ಬೆಂಗಳೂರು:ಮಹಾಲಕ್ಷ್ಮಿಲೇಔಟ್ ಕ್ಷೇತ್ರದ ವಿಧಾನಸಭಾ ಉಪಚುನಾವಣೆ ಹಿನ್ನೆಲೆ ಬಿಜೆಪಿ ಅಭ್ಯರ್ಥಿ ಕೆ.ಗೋಪಾಲಯ್ಯ ಪರ ಕೇಂದ್ರ ಸಚಿವ ಡಿ.ವಿ ಸದಾನಂದಗೌಡ, ಸಚಿವ ಸುರೇಶ್, ಮಾಜಿ ಶಾಸಕ ನೆ ಲ ನರೇಂದ್ರಬಾಬು, ಹರೀಶ್ ಹಾಗೂ ನೂರಾರು ಕಾರ್ಯಕರ್ತರು ಮತಯಾಚನೆ ಮಾಡಿದರು.
ನಂದಿನಿಲೇಔಟ್ನಲ್ಲಿ ನಡೆದ ಚುನಾವಣಾ ಪ್ರಚಾರದ ವೇಳೆ ಮಾತನಾಡಿದ ಡಿವಿಎಸ್, ವಿರೋಧಿಗಳೇ ಇಲ್ಲದ ಚುನಾವಣೆ ಇದು. ಮಹಾಲಕ್ಷ್ಮಿಲೇಔಟ್‌ನಲ್ಲಿ ಸಿಂಗಲ್ ಸೈಡೆಡ್ ರಿಸಲ್ಟ್ ಬರುತ್ತೆ. ಕಾಂಗ್ರೆಸ್ ಮತ್ತು ಜೆಡಿಎಸ್ ಇಲ್ಲಿ ಲೆಕ್ಕಕ್ಕಿಲ್ಲ. ಚಲಾವಣೆ ಆಗುವ ಮತಗಳಲ್ಲಿ ಶೇ.80ರಷ್ಟು ಗೋಪಾಲಯ್ಯ ತಗೋತಾರೆ. ದೇವೇಗೌಡರು ಮಾತಾನಾಡೋದೆಲ್ಲಾ ಉಲ್ಟಾ. ಅವ್ರು 10-12 ಸ್ಥಾನಗಳನ್ನು ಗೆಲ್ತೀನಿ ಅನ್ನೋದನ್ನ ಇನ್ನೊಂದು ಭಾಗದಿಂದ ಯೋಚನೆ ಮಾಡಿ. ಇನ್ನು, ಸಿದ್ದರಾಮಯ್ಯ ಅಂತೂ ಬರೀ ಬಾಯಿ ಮಾತಿನಲ್ಲಿ ಹೇಳೋದು, ಅವರಿಂದ ಏನೂ ಆಗಲ್ಲ. ಈ ಚುನಾವಣೆ ನಂತರ ಕಾಂಗ್ರೆಸ್ ನೆಲಸಮ ಆಗುತ್ತೆ. ಜೆಡಿಎಸ್ ರಾಜ್ಯದಲ್ಲಿ ಕಾಣೆಯಾಗುತ್ತೆ ಎಂದರು. ವಿರೋಧಿಗಳು ಯಾರೂ ಕಾಣುತ್ತಿಲ್ಲ ಎಂದ್ರು.
ಇಂದು ಮಹಾಲಕ್ಷ್ಮಿಲೇಔಟ್ ಜೆಡಿಎಸ್ ಮುಖಂಡರ ಮನೆಗೆ ಕುಮಾರಸ್ವಾಮಿ ಭೇಟಿ ವಿಚಾರವಾಗಿ ವ್ಯಂಗ್ಯವಾಡಿದ ಡಿವಿಎಸ್, ಇವತ್ತು ನಮ್ಮ ಎದುರಾಳಿಗಳು ಮನೆ ಭೇಟಿಗೆ ಹೋಗ್ತಿದ್ದಾರಂತೆ.ಅವ್ರು ಮುಖಂಡರ ಮನೆ ಮನೆಗೆ ಹೋಗಿ ತಿಂಡಿ ತಿನ್ಕೊಂಡು ಹೋಗಬೇಕಷ್ಟೇ.. ಆ ಮನೆಯವರೆಲ್ಲ ಬಿಜೆಪಿಗೆ ಮತ ಹಾಕಲಿದ್ದಾರೆ. ಕುಮಾರಸ್ವಾಮಿ ಹೋಗುವ ಮನೆಯವರು ಕೂಡ ನಮ್ಮ ಜೊತೆ ಇದ್ದಾರೆ ಎಂದರು.
ಇನ್ನು, ಮಾಜಿ ಸಚಿವ ತನ್ವೀರ್ ಸೇಠ್ ಮೇಲೆ ದಾಳಿ ನಡೆಸಿದ್ದಾರೆ ಎನ್ನಲಾದ ಪಿಎಫ್ಐ ಸಂಘಟನೆ ಬಗ್ಗೆ ಮಾತನಾಡಿ,ಪಿಎಫ್ಐ ಸಂಘಟನೆಗಳ ಜೊತೆ ಸಿದ್ದರಾಮಯ್ಯಗೆ ದೋಸ್ತಿ ಜಾಸ್ತಿ. ಬಿಜೆಪಿ ಪ್ರಾಕ್ಟಿಕಲಿ ಪಿಎಫ್ಐ ಸಂಘಟನೆಯನ್ನ ನಿಷೇಧಿಸಿದೆ. ಆದರೆ, ಸಿದ್ದರಾಮಯ್ಯ ಅವರು ಅಧಿಕಾರಕ್ಕೆ ಬಂದಾಗ ಅವರನ್ನ ಇರಿಸುವ ಪ್ರಯತ್ನ ಮಾಡಿದ್ರು. ನಮ್ಮ ಸಿಎಂ ಏನೇ ಮಾತಾಡಿದ್ರು ಮಾಹಿತಿ ತಗೊಂಡೇ ಮಾತನಾಡಿರುತ್ತಾರೆ ಎಂದರು.
