ಬೆಂಗಳೂರು : ಜಿಟಿಟಿಸಿ (ಸರ್ಕಾರಿ ಉಪಕರಣಾಗಾರ ಹಾಗೂ ತರಬೇತಿ ಕೇಂದ್ರ)ದ ಟೆಂಡರ್ನಲ್ಲಿ ಕೋಟ್ಯಂತರ ರೂ. ಮೊತ್ತದ ಅವ್ಯವಹಾರ ನಡೆಸಲಾಗಿದೆ ಎಂದು ಉನ್ನತ ಶಿಕ್ಷಣ ಸಚಿವ ಡಾ.ಅಶ್ವತ್ಥ ನಾರಾಯಣ ವಿರುದ್ಧ ಕಾಂಗ್ರೆಸ್ ಗಂಭೀರ ಆರೋಪ ಮಾಡಿದೆ.
ಈ ಬಗ್ಗೆ ನಗರದ ಕೆಪಿಸಿಸಿ ಕಚೇರಿಯಲ್ಲಿ ಮಾತನಾಡಿದ ಮಾಜಿ ಸಂಸದ ವಿ ಎಸ್ ಉಗ್ರಪ್ಪ, ಸಚಿವ ಅಶ್ವತ್ಥ ನಾರಾಯಣ ಸಂಬಂಧಿ ಜಿಟಿಟಿಸಿ ಎಂಡಿ ಹೆಚ್ ರಾಘವೇಂದ್ರ ವಿರುದ್ಧ ಆರೋಪ ಮಾಡಿದ್ದಾರೆ. ಜಿಟಿಟಿಸಿಯಲ್ಲಿ ಉಪಕರಣ ಖರೀದಿಗೆ ₹60 ಕೋಟಿಗೂ ಹೆಚ್ಚು ಮೊತ್ತದ ಅಕ್ರಮ ನಡೆದಿದೆ.
ಒಟ್ಟು 8 ಟೆಂಡರ್ಗಳನ್ನು ನಡೆಸುವ ಪ್ರಕ್ರಿಯೆಯಲ್ಲಿ ಅಕ್ರಮ ನಡೆದಿದೆ. ಇದಲ್ಲದೇ ಇನ್ನು 8 ಟೆಂಡರ್ಗಳು ಬಹುತೇಕ ಅಂತಿಮ ಹಂತದಲ್ಲಿವೆ. ಇವು ಸಹ ಒಂದೆರಡು ದಿನಗಳಲ್ಲಿ ಪೂರ್ಣಗೊಳ್ಳಲಿದೆ. ಇದರ ಮೊತ್ತ ಕೂಡ 40 ಕೋಟಿ ರೂ. ಮೀರಿದೆ ಎಂದು ಆರೋಪಿಸಿದ್ದಾರೆ.
1 ಕೋಟಿಗೂ ಅಧಿಕ ಮೊತ್ತದ ಬಿಡ್‌ಗಳಿಗೆ ಪ್ರಿಬಿಡ್ ಮೀಟಿಂಗ್ ಕರೆಯಬೇಕು. ಆದರೆ, 8 ಟೆಂಡರ್ಗಳು ಅದಕ್ಕಿಂತ ದೊಡ್ಡ ಮಟ್ಟದ್ದಾಗಿವೆ. ಟೆಂಡರ್ ಪೂರ್ವ ಸಭೆ ಕರೆಯದೇ ಅಂತಿಮಗೊಳಿಸಲಾಗಿದೆ. ಕೇವಲ 2 ಕಂಪನಿಗಳು ಮಾತ್ರ ಟೆಂಡರ್ನಲ್ಲಿ ಭಾಗವಹಿಸಿದ್ದರೂ, ರೀ ಟೆಂಡರ್ ಮಾಡದೇ ಖರೀದಿ ಮಾಡಲು ಅವಕಾಶ ನೀಡಲಾಗಿದೆ.
ಲ್ಯಾಪ್ಟಾಪ್ ಖರೀದಿಯಲ್ಲೂ ಅಕ್ರಮ ಆರೋಪ : 2019ರಲ್ಲಿ ಒಂದು ಸಿಎನ್ಸಿ ಮಷಿನ್ಗೆ ₹28 ಲಕ್ಷ ನೀಡಿ ಖರೀದಿ ಮಾಡಿದ್ದಾರೆ. 2020ರಲ್ಲಿ ಸಿಎನ್ಸಿ ಮಷಿನ್ಗೆ 31ಲಕ್ಷ ರೂ. ಕೊಟ್ಟು ಖರೀದಿಸಲಾಗಿದೆ. ಅದೇ ಮಷಿನ್ಗೆ ಜಿಟಿಟಿಸಿಯಿಂದ 99 ಲಕ್ಷ ರೂ. ಕೊಟ್ಟು ಸಿಎನ್ಸಿ ಮಷಿನ್ ಖರೀದಿ ಮಾಡಲಾಗಿದೆ.
