ಬೆಂಗಳೂರು : ವೀರಶೈವ - ಲಿಂಗಾಯತ ಅಭಿವೃದ್ಧಿ ಮಂಡಳಿ ಹಾಗೂ ಮರಾಠ ಅಭಿವೃದ್ದಿ ನಿಗಮದ ರಚನೆಗೆ ಸಂಬಂಧಿಸಿದಂತೆ ಮುಖ್ಯಮಂತ್ರಿ ಹೊರಡಿಸಿರುವ ಟಿಪ್ಪಣಿ ಹಾಗೂ ಪತ್ರದ ಪ್ರತಿಯನ್ನು ನ್ಯಾಯಾಲಯಕ್ಕೆ ಹಾಜರುಪಡಿಸುವಂತೆ ಹೈಕೋರ್ಟ್ ರಾಜ್ಯ ಸರ್ಕಾರಕ್ಕೆ ನಿರ್ದೇಶಿಸಿದೆ.
ಜಾತಿ ಆಧರಿತ ನಿಗಮ- ಮಂಡಳಿಗಳನ್ನು ಸ್ಥಾಪಿಸಿರುವ ಸರ್ಕಾರದ ಕ್ರಮ ಪ್ರಶ್ನಿಸಿ ಸಲ್ಲಿಸಿರುವ ಸಾರ್ವಜನಿಕ ಹಿತಾಸಕ್ತಿ ಅರ್ಜಿಗಳನ್ನು ಮುಖ್ಯ ನ್ಯಾಯಮೂರ್ತಿ ಎ. ಎಸ್. ಓಕ ನೇತೃತ್ವದ ವಿಭಾಗೀಯ ಪೀಠ ವಿಚಾರಣೆ ನಡೆಸಿತು. ಈ ವೇಳೆ, ಅರ್ಜಿದಾರರ ಪರ ಹಿರಿಯ ವಕೀಲ ಪ್ರೊ. ರವಿವರ್ಮ ಕುಮಾರ್ ವಾದಿಸಿ, ಸರ್ಕಾರ ನಿಗಮ-ಮಂಡಳಿ ರಚನೆಯು ‘ನೀತಿ ನಿರ್ಣಯ’ ವಿಚಾರ ಎಂದು ಹೇಳಿದೆ. ಆದರೆ, ಯಾವ ನೀತಿ ಎನ್ನುವುದನ್ನು ಸ್ಪಷ್ಟಪಡಿಸಿಲ್ಲ. ಜಾತಿಗಳ ಅಭಿವೃದ್ಧಿಗೆ ನಿಗಮ-ಮಂಡಳಿ ರಚಿಸಲು ಯಾವ ನೀತಿಯೂ ಇಲ್ಲ, ನಿರ್ದಿಷ್ಟ ಕಾನೂನಿನ ತಳಹದಿ, ಅಧಿಕೃತ ಆದೇಶ, ಸಚಿವ ಸಂಪುಟದ ನಿರ್ಣಯಗಳು ಯಾವುವೂ ಇಲ್ಲದೇ ಲಿಂಗಾಯತ, ಮರಾಠ ಅಭಿವೃದ್ಧಿ ನಿಗಮ-ಮಂಡಳಿ ರಚನೆಗೆ 2020ರ ನ.17 ಹಾಗೂ ನ.27ರಂದು ಮುಖ್ಯಮಂತ್ರಿ ಟಿಪ್ಪಣಿ ಹೊರಡಿಸಿದ್ದಾರೆ. ಆ ಟಿಪ್ಪಣಿ ಆಧರಿಸಿ ಕೇವಲ ಜಾತಿ ಕಾರಣಕ್ಕಾಗಿಯೇ ನಿಗಮ-ಮಂಡಳಿ ರಚಿಸಲಾಗಿದೆ ಎಂದರು.
ಅಲ್ಲದೇ, ನಾಗನಗೌಡ, ಹಾವನೂರು, ಚಿನ್ನಪ್ಪರೆಡ್ಡಿ ಸೇರಿದಂತೆ ಯಾವ ಹಿಂದುಳಿದ ವರ್ಗಗಳ ಆಯೋಗಗಳೂ ಲಿಂಗಾಯತ, ಬ್ರಾಹ್ಮಣ, ಮರಾಠ ಮತ್ತು ಆರ್ಯವೈಶ್ಯ ಸಮುದಾಯಗಳನ್ನು ಹಿಂದುಳಿದ ವರ್ಗ ಎಂದು ಗುರುತಿಸಿಲ್ಲ. ರಾಜ್ಯದಲ್ಲಿ 352 ಹಿಂದುಳಿದ ವರ್ಗಗಳು, 152 ಎಸ್ಸಿ, ಎಸ್ಟಿ ವರ್ಗಗಳಿವೆ. 352 ಹಿಂದುಳಿದ ವರ್ಗಗಳು ಇರುವಾಗ ಲಿಂಗಾಯತ ಮತ್ತು ಮರಾಠ ಜಾತಿಗಳನ್ನು ಮಾತ್ರ ಸರ್ಕಾರ ಆಯ್ಕೆ ಮಾಡಿಕೊಂಡಿದೆ. ಜಾತಿ ಮತ್ತು ಉಪ ಚುನಾವಣೆ ಹಿನ್ನೆಲೆಯಲ್ಲಿ ರಾಜಕೀಯ ಉದ್ದೇಶಗಳಿಗೆ ಸರ್ಕಾರ ನಿಗಮ-ಮಂಡಳಿ ರಚಿಸಿದೆ. ಮರಾಠ ಅಭಿವೃದ್ಧಿ ನಿಗಮ ರಚನೆಗೆ ಹೊರಡಿಸಲಾದ ಟಿಪ್ಪಣಿಯಲ್ಲಿ ಮರಾಠ ಸಮುದಾಯ ‘ಧಾರ್ಮಿಕ ಅಭಿವೃದ್ಧಿ’ಗೆ ನಿಗಮ ಸ್ಥಾಪಿಸುವುದಾಗಿ ಹೇಳಿರುವುದು ಅಚ್ಚರಿಯ ಸಂಗತಿಯಷ್ಟೇ ಅಲ್ಲ, ಸಂವಿಧಾನ ಮತ್ತು ಕಾನೂನು ಬಾಹಿರ ಕ್ರಮ ಎಂದು ಪ್ರೊ. ರವಿವರ್ಮ ವಾದಿಸಿದರು.
ವಾದ ಪರಿಗಣಿಸಿದ ಪೀಠ, ವೀರಶೈವ-ಲಿಂಗಾಯತ ಅಭಿವೃದ್ಧಿ ಮಂಡಳಿ ಹಾಗೂ ಮರಾಠ ಅಭಿವೃದ್ಧಿ ನಿಗಮ ರಚನೆಗೆ ಸಂಬಂಧಿಸಿದಂತೆ ಸಿಎಂ ಹೊರಡಿಸಿರುವ ಟಿಪ್ಪಣಿ ಹಾಗೂ ಪತ್ರದ ಪ್ರತಿಯನ್ನು ಸಲ್ಲಿಸುವಂತೆ ಸರ್ಕಾರದ ಪರ ವಕೀಲರಿಗೆ ಸೂಚಿಸಿ, ವಿಚಾರಣೆಯನ್ನು ಏ. 17ಕ್ಕೆ ಮುಂದೂಡಿದೆ.
