ನಟರಾಜ್ ಗೌಡ ಸ್ಥಾನಕ್ಕೆ ಬಿ ಆರ್ ನಾಯ್ಡು ನೇಮಿಸುವಂತೆ ಹೈಕಮಾಂಡ್​ಗೆ ಕೆಪಿಸಿಸಿ ಶಿಫಾರಸು

ಕಾಂಗ್ರೆಸ್​ನಿಂದ ವಿಧಾನಪರಿಷತ್ತಿಗೆ ಪ್ರವೇಶಿಸಲು ನಟರಾಜ್ ಗೌಡ ಸೇರಿದಂತೆ ಹಲವು ಕೆಪಿಸಿಸಿ ಪದಾಧಿಕಾರಿಗಳು ಸಾಕಷ್ಟು ದೊಡ್ಡ ಮಟ್ಟದ ಪ್ರಯತ್ನ ನಡೆಸಿದ್ದರು. ಆದರೆ, ಈ ಪ್ರಯತ್ನದಲ್ಲಿ ಆದ ಹಿನ್ನಡೆಗೆ ಬೇಸರಗೊಂಡಿದ್ದ ನಟರಾಜ್ ಗೌಡ, ಪಕ್ಷದ ಕಚೇರಿಗೆ ಆಗಮಿಸುವುದನ್ನು ನಿಲ್ಲಿಸಿದ್ದರು..

ಬೆಂಗಳೂರು : ಕರ್ನಾಟಕ ಪ್ರದೇಶ ಕಾಂಗ್ರೆಸ್ ಸಮಿತಿಯ ಸಾಮಾಜಿಕ ಜಾಲತಾಣ ವಿಭಾಗದ ಮುಖ್ಯಸ್ಥರನ್ನಾಗಿ ಬಿ ಆರ್ ನಾಯ್ಡು ನೇಮಿಸಲು ಕಾಂಗ್ರೆಸ್ ಪಕ್ಷ ಹೈಕಮಾಂಡ್‌ಗೆ ಶಿಫಾರಸು ಮಾಡಿದೆ.

ಕೆಪಿಸಿಸಿ ಅಧ್ಯಕ್ಷ ಡಿ ಕೆ ಶಿವಕುಮಾರ್ ಈ ನಿರ್ಧಾರ ಕೈಗೊಂಡು ಅದನ್ನ ಹೈಕಮಾಂಡ್​​ಗೆ ಶಿಫಾರಸು ಮಾಡಿದ್ದಾರೆ. ಶೀಘ್ರವೇ ಪಕ್ಷದ ರಾಷ್ಟ್ರೀಯ ನಾಯಕರು ಅಧಿಕೃತ ಆದೇಶ ಹೊರಡಿಸಲಿದ್ದಾರೆ.

ಹೈಕಮಾಂಡ್​ಗೆ ಕೆಪಿಸಿಸಿ ಶಿಫಾರಸು

ಈ ಹಿನ್ನೆಲೆಯಲ್ಲಿ ಇನ್ನು ಮುಂದೆ ಕೆಪಿಸಿಸಿ ಸಾಮಾಜಿಕ ಜಾಲತಾಣ ವಿಭಾಗಕ್ಕೆ ಸಂಬಂಧಿಸಿದಂತೆ ಎಲ್ಲಾ ರೀತಿಯ ಮಾಹಿತಿ ರವಾನೆ ಹಾಗೂ ಸಂವಹನ ಸಂಪರ್ಕ ಸಾಧನಗಳನ್ನು ಬಿ ಆರ್ ನಾಯ್ಡು ಅವರೇ ನೋಡಿಕೊಳ್ಳಲಿದ್ದಾರೆ. ಆದ್ದರಿಂದ ಇನ್ನು ಮುಂದೆ ಜಿಲ್ಲಾ ಹಾಗೂ ಬ್ಲಾಕ್ ಕಾಂಗ್ರೆಸ್ ಸಮಿತಿಗಳಿಂದ ಕೆಪಿಸಿಸಿ ಸಾಮಾಜಿಕ ಜಾಲತಾಣಕ್ಕೆ ಸಂಬಂಧಿಸಿದ ವಿಷಯಗಳಿಗೆ ಬಿ. ಆರ್.ನಾಯ್ಡು ಅವರನ್ನು ಸಂಪರ್ಕಿಸುವಂತೆ ಸೂಚಿಸಲಾಗಿದೆ. ಬಿ.ಆರ್.ನಾಯ್ಡು ಈ ಹಿಂದೆ ಕೆಪಿಸಿಸಿ ಕಾರ್ಯದರ್ಶಿಯಾಗಿ ಕಾರ್ಯನಿರ್ವಹಿಸಿದ್ದರು.

ನಟರಾಜ್ ಗೌಡ ಸ್ಥಾನಕ್ಕೆ ಬಿ ಆರ್ ನಾಯ್ಡು : ಕೆಪಿಸಿಸಿ ಸಾಮಾಜಿಕ ಜಾಲತಾಣದ ಮುಖ್ಯಸ್ಥರಾಗಿದ್ದ ನಟರಾಜಗೌಡ ಸ್ಥಾನಕ್ಕೆ ಬಿ ಆರ್ ನಾಯ್ಡು ನೇಮಕಗೊಂಡಿದ್ದಾರೆ. ಕಳೆದ ಜೂನ್​ನಲ್ಲಿ ವಿಧಾನಸಭೆಯಿಂದ ವಿಧಾನಪರಿಷತ್ತಿಗೆ ಆಯ್ಕೆಯಾದ ಏಳು ಸ್ಥಾನಗಳ ಪೈಕಿ ಎರಡು ಸ್ಥಾನ ಕಾಂಗ್ರೆಸ್ ಪಾಲಿಗೆ ಲಭಿಸಿತ್ತು.

ಆ ಸಂದರ್ಭ ಕಾಂಗ್ರೆಸ್​ನಿಂದ ವಿಧಾನಪರಿಷತ್ತಿಗೆ ಪ್ರವೇಶಿಸಲು ನಟರಾಜ್ ಗೌಡ ಸೇರಿದಂತೆ ಹಲವು ಕೆಪಿಸಿಸಿ ಪದಾಧಿಕಾರಿಗಳು ಸಾಕಷ್ಟು ದೊಡ್ಡ ಮಟ್ಟದ ಪ್ರಯತ್ನ ನಡೆಸಿದ್ದರು. ಆದರೆ, ಈ ಪ್ರಯತ್ನದಲ್ಲಿ ಆದ ಹಿನ್ನಡೆಗೆ ಬೇಸರಗೊಂಡಿದ್ದ ನಟರಾಜ್ ಗೌಡ, ಪಕ್ಷದ ಕಚೇರಿಗೆ ಆಗಮಿಸುವುದನ್ನು ನಿಲ್ಲಿಸಿದ್ದರು.

ಅನಾರೋಗ್ಯದ ನೆಪವೊಡ್ಡಿ ಪಕ್ಷದ ಕಚೇರಿಯತ್ತ ಮುಖ ಮಾಡಿರಲಿಲ್ಲ. ಇದೀಗ ಅಂತಿಮವಾಗಿ ಅವರ ಸ್ಥಾನಕ್ಕೆ ಬಿ ಆರ್ ನಾಯ್ಡುರನ್ನು ನೇಮಿಸಲಾಗಿದೆ.