ಬೆಂಗಳೂರು: "ಲಾಭ ಆಗುತ್ತದೆ ಅನ್ನೋ ದೃಷ್ಟಿಯಿಂದ ಸಮುದಾಯವಾರು ಡಿಸಿಎಂ ಮಾಡಬೇಕು ಅಂತ ಹೈಕಮಾಂಡ್ಗೆ ಸಲಹೆ ಕೊಟ್ಟಿದ್ದೇವೆ" ಎಂದು ಸಚಿವ ಕೆ.ಎನ್.ರಾಜಣ್ಣ ತಿಳಿಸಿದರು. ಬೆಂಗಳೂರಲ್ಲಿ ಇಂದು ಮಾತನಾಡಿದ ಅವರು, ಸಮುದಾಯವಾರು ಡಿಸಿಎಂ ರಚನೆಯಿಂದ ಲೋಕಸಭೆ ಚುನಾವಣೆಗೆ ಅನುಕೂಲ ಎಂಬ ವಿಚಾರವಾಗಿ ಪ್ರತಿಕ್ರಿಯಿಸಿ, "ಸಮುದಾಯವಾರು ಡಿಸಿಎಂ ಮಾಡುವ ತೀರ್ಮಾನ ಹೈಕಮಾಂಡ್ಗೆ ಬಿಟ್ಟಿದ್ದು. ಅವರು ಏನು ತೀರ್ಮಾನ ಮಾಡ್ತಾರೋ ಅದಕ್ಕೆ ಒಪ್ಪಿಗೆ ಇದೆ. ಹೈಕಮಾಂಡ್ಗೆ ನಮ್ಮ ಅಭಿಪ್ರಾಯ ಹೇಳಲು ನಾವು ಬದ್ಧರಾಗಿದ್ದೇವೆ" ಎಂದರು.
"ಹೈಕಮಾಂಡ್ ನಾಯಕರ ಭೇಟಿ ಮಾಡಬೇಕು ಎಂಬ ಅಭಿಪ್ರಾಯ ಮೂಡಿದೆ. ಇದರಿಂದ ಪಕ್ಷಕ್ಕೆ ಲಾಭ ಆಗುತ್ತದೆ ಎಂಬ ದೃಷ್ಟಿಯಿಂದ ಸಲಹೆ ಅಭಿಪ್ರಾಯ ನೀಡಿದ್ದೇವೆ. ಒಟ್ಟಿಗೆ ಎಲ್ಲರೂ ಹೋಗೋಣ ಅಂತ ಚರ್ಚೆ ಮಾಡಿದ್ದೇವೆ. ಯಾವಾಗ ಹೋಗೋದು ಎಂಬುದು ತೀರ್ಮಾನ ಆಗಿಲ್ಲ. ಸುರ್ಜೇವಾಲ ಅಮೆರಿಕದಲ್ಲಿ ಇದ್ದಾರೆ. ಅವರು ಬಂದ ಮೇಲೆ ಅವರ ಅಪಾಯಿಂಟ್ಮೆಂಟ್ ತೆಗೆದುಕೊಂಡು ಹೋಗಬೇಕು ಅಂತ ಅಭಿಪ್ರಾಯ ಮೂಡಿದೆ" ಎಂದರು.
