ಬೆಂಗಳೂರು : ಕೆಎಸ್ಆರ್ಟಿಸಿ ಗುಜರಿ ಬಸ್ಗಳು ಲಕ ಲಕ ಹೊಳೆಯುತ್ತಿವೆ. ರೀ ಬೋರ್, ರೀ ಬಾಡಿ ಬಿಲ್ಡ್ನೊಂದಿಗೆ ಹೊಸ ಬಸ್ಗಳಂತೆ ಮಾರ್ಪಾಡಾಗಿ ಮತ್ತೆ ರಸ್ತೆಗಿಳಿಯುತ್ತಿವೆ. ಕೇಂದ್ರ ಸರ್ಕಾರದ ಗುಜರಿ ನೀತಿಯನ್ನೇ ಸಮರ್ಪಕವಾಗಿ ಅಳವಡಿಸಿಕೊಂಡ ಕೆಎಸ್ಆರ್ಟಿಸಿ, ಗುಜರಿ ಸೇರುತ್ತಿದ್ದ ಬಸ್ಗಳನ್ನೇ ಮತ್ತೆ ಎರಡು ಮೂರು ವರ್ಷ ರಸ್ತೆಗಿಳಿಸುತ್ತಿದೆ. ಹೀಗಾಗಿ ಡಕೋಟ ಬಸ್ಗಳಿನ್ನು ಹೊಸ ಬಸ್ಗಳಂತೆ ರೂಪುಗೊಳ್ಳಲಿವೆ.
ಹೌದು, 10 ಲಕ್ಷ ಕಿಲೋಮೀಟರ್ ದೂರ ಕ್ರಮಿಸಿ ಗುಜರಿ ಸೇರುತ್ತಿದ್ದ ಕೆಎಸ್ಆರ್ಟಿಸಿ ಬಸ್ಗಳಿಗೆ ಹೊಸ ಸ್ಪರ್ಶ ನೀಡಿ ಮತ್ತೆ 5 ಲಕ್ಷ ಕಿಲೋಮೀಟರ್ ಸಂಚಾರಕ್ಕೆ ಬಳಸಿಕೊಳ್ಳಲು ಸಾರಿಗೆ ನಿಗಮ ಮುಂದಾಗಿದೆ. ಈಗಾಗಲೇ ಚಾಲನೆಯನ್ನೂ ನೀಡಿದೆ. ಈಗಾಗಲೇ ಸುಮಾರು 15 ಡಿಪೋಗಳು ಮತ್ತು ಎರಡು ಪ್ರಾದೇಶಿಕ ಕಾರ್ಯಾಗಾರದಲ್ಲಿ ನವೀಕರಣ ಕಾರ್ಯಕ್ರಮ ನಡೆಯುತ್ತಿದೆ. ಪ್ರತಿ ವರ್ಕ್‌ಶಾಪ್‌ಗಳು ತಿಂಗಳಿಗೆ 50 ಬಸ್ಗಳನ್ನು ಸಂಪೂರ್ಣವಾಗಿ ನವೀಕರಣಗೊಳಿಸುತ್ತಿವೆ.
ನವೀಕರಣ ಕಾರ್ಯ : 8-10 ಲಕ್ಷ ಕಿಲೋಮೀಟರ್ ಓಡಿದ ಬಸ್ಗಳು ಬಹುತೇಕ ಶಿಥಿಲಾವಸ್ಥೆ ತಲುಪಿರುತ್ತವೆ. ತುಕ್ಕು ಹಿಡಿದು ಡಕೋಟಾ ಬಸ್ಗಳಂತಾಗಿರುತ್ತವೆ. ಬಸ್ನ ಕವಚ ಹಾನಿಗೊಂಡು ಬಿಡಿಭಾಗಗಳೆಲ್ಲಾ ಸದ್ದು ಮಾಡುತ್ತಿರುತ್ತವೆ. ಇನ್ನೇನು ಗುಜರಿಗೆ ಹಾಕುವುದೊಂದೇ ಬಾಕಿ ಇರುತ್ತದೆ. ಅಂತಹ ಬಸ್ಗಳನ್ನು ಮೊದಲು ಗುರುತಿಸಲಾಗುತ್ತದೆ. ಗುಜರಿಗೆ ಕೊಂಡೊಯ್ಯಲು ಸಿದ್ದವಾಗಿದ್ದ ಬಸ್ಗಳನ್ನು ಕೆಎಸ್ಆರ್ಟಿಸಿಯ ಕಾರ್ಯಾಗಾರಕ್ಕೆ ತರಲಾಗುತ್ತದೆ.
