ಬೆಂಗಳೂರು: ಕಾರ್ಗೋ ಕ್ಷೇತ್ರಕ್ಕೆ ಆತುರದಿಂದ ಪ್ರವೇಶ ಮಾಡಿಲ್ಲ. ಅಗತ್ಯ ಅಧ್ಯಯನ ನಡೆಸಿ ಬೇಡಿಕೆ ಪ್ರಮಾಣ ಪರಿಗಣಿಸಿಯೇ ನಾವು ಕಾರ್ಗೋ ಕ್ಷೇತ್ರಕ್ಕೆ ಕಾಲಿಟ್ಟಿದ್ದೇವೆ. ನಮ್ಮದು ವಿಶ್ವಾಸಾರ್ಹ ಹಾಗೂ ಸಂಪೂರ್ಣ ಸುರಕ್ಷತೆಯ ಸೇವೆಯಾಗಿದ್ದು ಹೊಸದಾಗಿ ಪರಿಚಯಿಸಿರುವ ಕಾರ್ಗೋ ಕ್ಷೇತ್ರದಲ್ಲಿಯೂ ನಾವು ಸಂಪೂರ್ಣ ಯಶಸ್ವಿ ಆಗುತ್ತೇವೆ ಎಂದು ಕೆಎಸ್ಆರ್ಟಿಸಿ ವಿಶ್ವಾಸ ವ್ಯಕ್ತಪಡಿಸಿದೆ.
ಈಗಾಗಲೇ ಬಸ್ಗಳಲ್ಲಿ ಸಣ್ಣ ಪ್ರಮಾಣದ ಸರಕನ್ನು ಕೆಎಸ್ಆರ್ಟಿಸಿ ಸಾಗಾಣಿಕೆ ಮಾಡುತ್ತಿತ್ತು. ಇದರಿಂದಾಗಿಯೇ ವಾರ್ಷಿಕ 25 ಕೋಟಿ ರೂ.ಗಳ ಗಳಿಕೆ ಮಾಡುತ್ತಿತ್ತು. ಇದೀಗ ಕಾರ್ಗೋ ಕ್ಷೇತ್ರದಲ್ಲಿ ಬೇಡಿಕೆ ಹೆಚ್ಚಾಗಿರುವುದನ್ನು ಮನಗಂಡು ಪ್ರತ್ಯೇಕವಾಗಿ ಟ್ರಕ್ಗಳನ್ನು ಖರೀದಿಸಿ ಸರಕು ಸಾಗಾಣಿಕ ಪ್ರಾರಂಭಿಸಿದೆ. ಆದರೂ ಏಕಾಏಕಿ ಈ ಕ್ಷೇತ್ರಕ್ಕೆ ಕಾಲಿಟ್ಟು ಕೈ ಸುಟ್ಟುಕೊಳ್ಳಬಾರದು ಎನ್ನುವ ಕಾರಣಕ್ಕೆ ಕಾರ್ಗೋ ಸೇವೆ ಕುರಿತು ಅಧ್ಯಯನ ನಡೆಸಲಾಯಿತು.
ಶಿವಮೊಗ್ಗದ ಎಂಬಿಎ ಕಾಲೇಜಿನ ವಿದ್ಯಾರ್ಥಿಗಳ ತಂಡ ರಚಿಸಿದ ಕೆಎಸ್ಆರ್ಟಿಸಿ ಕಾರ್ಗೋ ಕ್ಷೇತ್ರದ ಬೇಡಿಕೆ ಕುರಿತು ಅಧ್ಯಯನ ನಡೆಸುವಂತೆ ಸೂಚಿಸಿತ್ತು. ಅದರಂತೆ ಅಧ್ಯಯನ ನಡೆಸಿದ್ದ ವಿದ್ಯಾರ್ಥಿಗಳ ತಂಡ ಅಧ್ಯಯನ ವರದಿಯನ್ನು ಕೆಎಸ್ಆರ್ಟಿಸಿಗೆ ನೀಡಿದೆ. ಅದರಲ್ಲಿ ಬೇಡಿಕೆ ಬಗ್ಗೆ ಸ್ಪಷ್ಟತೆ ನೀಡಲಾಗಿದೆ. ಬೆಂಗಳೂರು ಸೇರಿದಂತೆ ಇತರೆ ಜಿಲ್ಲೆಗಳಲ್ಲಿ ಕೆಎಸ್ಆರ್ಟಿಸಿ ಕಾರ್ಗೋ ಸೇವೆಗೆ ಬೇಡಿಕೆ ಇದೆ. ಹೆಚ್ಚು ಬೇಡಿಕೆ ಇರುವ ಐದಾರು ಜಿಲ್ಲೆಗಳಲ್ಲಿ ಮೊದಲು ಆರಂಭಿಸಿ ಹಂತ ಹಂತವಾಗಿ ಎಲ್ಲಾ ಜಿಲ್ಲಾ ಕೇಂದ್ರಗಳಲ್ಲಿಯೂ ಕೆಎಸ್ಆರ್ಟಿಸಿ ಕಾರ್ಗೋ ಸೇವೆ ಒದಗಿಸಲು ಟ್ರಕ್ಗಳನ್ನು ಬಳಸಿಕೊಳ್ಳಬಹುದು ಎನ್ನುವ ವರದಿಯನ್ನು ವಿದ್ಯಾರ್ಥಿಗಳು ನೀಡಿದ್ದರು.
