ಬೆಂಗಳೂರು: ಆನ್‍ಲೈನ್ ಅರ್ನಿಂಗ್ ಆ್ಯಪ್ ಹೆಸರಿನ ಸೂಪರ್ ಲೈಕ್ ಅಪ್ಲಿಕೇಷನ್ ಹಾಗೂ ಆನ್‍ಲೈನ್ ಮೂಲಕ ಪಾರ್ಟ್ ಟೈಮ್ ಜಾಬ್ ನೀಡುವುದಾಗಿ ನಂಬಿಸಿ ಕೋಟ್ಯಾಂತರ ರೂ. ಹೂಡಿಕೆ ಮಾಡಿಸಿಕೊಂಡು ವಂಚಿಸುತ್ತಿದ್ದ ಎರಡು ಪ್ರತ್ಯೇಕ ಪ್ರಕರಣಗಳಲ್ಲಿ 20 ಮಂದಿಯನ್ನು ನಗರದ ದಕ್ಷಿಣ ವಿಭಾಗದ ಪೊಲೀಸರು ಬಂಧಿಸಿದ್ದಾರೆ.
ಆರೋಪಿಗಳ ಬ್ಯಾಂಕ್ ಖಾತೆಯಲ್ಲಿದ್ದ 16.4 ಕೋಟಿ ರೂ.ಗೂ ಅಧಿಕ ಹಣವನ್ನು ತಡೆಹಿಡಿಯಲಾಗಿದ್ದು, 14.11 ಲಕ್ಷ ರೂ. ನಗದು, 7ಕ್ಕೂ ಅಧಿಕ ಮೊಬೈಲ್‍ಗಳು, ಎರಡು ಲ್ಯಾಪ್‍ಟಾಪ್, ಎರಡು ಕಾರುಗಳು ಹಾಗೂ ಇನ್ನಿತರ ದಾಖಲೆಗಳನ್ನು ಜಪ್ತಿ ಮಾಡಲಾಗಿದೆ ಎಂದು ದಕ್ಷಿಣ ವಿಭಾಗದ ಡಿಸಿಪಿ ಹರೀಶ್ ಪಾಂಡೆ ತಿಳಿಸಿದ್ದಾರೆ.
ನಿರುದ್ಯೋಗಿಗಳೇ ಟಾರ್ಗೆಟ್:
ಕೊರೊನಾದಿಂದ ಉದ್ಯೋಗ ಕಳೆದುಕೊಂಡಿದ್ದ ನಿರುದ್ಯೋಗಿಗಳನ್ನೇ ಗುರಿಯಾಗಿಸಿಕೊಂಡು ಆನ್‍ಲೈನ್ ಅರ್ನಿಂಗ್ ಆ್ಯಪ್ ಸೃಷ್ಟಿಸಿದ್ದ ಆರೋಪಿಗಳು ಈ ಆ್ಯಪ್‍ನಲ್ಲಿ ಬರುವ ಸೆಲೆಬ್ರಿಟಿಗಳ ವಿಡಿಯೋಗಳನ್ನು ಶೇರ್ ಮಾಡಿದರೆ ಪ್ರತಿ ವಿಡಿಯೋಗಳಿಗೆ 20 ರೂ. ನೀಡುವುದಾಗಿ ನಂಬಿಸಿದ್ದರು.