ಕಾರ್ಯಾಗಾರಕ್ಕೆ ಡಕೋಟಾ ಬಸ್ ಬರುತ್ತಿದ್ದಂತೆ ಮೊದಲ ಮಾಡುವ ಕೆಲಸ ಬಸ್ನ ತುಕ್ಕು ಹಿಡಿದ ಮತ್ತು ಹಾನಿಗೊಳಗಾದ ಎಲ್ಲಾ ಭಾಗಗಳನ್ನು ಹೊರತೆಗೆಯುವುದು. ಬಳಿಕ ಬಸ್ನ ಎಲ್ಲಾ ಭಾಗಗಳನ್ನು ಬಿಚ್ಚಿ ಸಂಪೂರ್ಣವಾಗಿ ವಾಹನವನ್ನು ದುರಸ್ತಿಗೊಳಿಸಲಾಗುತ್ತದೆ. ಇಂಜಿನ್ ಅನ್ನು ಬಿಚ್ಚಿ ರೀ ಬೋರ್ ಮಾಡಲಾಗುತ್ತದೆ. ಚಾಸಿ ದಕ್ಷವಾಗಿರುವಂತೆ ಅಗತ್ಯ ದುರಸ್ತಿ ಕೆಲಸ ಮಾಡಲಾಗುತ್ತದೆ. ವೆಲ್ಡಿಂಗ್, ವೈರಿಂಗ್ನಿಂದ ಎಲ್ಲ ಕೆಲಸ ಮಾಡಿ ನಂತರವೇ ಮತ್ತೆ ಬಸ್ನ ಜೋಡಿಸಲಾಗುತ್ತದೆ. ಪ್ಯಾನೆಲಿಂಗ್ ಕೆಲಸ ಮುಗಿಸಿ, ಬಸ್ನ ಹೊರಭಾಗಕ್ಕೆ ಹೊಸ ಲೋಹದ ಹಾಳೆಗಳನ್ನು ಬಳಸಲಾಗುತ್ತದೆ.
ಕಿಟಕಿಗಳು ಮತ್ತು ವಿಂಡ್‌ಶೀಲ್ಡ್‌ಗಳ ಮೇಲಿನ ಗ್ಲಾಸ್‌ಗಳನ್ನು ಬದಲಾಯಿಸಲಾಗುತ್ತದೆ. ಶೀಟ್ ಕುಶನ್‌ಗಳು ಮತ್ತು ಡ್ರೆಸಿಂಗ್‌ಗಳನ್ನು ಹೊಸ ಕೋಟ್‌ನೊಂದಿಗೆ ಪುನಃ ಮಾಡಲಾಗುತ್ತದೆ. ಆ ಮೂಲಕ ಗುಜರಿ ಬಸ್ ಶೋರೋಂನಿಂದ ಬಂದ ಹೊಸ ಬಸ್ನ ರೀತಿಯಲ್ಲಿಯೇ ಸಿದ್ದವಾಗುತ್ತದೆ. ಇಂಜಿನ್ ಕ್ಷಮತೆ ಹಾಗೂ ಬಸ್ನ ಹೊರಕವಚ ದಕ್ಷವಾಗಿದ್ದು, ಹೊಸ ಬಸ್ ಗೂ ನವೀಕರಣಗೊಂಡ ಬಸ್ಗೂ ವ್ಯತ್ಯಾಸ ಗೊತ್ತಾಗದ ರೀತಿ ಬಸ್ ಸಿದ್ದವಾಗಿ ನಿಂತಿರುತ್ತದೆ.
