ಬೆಂಗಳೂರು: ಅಕ್ರಮ ಆಸ್ತಿ ಗಳಿಕೆ ಉರುಳಿನಲ್ಲಿ ಸಿಕ್ಕಿಕೊಂಡು ಅಮಾನತುಗೊಂಡಿರುವ ಕೆ. ಆರ್‌ ಪುರಂ ತಹಶೀಲ್ದಾರ್ ಅಜಿತ್ ಕುಮಾರ್ ರೈ ನನ್ನ ವಿಚಾರಣೆ ಚುರುಕುಗೊಳಿಸಿರುವ ಲೋಕಾಯುಕ್ತ ಪೊಲೀಸರಿಗೆ ಸುಮಾರು 500 ಕೋಟಿ ರೂಪಾಯಿ ಮೌಲ್ಯದ ಆಸ್ತಿ ಇರುವುದು ಮೇಲ್ನೋಟಕ್ಕೆ ಕಂಡುಬಂದಿದೆ. ಈ ಸಂಬಂಧ ಜಾರಿನಿರ್ದೇಶನಾಲಯ (ಇ.ಡಿ) ಹಾಗೂ ಐಟಿಗೆ ಪತ್ರ ಬರೆಯಲು ಮುಂದಾಗಿದ್ದಾರೆ.
ಲೋಕಾಯುಕ್ತ ಪೊಲೀಸರ ಪ್ರಾಥಮಿಕ ತನಿಖೆಯಲ್ಲಿ ದೇವನಹಳ್ಳಿ ಹಾಗೂ ದೊಡ್ಡಬಳ್ಳಾಪುರ ಸೇರಿದಂತೆ ಹಲವೆಡೆ ನೂರಾರು ಎಕರೆ ಜಮೀನು ಹೊಂದಿದ್ದು, ಕೋಟ್ಯಂತರ ರೂಪಾಯಿ ಹಣ ಅಕ್ರಮವಾಗಿ ವರ್ಗಾವಣೆಯಾಗಿದೆ. ಜೊತೆಗೆ ಆದಾಯ ತೆರಿಗೆ ಇಲಾಖೆಗೆ ತೆರಿಗೆ ಪಾವತಿಸದಿರುವುದು ಕಂಡು ಬಂದಿದೆ. ಎರಡು ತನಿಖಾ ಸಂಸ್ಥೆಗಳಿಗೂ ತನಿಖೆ ನಡೆಸುವಂತೆ ಪತ್ರ ಬರೆಯಲು ಮುಂದಾಗಿದ್ದಾರೆ. ಬೇನಾಮಿ ಕಾಯ್ದೆಯಡಿ ಪ್ರಕರಣ ದಾಖಲಿಸಿಕೊಂಡು ತನಿಖೆ ನಡೆಸಲು ಲೋಕಾಯುಕ್ತ ಚಿಂತನೆ ನಡೆಸಿದೆ. ಕೋಟಿ ಕುಳ ಅಜಿತ್ ರೈ ನಾಲ್ಕು ಆಯಾಮಗಳಲ್ಲಿ ಅಧಿಕಾರಿಗಳ ತನಿಖೆಗೆ ಒಳಪಡಲಿದ್ದಾರೆ.
ತಹಶೀಲ್ದಾರ್ ಮನೆಯಲ್ಲಿ ಸಿಕ್ಕಿದ್ದೇನು ಗೊತ್ತಾ ?: ಅಜಿತ್ ಮನೆ ಮೇಲೆ ದಾಳಿ ನಡೆಸಿದ ಅಧಿಕಾರಿಗಳು ಅರೆ ಕ್ಷಣ ಥಂಡಾ ಹೊಡೆದಿದ್ದರು. ದುಬಾರಿ ಬೆಲೆಯ ಗೃಹೋಪಯೋಗಿ ವಸ್ತುಗಳು, ಬ್ರಾಂಡೆಂಡ್ ವಾಚ್ಗಳು, ಸಾವಿರಾರು ರೂಪಾಯಿ ಚಪ್ಪಲಿಗಳು ಹಾಗೂ ಇತರೆ ಲಕ್ಸುರಿ ವಸ್ತುಗಳು ಪತ್ತೆಯಾಗಿವೆ. ಹಾಗಾದರೆ ಯಾವ್ಯಾವ ವಸ್ತುಗಳು ದೊರಕಿದೆ ಎಂಬುದರ ಮಾಹಿತಿ ಇಲ್ಲಿದೆ.