ಅಕ್ರಮ ಟೆಂಡರ್ ನಡೆಸಲು ಟೆಂಡರ್ ನಿಯಮಗಳನ್ನು ಮುಚ್ಚಿಟ್ಟು ಪ್ರಕ್ರಿಯೆ ನಡೆಸಲಾಗಿದೆ. ಅಶ್ವತ್ಥ ನಾರಾಯಣ ಯಾಕೆ ರೈಲ್ವೆ ಇಲಾಖೆಯಿಂದ ರಾಘವೇಂದ್ರ ಅವರನ್ನು ಇಲಾಖೆಗೆ ಕರೆಸಿಕೊಂಡರು? ಎಂದು ಪ್ರಶ್ನಿಸಿದ್ದಾರೆ.
ಈ ಹಿಂದೆ ಸದನದಲ್ಲಿ ಧ್ವನಿ ಎತ್ತಿದ್ದೆವು
ಹಿಂದೆ ಕೂಡ ಲ್ಯಾಪ್ಟಾಪ್ ಖರೀದಿಯಲ್ಲಿ ಅಕ್ರಮದ ಬಗ್ಗೆ ನಾವು ಸದನದಲ್ಲೂ ಧ್ವನಿ ಎತ್ತಿದ್ದೆವು. ನಮ್ಮ ಸರ್ಕಾರ ಇದ್ದಾಗ ವಿದ್ಯಾರ್ಥಿಗಳಿಗೆ ನೀಡಲು 18 ಸಾವಿರದಲ್ಲಿ ಏಸರ್ ಕಂಪನಿ ಲ್ಯಾಪ್ಟಾಪ್ ಖರೀದಿ ಮಾಡಿದ್ದೆವು. ಇದೇ ಅಶ್ವತ್ಥ ನಾರಾಯಣ ಬಂದಾಗ ಅದೇ ಕಂಪನಿ ಲ್ಯಾಪ್‌ಟಾಪ್ಗೆ 28 ಸಾವಿರ ರೂ. ಹಣ ಕೊಟ್ಟು 1 ಲಕ್ಷ ಯುನಿಟ್ ಖರೀದಿ ಮಾಡಿದ್ದಾರೆ ಎಂದಿದ್ದಾರೆ.
ಎಲ್‌ ಅಂಡ್ ಟಿ ಟೆಕ್ವಿಪ್‌ಮೆಂಟ್ ಖರೀದಿ ಮಾರುಕಟ್ಟೆ ಮೌಲ್ಯ ₹4.50 ಕೋಟಿ. ಆದರೆ, ಖರೀದಿಸಿರುವುದು 9.48 ಕೋಟಿ ರೂಪಾಯಿಗೆ. ಅಕ್ಯುರಾ ಟೆಕ್ವಿಪ್‌ಮೆಂಟ್ ಖರೀದಿಯಲ್ಲೂ ಅವ್ಯವಹಾರ ಆಗಿದೆ. ಟೆಂಡರ್ನಲ್ಲಿ ಭಾಗಿಯಾದವರು ಉತ್ಪಾದನೆ ಮಾಡುವವರಲ್ಲ.
ನಿರಂತರವಾಗಿ ಪೂರೈಕೆ ಮಾಡುವವರೂ ಅಲ್ಲ. ಹಾಗಾದರೆ, ಇಂಥವರಿಗೆ ಟೆಂಡರ್ ಕೊಟ್ಟಿದ್ದೇಕೆ? ಪಾರದರ್ಶಕ ಟೆಂಡರ್ ಕಾಯ್ದೆ ಅನ್ವಯವಾಗಿಲ್ಲ. ಮೋದಿ ತಿನ್ನೋಕೆ ಬಿಡಲ್ಲ ಅಂತಾರೆ. ಆದರೆ, ತರಬೇತಿ ಕೇಂದ್ರದಲ್ಲಿ ಭ್ರಷ್ಟಾಚಾರ ನಡೆಯುತ್ತಿದೆ ಎಂದು ಉಗ್ರಪ್ಪ ಆರೋಪಿಸಿದ್ದಾರೆ.
ಇದನ್ನೂ ಓದಿ: ನಂಜನಗೂಡಿನಲ್ಲಿ ದೇವಸ್ಥಾನ ನೆಲಸಮ... ಬಿಜೆಪಿಗೆ ಹಿಂದುತ್ವ ರಕ್ಷಣೆಯ ನೆ‌ನಪಾಗಲಿಲ್ಲವೇ?: ಸಿದ್ದರಾಮಯ್ಯ ಕಿಡಿ