ಕೆಎಸ್ಆರ್ಟಿಸಿಯಲ್ಲಿ 8 ಸಾವಿರಕ್ಕೂ ಹೆಚ್ಚು ಬಸ್ಗಳು: ಸದ್ಯ ಕೆಎಸ್ಆರ್ಟಿಸಿ ಬಳಿ 8 ಸಾವಿರಕ್ಕೂ ಹೆಚ್ಚಿನ ಬಸ್ಗಳಿದ್ದು, ಅದರಲ್ಲಿ ಅಂದಾಜು 2 ಸಾವಿರದಷ್ಟು ಬಸ್ಗಳು 10 ಲಕ್ಷ ಕಿಲೋಮೀಟರ್ ದೂರವನ್ನು ಕ್ರಮಿಸಿವೆ. ಅದರಲ್ಲಿ ಸದ್ಯ ಗುಜರಿ ಸೇರಬೇಕಿದ್ದ 500ಕ್ಕೂ ಹೆಚ್ಚಿನ ಬಸ್ಗಳನ್ನು ನವೀಕರಣಗೊಳಿಸಿ ರಸ್ತೆಗಿಳಿಸಲಾಗಿದೆ. ಇನ್ನು 1300 ಬಸ್ಗಳನ್ನು ನವೀಕರಣಗೊಳಿಸಲು ಸಿದ್ಧತೆ ಮಾಡಿಕೊಳ್ಳಲಾಗಿದೆ. ಕೇಂದ್ರದ ಗುಜರಿ ನೀತಿಯ ಪ್ರಕಾರ, 10 ಲಕ್ಷ ಕಿಲೋಮೀಟರ್ ಅಥವಾ 15 ವರ್ಷ ದಾಟಿದ ಬಸ್ಗಳನ್ನು ರಸ್ತೆಗಿಳಿಸುವಂತಿಲ್ಲ.
ಆದರೆ, 10 ವರ್ಷಕ್ಕೆ 10 ಲಕ್ಷ ಕಿಲೋಮೀಟರ್ ದೂರವನ್ನು ಕೆಎಸ್ಆರ್ಟಿಸಿ ಬಸ್ಗಳು ಕ್ರಮಿಸುತ್ತಿವೆ. ಹಾಗಾಗಿ 10 ವರ್ಷಕ್ಕೆ ಈ ಬಸ್ಗಳನ್ನು ಗುಜರಿಗೆ ಹಾಕಲಾಗುತ್ತಿದೆ. ಇದನ್ನು ತಪ್ಪಿಸಲು ರಾಜ್ಯ ಸಾರಿಗೆ ಸಂಸ್ಥೆ ಹಳೆ ಬಸ್ಗಳನ್ನು ಇಂಜಿನ್ ರೀಬೋರ್ನಿಂದ ಹಿಡಿದು ಸಂಪೂರ್ಣವಾಗಿ ಹೊಸದರಂತೆ ಮಾರ್ಪಡಿಸಿ, 15 ವರ್ಷದ ಮಿತಿಯವರೆಗೂ ಬಸ್ಗಳನ್ನು ಓಡಿಸಲು ಮಾಸ್ಟರ್ ಪ್ಲಾನ್ ಮಾಡಿ, ಗುಜರಿ ನೀತಿಯ ನಿಯಮ ಉಲ್ಲಂಘನೆಯಾಗದಂತೆ ಬಸ್ಗಳನ್ನು ಹೆಚ್ಚುವರಿಯಾಗಿ 4-5 ಲಕ್ಷ ಕಿಲೋಮೀಟರ್ ಹಾಗೂ ಮತ್ತೆ ನಾಲ್ಕೈದು ವರ್ಷಗಳ ಕಾಲ ಓಡಿಸಲು ಆರಂಭಿಸಿದೆ.