ಕಾರ್ಗೋ ಸೇವೆ ಕುರಿತು ವಿದ್ಯಾರ್ಥಿಗಳ ತಂಡ ನಡೆಸಿದ ಅಧ್ಯಯನದಲ್ಲಿ ಸಕಾರಾತ್ಮಕ ವರದಿ ಬಂದ ಹಿನ್ನಲೆಯಲ್ಲಿ ತಕ್ಷಣವೇ ಟ್ರಕ್ಗಳ ಖರೀದಿಗೆ ಮುಂದಾದ ಕೆಎಸ್ಆರ್ಟಿಸಿ ಅಧಿಕಾರಿಗಳು, ಕೆಎಸ್ಆರ್ಟಿಸಿ ಮಂಡಳಿ ಸಭೆಯಲ್ಲಿ ಅನುಮೋದನೆ ಪಡೆದುಕೊಂಡು, ಸಾರಿಗೆ ಸಚಿವ ರಾಮಲಿಂಗಾರೆಡ್ಡಿ ಅವರ ಒಪ್ಪಿಗೆ ಪಡೆದು ಆಡಳಿತಾತ್ಮಕ ಅನುಮೋದನೆಯ ನಂತರ ಪುಣೆಯ ಟಾಟಾ ಘಟಕದಿಂದ 20 ಟ್ರಕ್ಗಳ ಪೂರೈಕೆಗೆ ಒಡಂಡಿಕೆ ಮಾಡಿಕೊಳ್ಳಲಾಯಿತು. ಅದರಂತೆ 20 ಟ್ರಕ್ ಗಳ ಪೂರೈಕೆಯೂ ಆಗಿದ್ದು, ಅಧಿಕೃತವಾಗಿ ಮೊದಲ ಹಂತದ ಕಾರ್ಗೋ ಸೇವೆಯನ್ನು ಕೆಎಸ್ಆರ್ಟಿಸಿ ಆರಂಭಿಸಿದೆ.
ಈ ಕುರಿತು ಮಾಹಿತಿ ನೀಡಿರುವ ಕೆಎಸ್ಆರ್ಟಿಸಿ ವ್ಯವಸ್ಥಾಪಕ ನಿರ್ದೇಶಕ ವಿ.ಅನ್ಬುಕುಮಾರ್, "ಪ್ರಯಾಣಿಕ ಸಾಗಾಣಿಕೆಯ ಜೊತೆಗೆ ಸರಕು ಸಾಗಾಣಿಕೆಯೂ ಮುಖ್ಯವಾಗಿದೆ. ಹಾಗಾಗಿ ಆ ಕ್ಷೇತ್ರವನ್ನೂ ಪ್ರವೇಶಿಸಿ ಕೆಎಸ್ಆರ್ಟಿಸಿ ಗೂಡ್ಸ್ ವ್ಯಾಪ್ತಿಗೂ ವಿಸ್ತರಣೆಯಾಗಬೇಕು. ರಾಜ್ಯದಲ್ಲಿ ಟೆಕ್ಸ್ಟೈಲ್ ಕ್ಲಸ್ಟರ್, ಆಟೋಮೊಬೈಲ್ ಕ್ಲಸ್ಟರ್, ಫಾರ್ಮಾ ಕ್ಲಸ್ಟರ್, ಫುಡ್ ಕ್ಲಸ್ಟರ್ ಇದೆ. ಇಲ್ಲೆಲ್ಲಾ ವಾಹನಕ್ಕೆ ಬೇಡಿಕೆ ಇದೆ ಹಾಗಂತ ನಾವು ಏಕಾಏಕಿ ಕಾರ್ಗೋ ಸೇವೆ ಆರಂಭಿಸಿಲ್ಲ. ಶಿವಮೊಗ್ಗದಲ್ಲಿರುವ ಎಂಬಿಎ ವಿದ್ಯಾರ್ಥಿಗಳಿಂದ ಕಾರ್ಗೋ ಕ್ಷೇತ್ರದ ಬೇಡಿಕೆ ಬಗ್ಗೆ ಅಧ್ಯಯನ ಮಾಡಿದ್ದೇವೆ. ಎಷ್ಟು ಬೇಡಿಕೆ ಇದೆ ಎಂದು ವರದಿ ತರಿಸಿಕೊಂಡಿದ್ದೇವೆ. ಬೇಡಿಕೆ ಇದೆ ಎನ್ನುವುದು ಖಚಿತವಾದ ನಂತರವೇ ನಾವು ಈ ವಲಯಕ್ಕೆ ಕಾಲಿಟ್ಟಿದ್ದೇವೆ" ಎಂದು ತಿಳಿಸಿದ್ದಾರೆ.
