ಬೆಂಗಳೂರು: ವಿವಿಧ ಸ್ಥಳಗಳಿಗೆ ಎಂದಿನಂತೆ ತೆರಳಬೇಕಿದ್ದ ಒಟ್ಟು 400 ಕೆಎಸ್ಆರ್ಟಿಸಿ ಬಸ್ಗಳ ಸೇವೆ ನಿಲ್ಲಿಸಲಾಗಿದೆ. 4129 ಸೀಟುಗಳನ್ನು ಬುಕ್ ಮಾಡಿ ನಂತರ ರದ್ದು ಮಾಡಿದ್ದು, ಪ್ರಯಾಣಿಕರಿಗೆ ಹಣ ವಾಪಸ್ ಮಾಡಲಾಗಿದೆ ಎಂದು ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ.
ಒಂದು ಕಡೆ ನಿರಂತರ ಸುರಿಯುತ್ತಿರುವ ಮಳೆ, ಮತ್ತೊಂದು ಕಡೆ ಗುಡ್ಡ ಕುಸಿತ. ಇದರಿಂದಾಗಿ ವಾಹನ ಸಂಚಾರಕ್ಕೆ ಅಡ್ಡಿಯಾಗಿದ್ದು, ಇಂದು ಕೂಡಾ ಕೆಎಸ್ಆರ್ಟಿಸಿ ಬಸ್ ಸಂಚಾರ ರದ್ದು ಮಾಡಲಾಗಿತ್ತು. ಸಕಲೇಶಪುರ, ಮೂಡಿಗೆರೆ, ಕೊಪ್ಪ, ಚಾರ್ಮಾಡಿ ಘಾಟ್, ಶಿರಾಡಿ ಘಾಟ್ಗೆ ಬಸ್ ಸಂಚಾರ ಸ್ಥಗಿತವಾಗಿದ್ದು, ಇತ್ತ ಮೈಸೂರು-ನಂಜನಗೂಡಿಗೂ ಬಸ್ ಸಂಚಾರ ರದ್ದು ಮಾಡಲಾಗಿತ್ತು.
ಕುಶಾಲನಗರ - ಮಡಿಕೇರಿ, ಕೆ.ಆರ್.ನಗರ, ಉಪ್ಪಿನಂಗಡಿ - ನೆಲ್ಯಾಡಿ, ಧರ್ಮಸ್ಥಳ - ಮಂಗಳೂರು, ಚಿತ್ರದುರ್ಗ- ಶಿವಮೊಗ್ಗ ರಸ್ತೆ ಬಂದ್ ಆಗಿವೆ. ಈ ಹಿನ್ನೆಲೆ ಬಸ್ ಸಂಚಾರ ರದ್ದುಗೊಳಿಸಿರುವುದಾಗಿ ನಿಗಮ ಮಾಹಿತಿ ನೀಡಿದೆ.
ಇವೆಲ್ಲದರ ಜೊತೆಗೆ ಕೆಎಸ್ಆರ್ಟಿಸಿಯು ನೆರೆ ಪ್ರದೇಶಕ್ಕೆ ಉಚಿತ ಸಾಮಾಗ್ರಿಗಳ ರವಾನೆಗೆ ಅವಕಾಶ ಕಲ್ಪಿಸಿಕೊಟ್ಟಿದ್ದರಿಂದ ವೀರಶೈವ ಲಿಂಗಾಯತ ಯುವ ವೇದಿಕೆ ಬೆಂಗಳೂರು, ರೆಡ್ ಕ್ರಾಸ್ ಸೊಸೈಟಿ ನೆರೆ ಸಂತ್ರಸ್ತರಿಗೆ ನೀಡಿದ್ದ ಸಾಮಾಗ್ರಿಗಳನ್ನು ಬೆಂಗಳೂರಿನಿಂದ ಕಾರವಾರ, ಮುಧೋಳ, ಜಮಖಂಡಿಗೆ ತಲುಪಿಸಲಾಗಿದೆ.
