ಬೆಂಗಳೂರು: ನಾಳೆಯಿಂದ 'ನಮ್ಮ ಕಾರ್ಗೋ' ಸೇವೆಯನ್ನು ಸಾರಿಗೆ ಇಲಾಖೆ ಜಾರಿಗೆ ತರಲಿದ್ದು, ಸಾರಿಗೆ ನಿಗಮಗಳ ನಷ್ಟ ಭರಿಸಲು ಇದು ಸಹಕಾರಿಯಾಗಲಿದೆ ಎಂದು ಡಿಸಿಎಂ ಹಾಗೂ ಸಾರಿಗೆ ಸಚಿವ ಲಕ್ಷ್ಮಣ ಸವದಿ ತಿಳಿಸಿದರು.
ಓದಿ: ಜಲ ವಿವಾದಗಳ ಶೀಘ್ರ ಇತ್ಯರ್ಥ; ಉನ್ನತ ಮಟ್ಟದ ಸಭೆ ಕರೆದ ಸಚಿವ ರಮೇಶ್ ಜಾರಕಿಹೊಳಿ
ವಿಕಾಸಸೌಧದಲ್ಲಿ ಮಾತನಾಡಿದ ಅವರು, ಕಾರ್ಗೋ ಸೇವೆಗೆ ಸಿಎಂ ನಾಳೆ ವಿಧಾನಸೌಧದ ಮುಂಭಾಗ ಚಾಲನೆ ನೀಡಲಿದ್ದಾರೆ. ಬಿಎಂಟಿಸಿ ಹೊರತುಪಡಿಸಿ, ಕೆಎಸ್ಆರ್ಟಿಸಿ, ಎನ್ಡಬ್ಲ್ಯೂಎಸ್ಆರ್ಟಿಸಿ, ಎನ್ಇಕೆಎಸ್ಆರ್ಟಿಸಿ ಸಂಸ್ಥೆಗಳಲ್ಲಿ ಕಾರ್ಗೊ-ಪಾರ್ಸಲ್ ಸೇವೆ ಪ್ರಾರಂಭಿಸಲಿದ್ದೇವೆ. ಒಟ್ಟು 109 ಬಸ್ ನಿಲ್ದಾಣಗಳಲ್ಲಿ ಈ ಸೌಲಭ್ಯ ಲಭ್ಯವಾಗಲಿದೆ ಎಂದು ವಿವರಿಸಿದರು.
ನೆರೆ ರಾಜ್ಯಗಳಾದ ಮಹಾರಾಷ್ಟ್ರ, ತಮಿಳುನಾಡು, ಆಂಧ್ರ, ತೆಲಂಗಾಣ ಮತ್ತು ಗೋವಾಗೆ ಸಹ ಈ ಸೌಲಭ್ಯ ಸಿಗಲಿದೆ. ಕೆಎಸ್ಆರ್ಟಿಸಿ 35, ಎನ್ಡಬ್ಲ್ಯೂ ಎಸ್ಆರ್ಟಿಸಿ ನಿಗಮದಿಂದ 26, ಎನ್ಇಕೆಎಸ್ಆರ್ಟಿಸಿ 27, ಅಂತರ ರಾಜ್ಯ 21 ಬಸ್ ನಿಲ್ದಾಗಳಲ್ಲಿ ಪ್ರಥಮ ಹಂತದ ಲಾಜಿಸ್ಟಿಕ್ ಕಾರ್ಯನಿರ್ವಹಿಸಲಿದೆ ಎಂದು ತಿಳಿಸಿದರು.
ಕೋವಿಡ್ನಿಂದಾಗಿ ಇಲ್ಲಿಯ ತನಕ 2,720 ಕೋಟಿ ರೂ. ಸಾರಿಗೆ ಇಲಾಖೆಗೆ ನಷ್ಟ ಆಗಿದೆ. ಈ ನಷ್ಟ ಭರಿಸಲು ಈ ಯೋಜನೆ ಜಾರಿಗೆ ತರಲಾಗಿದೆ. ಇಲ್ಲಿಯವರೆಗೆ ಖಾಸಗಿಯವರು ಈ ಸೇವೆ ಮಾಡುತ್ತಾ ಇದ್ದಾರೆ. ಈಗ ಸರ್ಕಾರ ಕೂಡ ಕಾರ್ಗೋ ಮತ್ತು ಪಾರ್ಸಲ್ ವ್ಯವಸ್ಥೆ ಮಾಡುತ್ತಿದೆ. ಇದರಿಂದ ವಾರ್ಷಿಕ 70-80 ಕೋಟಿ ರೂ. ಲಾಭದ ನಿರೀಕ್ಷೆ ಇದೆ ಎಂದು ತಿಳಿಸಿದರು.
ಮುಂದಿನ ದಿನಗಳಲ್ಲಿ ಎರಡನೇ ಹಂತದಲ್ಲಿ ಅಗತ್ಯಕ್ಕನುಗುಣವಾಗಿ ಬಸ್ ನಿಲ್ದಾಣಗಳನ್ನು ಹೆಚ್ಚಿಸುವುದರ ಜೊತೆಗೆ ಮನೆ ಬಾಗಿಲಿಗೆ ಸೇವೆ ಒದಗಿಸಲು ಚಿಂತಿಸುತ್ತಿದ್ದೇವೆ ಎಂದರು.