"ಕ್ಲಸ್ಟರ್ ಪ್ರಮುಖರ ಜೊತೆ ಮಾತುಕತೆ ನಡೆಸಿದ್ದೇವೆ. ಕ್ಲಸ್ಟರ್ ವಲಯದಿಂದ ಭರವಸೆ ಸಿಕ್ಕ ನಂತರವೇ ನಾವು ಸಚಿವರ ಜೊತೆ ಮಾತುಕತೆ ನಡೆಸಿ ಕಾರ್ಗೋ ಕ್ಷೇತ್ರಕ್ಕೆ ಕಾಲಿಡುವ ಮೊದಲ ಪ್ರಯತ್ನ ಮಾಡಿದ್ದೇವೆ. ಅದರಂತೆ ಈಗ 20 ವಾಹನ ಖರೀದಿಸಿದ್ದು ಅವುಗಳನ್ನು 5 ಜಿಲ್ಲೆಗಳಿಗೆ ಕೊಟ್ಟಿದ್ದೇವೆ. ಪ್ರಯಾಣಿಕ ಸಾರಿಗೆಯಲ್ಲಿ ನಾವು ಯಶಸ್ವಿಯಾಗಿರುವಂತೆ ಕಾರ್ಗೋ ಕ್ಷೇತ್ರದಲ್ಲಿಯೂ ನಾವು ಯಶಸ್ವಿಯಾಗುತ್ತೇವೆ ಎನ್ನುವ ಪರಿಪೂರ್ಣ ನಂಬಿಕೆ ಇದೆ" ಎಂದರು.
"ನಮ್ಮ ಎಲ್ಲಾ ಟ್ರಕ್ಗಳಿಗೂ ಜಿಪಿಎಸ್ ಟ್ರ್ಯಾಕಿಂಗ್ ಇದೆ. ಯಾರು ಸರಕು ಸಾಗಾಣಿಕೆ ಮಾಡಲು ನೀಡಿರುತ್ತಾರೋ ಅವರು ಟ್ರಕ್ಗಳನ್ನು ಟ್ರ್ಯಾಕ್ ಮಾಡಬಹುದು. ನಮ್ಮ ಟ್ರಕ್ ಹೋಗುವಾಗ ಮಾತ್ರವಲ್ಲ ಇಂಜಿನ್ ಆನ್ ಆದರೂ ಸಾಕು ಕೂಡಲೇ ಅಲರ್ಟ್ ಬರಲಿದೆ. ಐಡಲಿಂಗ್ ಇದ್ದರೂ ಅದರ ಅಲರ್ಟ್ ಬರಲಿದೆ. ಸಂಚರಿಸುತ್ತಿದ್ದರೆ ಲೊಕೇಷನ್ ತೋರಿಸುತ್ತದೆ ಅಲ್ಲದೆ ನಮ್ಮ ಕಾರ್ಗೋ ಸೇವೆಗೆ ಇನ್ಶುರೆನ್ಸ್ ಮಾಡಲಾಗಿದೆ. ಹಾಗಾಗಿ ಉತ್ಪನ್ನದ ಸೇಫ್ಟಿ ಇರಲಿದೆ" ಎಂದು ಹೇಳಿದರು.
ಇದನ್ನೂ ಓದಿ: ₹6,800 ಕೋಟಿ ವೆಚ್ಚದಲ್ಲಿ ಹೆಚ್‌ಎಎಲ್‌ನಿಂದ 70 ತರಬೇತಿ ವಿಮಾನ ಖರೀದಿಗೆ ಕೇಂದ್ರ ನಿರ್ಧಾರ