ಅಜಿತ್ ಮನೆಯಲ್ಲಿ ಸಿಕ್ಕ ವಸ್ತುಗಳು ಯಾವುವು, ಎಷ್ಟೆಷ್ಟು ಗೊತ್ತಾ: ಅಜಿತ್ ರೈ ಹಾಲ್ನಲ್ಲಿ ಬರೋಬ್ಬರಿ 4.53 ಲಕ್ಷ ಮೌಲ್ಯದ ಗೃಹೋಪಯೋಗಿ ವಸ್ತುಗಳು ಪತ್ತೆಯಾಗಿವೆ. ಸ್ಮಾರ್ಟ್ ಟಿವಿ, ಹೋಂ ಥಿಯೇಟರ್, ಸೋಪಾ ಸೆಟ್ ಸೇರಿ 4.53 ಲಕ್ಷ ಮೌಲ್ಯದ ವಸ್ತುಗಳು, ಮಕ್ಕಳ ಸ್ಟಡಿ ರೂಂ ನಲ್ಲಿ 3.81 ಲಕ್ಷ ಮೌಲ್ಯದ ವಸ್ತುಗಳು, ಜಿಮ್ ಇಕ್ವಿಪ್ಮೆಂಟ್ಸ್, ಲ್ಯಾಪ್ ಟಾಪ್, ಯೋಗ ಮ್ಯಾಟ್ ಸೇರಿ ಸುಮಾರು 35 ತರದ ವಸ್ತುಗಳು ಪತ್ತೆಯಾಗಿವೆ. ಇಬ್ಬರು ಮಕ್ಕಳ ಬೆಡ್ ರೂಂ ನಲ್ಲಿ 1.26 ಲಕ್ಷ ಮೌಲ್ಯದ ಎಲೆಕ್ಟ್ರಾನಿಕ್ ವಸ್ತುಗಳು, ಬಟ್ಟೆ ಬರೆ, ಬ್ಯಾಗ್ಗಳು ಸಿಕ್ಕಿವೆ.
ತಹಶೀಲ್ದಾರ್ ಬೆಡ್ ರೂಂನಲ್ಲಿ 4.28 ಲಕ್ಷ ಮೌಲ್ಯದ ವಸ್ತುಗಳು ಪತ್ತೆಯಾಗಿವೆ. ಎಸಿ, ಟಿವಿ, ಬಟ್ಟೆಗಳು, ಬ್ಯಾಗ್ಗಳು ಸೇರಿ 4.28 ಲಕ್ಷ ಮೌಲ್ಯದ ವಸ್ತುಗಳು, ಡೈನಿಂಗ್ ಹಾಲ್ ಮತ್ತು ಅಡುಗೆ ಕೋಣೆಯಲ್ಲಿ 5.83 ಲಕ್ಷ ಮೌಲ್ಯದ ವಸ್ತುಗಳು ಹಾಗೂ 50 ಸಾವಿರ ಮೌಲ್ಯದ ಗೃಹೋಪಯೋಗಿ ವಸ್ತುಗಳು ಸಿಕ್ಕಿವೆ.
ಚಿನ್ನ-ಬೆಳ್ಳಿ: ಅಜಿತ್ ರೈ ಮನೆಯಲ್ಲಿ ಸಿಕ್ಕಿದ್ದು 795 ಗ್ರಾಂ ಚಿನ್ನಾಭರಣ. ಒಂದು ಕಡ್ಗ 100 ಗ್ರಾಂ, 183 ಗ್ರಾಂ ತೂಕದ ಚೈನ್, 108 ಗ್ರಾಂ ಲಾಂಗ್ ಚೈನ್, ಮುತ್ತಿನ ಹಾರ, ಉಂಗುರ, ಬ್ರಾಸ್ ಲೇಟ್ ಸೇರಿ 795 ಗ್ರಾಂ ಚಿನ್ನಾಭರಣ. ಅದೇ ರೀತಿ 7ಕೆಜಿ 520 ಗ್ರಾಂ ಬೆಳ್ಳಿ ವಸ್ತುಗಳು. ಬೆಳ್ಳಿ ಲೋಟ, ದೀಪ, ತಟ್ಟೆ, ದೊಡ್ಡ ದೀಪಗಳು, ಬೆಳ್ಳಿ ಚಮಚ ಸೇರಿ ಮೂರು ಲಕ್ಷ ಮೌಲ್ಯದ ಹಲವು ವಸ್ತುಗಳು ಪತ್ತೆಯಾಗಿವೆ.
