ್ಲಿ 3 ಸಾವಿರಕ್ಕೂ ಅಧಿಕ ಲಸಿಕಾ ಕೇಂದ್ರಗಳಲ್ಲಿ ಲಸಿಕೆ ಹಾಕಲಾಗುತ್ತಿದ್ದು, ಲಸಿಕೆಯ ಕೊರತೆಯೇ ಲಸಿಕಾಭಿಯಾನಕ್ಕೆ ಅಡ್ಡಿಯಾಗಿದೆ. ದತ್ತಾಂಶ ಅಪ್ಲೋಡ್ ಮಾಡುವುದರಲ್ಲಿಯೂ ಕೆಲ ತಾಂತ್ರಿಕ ಸಮಸ್ಯೆ ಎದುರಾಗುತ್ತಿದೆ. ಆದರೂ ಆರೋಗ್ಯ ಇಲಾಖೆ ಕಾರ್ಯಕರ್ತರು ತಾಳ್ಮೆಯಿಂದ ಕೆಲಸ ಮಾಡುತ್ತಿದ್ದಾರೆ.
ಬೆಳಗಾವಿಯಲ್ಲಿ ಲಸಿಕಾಕರಣದ ಆರಂಭದಲ್ಲಿ ಮಾಹಿತಿ ಅಪ್ಲೋಡ್ ಮಾಡುವಲ್ಲಿ ಕಾಣಿಸಿಕೊಂಡ ತಾಂತ್ರಿಕ ಸಮಸ್ಯೆಯಿಂದ ಮೊದಲ ಡೋಸ್ ಪಡೆದವರು ಎರಡನೇ ಡೋಸ್ಗೆ ಮೆಸೇಜ್ ಬರದೇ ಪರದಾಡಿದ್ದರು. ಜನಾಕ್ರೋಶಕ್ಕೆ ಮಣಿದ ಜಿಲ್ಲಾಡಳಿತ, ಮೊದಲ ಡೋಸ್ ಪಡೆದವರಿಗೆ ಮೆಸೇಜ್ ಬರಲಿ, ಬಿಡಲಿ ಎರಡನೇ ಡೋಸ್ ನೀಡಲು ಮುಂದಾಯ್ತು. ಇದೀಗ ಕೇಂದ್ರ ಸರ್ಕಾರವೇ ಕೋವಿನ್ ವೆಬ್ಸೈಟ್ ಅಭಿವೃದ್ಧಿಪಡಿಸಿದ್ದು, 18 ವರ್ಷ ಮೇಲ್ಪಟ್ಟವರು ಲಸಿಕೆಗಾಗಿ ನೋಂದಣಿ ಮಾಡಿಕೊಳ್ಳಬೇಕಿದೆ.
ವಿಜಯಪುರ ಜಿಲ್ಲೆಯಲ್ಲಿ ಮಹಾಮಾರಿ ಸೋಂಕು ನಿಯಂತ್ರಣಕ್ಕೆ ಬರುತ್ತಿದ್ರೂ ಸಹ ಲಸಿಕೆ ಕುರಿತು ಗೊಂದಲ ಮುಂದುವರೆದಿದೆ. ಸಾಕಷ್ಟು ಮಂದಿಗೆ ಎರಡನೇ ಲಸಿಕೆ ದಿನ ಬಂದಿದ್ದರೂ ಕೂಡ ಮೆಸೇಜ್ ಮಾತ್ರ ಬರದೇ ಪರದಾಡುವಂತಾಗಿದೆ. ಈ ಸಂಬಂಧ ಜಿಲ್ಲಾಡಳಿತ ಕ್ರಮ ಕೈಗೊಳ್ಳುತ್ತಿದೆ.
ಇದೀಗ 18ರಿಂದ 44 ವರ್ಷ ವಯೋಮಾನದವರು ಕೋವಿನ್ ವೆಬ್ಸೈಟ್ ಮೂಲಕ ಲಸಿಕೆಗಾಗಿ ತಮ್ಮ ಹೆಸರನ್ನು ನೋಂದಣಿ ಮಾಡಿಕೊಳ್ಳಬೇಕಿದೆ. ಬಳಿಕ ಲಸಿಕೆ ಪಡೆಯುವ ಸ್ಥಳ, ದಿನಾಂಕದ ಕುರಿತು ಮೆಸೇಜ್ ಬರಲಿದ್ದು, ಆ ಪ್ರಕಾರವಾಗಿ ಲಸಿಕೆ ಪಡೆಯಬಹುದಾಗಿದೆ. ಆದ್ರೆ ರಾಜ್ಯದಲ್ಲಿ ಲಸಿಕೆ ಕೊರತೆ ಇರೋದೊಂತು ಸತ್ಯ. 45 ವರ್ಷ ಮೇಲ್ಟಟ್ಟವರಿಗೆ, 18 ವರ್ಷ ಮೇಲ್ಪಟ್ಟ ಮುಂಚೂಣಿ ಕಾರ್ಯಕರ್ತರಿಗೆ ಮೊದಲ ಆದ್ಯತೆ ನೀಡಿ ಲಸಿಕೆ ಹಾಕಲಾಗುತ್ತಿದೆ.
ಲಸಿಕೆ ಪಡೆಯುವವರ ದತ್ತಾಂಶ ಅಪ್ಲೋಡ್ ಮಾಡುವಲ್ಲಿ ಕಂಡುಬಂದ ಸಮಸ್ಯೆ ಪರಿಹರಿಸುವ ಕೆಲಸ ಆಗುತ್ತಿದೆ. ಲಸಿಕಾ ಕೇಂದ್ರದಲ್ಲೇ ರಿಜಿಸ್ಟರ್, ಲಸಿಕೆ ಪಡೆಯುವವರಿಗೆ ಒಟಿಪಿ ನಂಬರ್ ಹೀಗೆ ಸುಧಾರಣಾ ಕ್ರಮಗಳನ್ನು ತರುತ್ತಾ ಜನ್ರ ಸಮಸ್ಯೆಯನ್ನು ಸರ್ಕಾರ ನಿವಾರಿಸುತ್ತಿದೆ ಎಂದರೆ ತಪ್ಪಾಗಲಾರದು.