"ಎಸ್ಸಿ, ಎಸ್ಟಿ ಸಮುದಾಯ ನಮ್ಮ ಹತ್ತಿರವೇ ಉಳಿಸಿಕೊಳ್ಳಬೇಕು ಎಂದು ಹೈಕಮಾಂಡ್ಗೆ ಮನವರಿಕೆ ಮಾಡುತ್ತೇವೆ. ಸಮುದಾಯಗಳ ವಿಶ್ವಾಸ ಉಳಿಸಿಕೊಳ್ಳಬೇಕು. ಎರಡು ಅಥವಾ ಮೂವರನ್ನು ಡಿಸಿಎಂ ಮಾಡಬೇಕಾ ಎಂಬ ತೀರ್ಮಾನವನ್ನು ಹೈಕಮಾಂಡ್ ಮಾಡುತ್ತದೆ. ಉತ್ತರದಲ್ಲಿ ಚುನಾವಣೆ ನಡೆದಾಗ ಬಿಜೆಪಿ ಬೇರೆ ಬೇರೆ ಸಮುದಾಯಕ್ಕೆ ಡಿಸಿಎಂ ಸ್ಥಾನ ನೀಡಿದೆ. ಒಂದೇ ಡಿಸಿಎಂ ಇರಬೇಕು ಎಂಬುದು ಡಿಕೆಶಿ ಅಭಿಪ್ರಾಯ ಇರಬಹುದು. ಆದರೆ ಎಲ್ಲರ ಅಭಿಪ್ರಾಯ ಪಡೆದುಕೊಂಡಾಗ ಮಾಡಬೇಕಾಗುತ್ತದೆ" ಎಂದು ಹೇಳಿದರು.
ಸಚಿವ ಸತೀಶ್ ಜಾರಕಿಹೊಳಿ ನಿವಾಸದಲ್ಲಿ ಡಿನ್ನರ್ ಮೀಟಿಂಗ್ ವಿಚಾರವಾಗಿ ಪ್ರತಿಕ್ರಿಯಿಸಿ, "ಊಟದಲ್ಲಿ ಏನು ವಿಶೇಷತೆ ಇರುತ್ತಪ್ಪ. ಈಗ ಮೆನುನೂ ಚರ್ಚೆ ಆಗಿದೆ, ಬೇರೆನೂ ಚರ್ಚೆ ಆಗಿದೆ. ಕೆಲವು ಹೇಳುವಂತದ್ದು ಇವೆ ಕೆಲವು ಹೇಳದೇ ಇರುವಂತವೂ ಇದ್ದಾವೆ. ಹೇಳಬೇಕಾದಂತನ್ನು ನಾವು ಹೇಳುತ್ತೇವೆ. ಕೆಲವು ಹೇಳುವಂತವನ್ನು ಹೇಳೋಕೆ ಕಾಲ ಈಗ ಪಕ್ಕಾ ಆಗಿಲ್ಲ. ರಾಜಕಾರಣ ಏನೇನೋ ಮಾತಾಡಿರುತ್ತೇವೆ. ಅವು ಹೇಳದೇ ಇರುವಂತವು. ಸೂಕ್ತ ಕಾಲದಲ್ಲಿ ಅವೆಲ್ಲವನ್ನು ಹೇಳುತ್ತೇವೆ" ಎಂದರು.
ಹೈಕಮಾಂಡ್ ಹೇಳಿದರೆ ಎಂಪಿ ಚುನಾವಣೆಗೆ ಸ್ಪರ್ಧೆ: "ನಾನು ಒಬ್ಬನೇ ಅಲ್ಲ, ಹೈಕಮಾಂಡ್ ಯಾರಿಗೆಲ್ಲ ಆದೇಶ ಕೊಡುತ್ತದೆ ಅವರೆಲ್ಲರು ಲೋಕಸಭೆ ಚುನಾವಣೆಯಲ್ಲಿ ನಿಲ್ಲಬೇಕು. ಹೈಕಮಾಂಡ್ ಯಾರು ಗೆಲ್ಲುತ್ತಾರೆ ಎಂದು ಸಮೀಕ್ಷೆ ಮಾಡಿಸುತ್ತಾರೆ. ಗೆಲುವೊಂದೇ ಮಾನದಂಡ ಈಗ. ನನ್ನನ್ನು ಒಳಗೊಂಡಂತೆ ಹೈಕಮಾಂಡ್ ಸೂಚನೆ ಬಂದರೆ ಎಲ್ಲರೂ ಸ್ಪರ್ಧೆ ಮಾಡಬೇಕು" ಎಂದರು.
ಇದನ್ನೂ ಓದಿ: ನೈಸ್ ಯೋಜನೆಯನ್ನು ಸರ್ಕಾರ ವಶಕ್ಕೆ ಪಡೆಯಬೇಕು: ಹೆಚ್.ಡಿ.ದೇವೇಗೌಡ