ಬಗೆ ಬಗೆಯ ದುಬಾರಿ ವಾಚ್ಗಳು: 7.63 ಲಕ್ಷ ಮೌಲ್ಯದ ವಾಚ್ ಗಳು ಅಜಿತ್ ಮನೆಯಲ್ಲಿ ಪತ್ತೆಯಾಗಿದೆ. ಮೂರು ರ್ಯಾಡೋ, ಮೆಸಾರಿಟಿ, ಟೈಟಾನ್, ಟೆಸ್ಲಾಟ್, ಸಿಕೋ ಕಂಪನಿಯ ದುಬಾರಿ ಬೆಲೆಯ 27 ವಾಚ್ಗಳು ಪತ್ತೆಯಾಗಿದೆ. ಅಜಿತ್ ರೈ ಹಾಗೂ ಪತ್ನಿ ಹೆಸರಲ್ಲಿ ಮೂರು ಬ್ಯಾಂಕ್ ಖಾತೆಗಳು ಪತ್ತೆಯಾಗಿದೆ. ಅಜಿತ್ ರೈ ಮನೆಯಲ್ಲಿ ಒಟ್ಟು 16 ಮೊಬೈಲ್ ಫೋನ್ಗಳು ಸಿಕ್ಕಿವೆ.
16ರಲ್ಲಿ 9 ಬಳಕೆಯಲ್ಲಿರದ ಫೋನ್ಗಳು ಇನ್ನೂ 9 ಫೋನ್ ಬಳಕೆಯಲ್ಲಿದ್ದು, ಒಟ್ಟು ಮೌಲ್ಯ 7 ಲಕ್ಷ ಮೌಲ್ಯದ್ದಾಗಿವೆ. ಚಾಲನೆಯಲ್ಲಿ ಇರದ ಫೋನ್ ಹೊರತುಪಡಿಸಿ ಐದು ಮೊಬೈಲ್ಗಳನ್ನ ಲೋಕಾಯುಕ್ತ ಅಧಿಕಾರಿಗಳು ಸೀಜ್ ಮಾಡಿದ್ದಾರೆ. ವಿವಿಧ ಕಂಪೆನಿಗಳ ಬ್ರಾಂಡೆಡ್ ಶೂಗಳು ಪತ್ತೆಯಾಗಿವೆ.
ಪೂಮಾ, ಡಾವಿಂಚಿ, ರೋಸೊ ಬ್ರೊನೆಲೋ, ಲೂಯಿಸ್ ವಿಟ್ಟನ್ ಹಾಗೂ ವುಡ್ಸ್ ಕಂಪನಿಯ ಶೂಗಳು ದೊರಕಿದ್ದು, ಇದರ ಬೆಲೆ ಸುಮಾರು 70 ಸಾವಿರ ಮೌಲ್ಯದಾಗಿದೆ. ಒಟ್ಟು 11 ಜೊತೆ ಶೂ, ಆರು ಜೊತೆ ಚಪ್ಪಲಿಗಳು ದೊರಕಿವೆ. ಲೋಕಾಯುಕ್ತ ಅಧಿಕಾರಿಗಳು ಸದ್ಯ ಎಲ್ಲಾ ವಸ್ತುಗಳ ಪಂಚನಾಮೆ ಮಾಡಿದ್ದಾರೆ. ಇಬ್ಬರು ಸರ್ಕಾರಿ ಅಧಿಕಾರಿಗಳ ಸಮ್ಮುಖದಲ್ಲಿ ಪಂಚನಾಮೆ ಮಾಡಲಾಗಿದೆ. ಕೆಲವು ಅಗತ್ಯ ವಸ್ತುಗಳನ್ನ ವಶಕ್ಕೆ ಪಡೆದು ಉಳಿದವುಗಳನ್ನ ಅಧಿಕಾರಿಗಳು ವಾಪಸ್ ನೀಡಿದ್ದು, ಈ ಬಗ್ಗೆ ಲೋಕಾಯುಕ್ತ ಅಧಿಕಾರಿಗಳಿಂದ ಈ ಬಗ್ಗೆ ಕೂಲಂಕಷ ತನಿಖೆ ನಡೆಯುತ್ತಿದೆ.
ಇದನ್ನೂ ಓದಿ: ಅಕ್ರಮ ಆಸ್ತಿ ಗಳಿಕೆ ಪ್ರಕರಣ: ತಹಶೀಲ್ದಾರ್ ಅಜಿತ್ ಕುಮಾರ್ ರೈ ಅಮಾನತು
