ಶಿವಮೊಗ್ಗದಲ್ಲಿ ನಾಳೆ ಸಂಜೆವರೆಗೆ ನಿಷೇಧಾಜ್ಞೆ: ಐಜಿ ತ್ಯಾಗರಾಜನ್

ಶಿವಮೊಗ್ಗ ನಗರದಲ್ಲಿ ಸೆಕ್ಷನ್‌ 144 ಜಾರಿಯಲ್ಲಿದೆ. ಅಂಗಡಿಗಳನ್ನು ಸಂಜೆ 6-30ರ ವರೆಗೆ ತೆರೆಯಲು ಅವಕಾಶ ನೀಡಲಾಗಿದೆ.

ಶಿವಮೊಗ್ಗ: ವೀರ್‌ ಸಾವರ್ಕರ್ ಭಾವಚಿತ್ರ ವಿವಾದದಿಂದ ಶಿವಮೊಗ್ಗದಲ್ಲಿ ಭುಗಿಲೆದ್ದ ಗಲಾಟೆ ಹತೋಟಿಗೆ ತರಲು ನಗರದಲ್ಲಿ ನಿಷೇಧಾಜ್ಞೆ ಜಾರಿಗೆ ತರಲಾಗಿತ್ತು. ಈ ಕುರಿತು ಪೂರ್ವ ವಲಯ ಐಜಿ ತ್ಯಾಗರಾಜನ್​ ಮಾತನಾಡಿ, ನಾಳೆ ಸಂಜೆವರೆಗೆ ನಿಷೇಧಾಜ್ಞೆ ವಿಸ್ತರಿಸಲಾಗಿದೆ ಎಂದರು.

ನಗರದಲ್ಲಿ ಇವತ್ತು ರಾತ್ರಿ ಸಹ ಪೊಲೀಸ್ ಬಂದೋಬಸ್ತ್ ಇರಲಿದೆ. ರೂಟ್ ಮಾರ್ಚ್ ಮಾಡುತ್ತಿದ್ದೇವೆ. ಬೇರೆ ಜಿಲ್ಲೆಗಳಿಂದ ನಿಯೋಜಿಸಿರುವ ಪೊಲೀಸರು ಇಲ್ಲೇ ಇದ್ದಾರೆ. ಅವರನ್ನು ಕಳುಹಿಸಬೇಕೋ ಬೇಡವೋ ಎಂಬುದನ್ನು ನಾಳೆ ತೀರ್ಮಾನಿಸುತ್ತೇವೆ.

ಅಂಗಡಿಗಳನ್ನು ಸಂಜೆ 6-30ರ ವರೆಗೆ ತೆರೆಯಲು ಅವಕಾಶ ನೀಡಲಾಗಿದೆ. ನಂತರ ನಮ್ಮ ಸಿಬ್ಬಂದಿಯೇ ಬಂದ್​ ಮಾಡಿಸುತ್ತಾರೆ. ಇನ್ನು, ಚೂರಿ ಇರಿದ ಪ್ರಕರಣದ ತನಿಖೆ ನಡೆಯುತ್ತಿದೆ. ಘಟನೆಯ ವಿಡಿಯೋಗಳನ್ನು ಪರಿಶೀಲಿಸುತ್ತೇವೆ ಎಂದು ಪ್ರತಿಕ್ರಿಯಿಸಿದರು.