ಭ್ರಷ್ಟಾಚಾರ ನಡೆಸಲು ರಾಜ್ಯ ಸರ್ಕಾರಕ್ಕೆ ಕೇಂದ್ರದ ಸಹಕಾರ ಸಿಕ್ಕಿದೆ: ಕೃಷ್ಣ ಬೈರೇಗೌಡ

ಬಿಜೆಪಿಯವರು 100 ಕೋಟಿ ತಿಂದ್ರೂ ಐಟಿ ರೇಡ್ ಇಲ್ಲ, ಯಾವ ಇಡಿಯೂ ತನಿಖೆ ಮಾಡಲ್ಲ ಎಂದು ಬಿಜೆಪಿ ವಿರುದ್ಧ ಮಾಜಿ ಸಚಿವ ಕೃಷ್ಣ ಬೈರೇಗೌಡ ಆರೋಪ ಮಾಡಿದ್ದಾರೆ.

ಬೆಂಗಳೂರು: ರಾಜ್ಯ ರಾಜಧಾನಿಯ ಅವನತಿ ಹೇಳಲು ಸಾಧ್ಯವಿಲ್ಲ. ಇಲ್ಲಿನ ದುಸ್ಥಿತಿಯನ್ನು ಸಹ ರಾಜ್ಯ ಸರ್ಕಾರ ತನ್ನ ಅನುಕೂಲಕ್ಕೆ ಬಳಸಿಕೊಳ್ಳುತ್ತಿದೆ ಎಂದು ಕಾಂಗ್ರೆಸ್​ನ ಮಾಜಿ ಸಚಿವ ಕೃಷ್ಣ ಬೈರೇಗೌಡ ಆರೋಪಿಸಿದ್ದಾರೆ.

ಬೆಂಗಳೂರಿನ ಕ್ವೀನ್ಸ್ ರಸ್ತೆಯ ಕೆಪಿಸಿಸಿ ಕಚೇರಿಯಲ್ಲಿಂದು ಮಾಧ್ಯಮಗೋಷ್ಟಿ ನಡೆಸಿ ಮಾತನಾಡಿದ ಅವರು, ಬೆಂಗಳೂರು ಅಂದ್ರೆ ಕ್ಯಾಶ್​ಟವರ್ ಆಗಿದೆ. ಬೆಂಗಳೂರು ಎಲ್ಲೆಲ್ಲಿ ಕಿತ್ತು ಹೋಗಿದೆ ಅಂತಾ ಹೇಳಲಾಗಲ್ಲ. ಮುಕ್ಕಾಲು ಭಾಗ ಇವತ್ತು ಸಮಸ್ಯೆಗೆ ಸಿಲುಕಿದೆ. ಪ್ರಧಾನಿ ಬಂದಿದ್ದು ಕೇವಲ ಅರ್ಧ ದಿನ ಮಾತ್ರ. ಅದಕ್ಕೆ ಖರ್ಚು ಮಾಡಿದ್ದು 26 ಕೋಟಿ ರೂಪಾಯಿ. ಸುಳ್ಳು ಭರವಸೆ ಬಿಟ್ಟರೆ ಮತ್ತೇನು ಪ್ರಯೋಜನವಿಲ್ಲ. ಮಳೆಯಿಂದಾದ ಅನಾಹುತ ಸರಿಪಡಿಸುತ್ತಿಲ್ಲ. ಇವತ್ತು ಬೆಂಗಳೂರಿನ‌ ಜನ ಕೇಳ್ತಿದ್ದಾರೆ ಎಂದರು.

ರಾಜ್ಯ ಸರ್ಕಾರದ ಬಳಿ ರಸ್ತೆಗುಂಡಿ ಮುಚ್ಚಲು ಹಣ ಇಲ್ವೇ? ರಾಜಕಾಲುವೆ ಕಸ ತೆರವಿಗೆ ಹಣ ಇಲ್ವೇ? ಇದನ್ನು ನಾವು ಕೇಳ್ತಿಲ್ಲ, ಇಲ್ಲಿನ ಜನ ಕೇಳ್ತಿದ್ದಾರೆ. ರಾಜ್ಯ ಸರ್ಕಾರಕ್ಕೆ ಪ್ರಧಾನಿ ಮೋದಿ, ಕೇಂದ್ರ ಗೃಹ ಸಚಿವ ಅಮಿತ್ ಶಾ ಅವರ ಅಭಯವಿದೆ. ಬಿಜೆಪಿಯವರು 100 ಕೋಟಿ ತಿಂದ್ರೂ ಐಟಿ ರೇಡ್ ಇಲ್ಲ. ಯಾವ ಇಡಿಯೂ ತನಿಖೆ ಮಾಡಲ್ಲ. ಎಲ್ಲಿಂದ ಬಂತು ದುಡ್ಡು ಅಂತಾನೂ ಕೇಳಲ್ಲ. ಸಂಪೂರ್ಣ ಪ್ರೊಟೆಕ್ಷನ್ ಬಿಜೆಪಿಯವರಿಗೆ ಸಿಕ್ಕಿದೆ. ಹಾಗಾಗಿ ಇವತ್ತು 50% ವರೆಗೆ ಕಮೀಷನ್ ಹೋಗಿದೆ ಎಂದು ಮಾಜಿ ಸಚಿವ ಬೈರೇಗೌಡ ಆರೋಪಿಸಿದರು.