ಆನೇಕಲ್: ಬನ್ನೇರುಘಟ್ಟ ಜೈವಿಕ ಉದ್ಯಾನವನಕ್ಕೆ ಹೊಸ ಅತಿಥಿಯ ಆಗಮನವಾಗಿದೆ. ಸೋಮವಾರ ಬೆಳಗ್ಗೆ ಝೀಬ್ರಾ ಮರಿಯೊಂದು ಜನಿಸಿದೆ. ಹತ್ತು ವರ್ಷ ವಯಸ್ಸಿನ ಕಾವೇರಿ-ಭರತ್ ಜೋಡಿಗೆ ಈ ಮರಿ ಜನಿಸಿದೆ. ಈ ಮೂಲಕ ಝೀಬ್ರಾಗಳ ಸಂಖ್ಯೆ ಐದಕ್ಕೆ ಏರಿಕೆಯಾಗಿದೆ. ತಾಯಿ ಮತ್ತು ಮರಿ ಗಾಬರಿಯಾಗದಂತೆ ಅವುಗಳ ಸುರಕ್ಷತೆಗಾಗಿ ವಿಶೇಷ ಕಾಳಜಿಯನ್ನು ವಹಿಸಲಾಗಿದೆ ಎಂದು ಉಪ ನಿರ್ದೇಶಕ ಕೆ.ಹರೀಶ್ ತಿಳಿಸಿದ್ದಾರೆ.
ತಾಯಿ ಮತ್ತು ಮರಿ ಎರಡು ಆರೋಗ್ಯಕರವಾಗಿವೆ. ಮರಿಯ ಲಿಂಗವನ್ನು ಇನ್ನೂ ನಿರ್ಧರಿಸಲಾಗಿಲ್ಲ. ಇದಕ್ಕೆ ಇನ್ನೂ ಹದಿನೈದು ದಿನ ಕಾಯಬೇಕಿದೆ ಎಂದು ಪಶು ಸೇವೆಗಳ ಸಹಾಯಕ ನಿರ್ದೇಶಕ ಡಾ. ಕೆ.ಎಸ್. ಉಮಾಶಂಕರ್ ತಿಳಿಸಿದ್ದಾರೆ. ಎಳೆ ಮರಿ ಝೀಬ್ರಾ ಮತ್ತು ತಾಯಿ ಪಶುವೈದ್ಯಕೀಯ ತಂಡ ಮತ್ತು ಪ್ರಾಣಿಪಾಲಕರ ವೀಕ್ಷಣೆಯಲ್ಲಿದೆ.
ಸಾಮಾನ್ಯವಾಗಿ ಝೀಬ್ರಾಗಳ ಗರ್ಭಾವಸ್ಥೆಯ ಅವಧಿ ಸುಮಾರು ಒಂದು ವರ್ಷವಾಗಿದ್ದು, ಆರಂಭಿಕವಾಗಿ ಮರಿಯು ಕಂದು ಬಣ್ಣದ ಪಟ್ಟೆಗಳನ್ನು ಹೊಂದಿರುತ್ತದೆ. ಅದು ಅಂತಿಮವಾಗಿ ಕಪ್ಪು ಬಣ್ಣಕ್ಕೆ ಮಾರ್ಪಾಡಾಗುತ್ತದೆ. ಪ್ರಸ್ತುತ ಹೊಸದಾಗಿ ಹುಟ್ಟಿದ ಮರಿಯು ತನ್ನ ತಾಯಿ ಕಾವೇರಿ, ಭರತ್, ಹರಿಶ್ಚಂದ್ರ ಮತ್ತು ಕಬಿನಿಯೊಂದಿಗೆ ಆಟವಾಡುತ್ತಿರುವುದನ್ನು ನೋಡಲು ಮೃಗಾಲಯ ವೀಕ್ಷಕರಿಗೆ ಮುಕ್ತ ಅವಕಾಶ ಒದಗಿಸಿದೆ.
ಇದನ್ನೂ ಓದಿ: ಕಾಲುವೆಯಲ್ಲಿ ಮುಳುಗಿ ಪಿಯು ವಿದ್ಯಾರ್ಥಿ ಸಾವು : ಶವಕ್ಕಾಗಿ ಶೋಧ