ಅದರಂತೆ, ಸಾಮಾಜಿಕ ಜಾಲತಾಣವಾದ ಫೇಸ್‍ಬುಕ್, ಇನ್ಸ್ಟಾಗ್ರಾಮ್, ವಾಟ್ಸ್ಆ್ಯಪ್, ಟ್ವಿಟರ್ ಮೂಲಕ ಈ ಆ್ಯಪ್ ಪರಿಚಯಿಸಿದ್ದರು. ಇದನ್ನು ಡೌನ್‍ಲೋಡ್ ಮಾಡಿಕೊಳ್ಳುವ ಗ್ರಾಹಕರನ್ನು ಫೋನ್ ಮೂಲಕ ಸಂಪರ್ಕಿಸುತ್ತಿದ್ದರು. ಬಳಿಕ ಮನೆಯಿಂದಲೇ ಪಾರ್ಟ್‍ಟೈಮ್ ಟಾಸ್ಕ್ ಆಗಿ ನೀಡಿ ಸೆಲೆಬ್ರಿಟಿಗಳ ವಿಡಿಯೋ, ಫೋಟೋಗಳನ್ನು ಸೂಪರ್ ಲೈಕ್ ಅಪ್ಲಿಕೇಷನ್ ಮೂಲಕ ಶೇರ್ ಮಾಡಿದಾಗ ಪ್ರತಿ ವಿಡಿಯೋ, ಫೋಟೋ 20 ರೂ ಕೊಡುವುದಾಗಿ ನಂಬಿಸಿದ್ದರು. ಇದಕ್ಕೆ ಗ್ರಾಹಕರು ಮೊದಲೇ 30ರಿಂದ 80 ಸಾವಿರ ರೂ.ವರೆಗೆ ಆರೋಪಿಗಳು ಹೇಳಿದ ಖಾತೆಗೆ ಠೇವಣಿ ಇಟ್ಟು ಟಾರಿಫ್ ಪಡೆಯಬೇಕು ಎಂದು ತಿಳಿಸಿದ್ದರು.
ಸೈಯದ್ ಎಂಬುವರು 50 ಸಾವಿರ ರೂ. ಡೆಪಾಸಿಟ್ ಮಾಡಿದ ಬಳಿಕ ಟಾರಿಫ್ ಪಡೆದು ಸ್ವಲ್ಪ ಹಣ ಗಳಿಸಿದ್ದರು. ಇದನ್ನು ಪಡೆಯಲು ಹೋದಾಗ ಇನ್ನೂ ಹೆಚ್ಚಿನ ಹಣ ಡೆಪಾಸಿಟ್ ಮಾಡಿ, ಜತೆಗೆ ಪರಿಚಯಸ್ಥರಿಂದಲೂ ಹೂಡಿಕೆ ಮಾಡಿಸಿದರೆ ಹೆಚ್ಚಿನ ಲಾಭಾಂಶ ನೀಡುವುದಾಗಿ ಆಸೆ ಹುಟ್ಟಿಸಿದ್ದರು. ಈ ಮಾತನ್ನು ನಂಬಿದ ಸೈಯದ್ 44 ಗ್ರಾಹಕರಿಂದ 19.76 ಲಕ್ಷ ರೂ. ಹೂಡಿಕೆ ಮಾಡಿಸಿದ್ದರು. ದಿನ ಕಳೆದಂತೆ ಯಾವುದೇ ಹಣ ಬರದಿದ್ದಾಗ ತಾವು ಮೋಸ ಹೋಗಿರುವುದನ್ನು ತಿಳಿದು ಹಣ ಹೂಡಿಕೆ ಮಾಡಿಸಿಕೊಂಡಿದ್ದ ಶರ್ಮಾ, ಅಬ್ದುಲ್, ಕಾರ್ಟೂನ್, ಅಶೋಕ್ ಕುಮಾರ್ ವಿರುದ್ಧ ಬನಶಂಕರಿ ಠಾಣೆಯಲ್ಲಿ ದೂರು ನೀಡಿದ್ದರು.
ದೂರಿನನ್ವಯ ಕಾರ್ಯಾಚರಣೆ ನಡೆಸಿ ಹಣ ಹೂಡಿಕೆ ಮಾಡಿರುವ 210 ಮಂದಿ ವಿಚಾರಣೆ ನಡೆಸಿದ ಬಳಿಕ 14 ಮಂದಿ ಆರೋಪಿಗಳನ್ನು ಬಂಧಿಸಿ, ಹೂಡಿಕೆ ಮಾಡಿಸಿಕೊಂಡಿದ್ದ ನಾನಾ ಬ್ಯಾಂಕ್ ಖಾತೆಯಲ್ಲಿದ್ದ 5.40 ಕೋಟಿ ರೂ ತಡೆ ಹಿಡಿದಿದ್ದಾರೆ.
ಮತ್ತೊಂದು ಪ್ರಕರಣ:
ಮತ್ತೊಂದು ಪ್ರಕರಣದಲ್ಲಿ ಕೋಣನಕುಂಟೆ ಪೊಲೀಸ್ ಠಾಣೆಯ ವ್ಯಾಪ್ತಿಯಲ್ಲಿ ಆ್ಯಪ್ ಮೂಲಕ ಆನ್‍ಲೈನ್ ಪಾರ್ಟ್‍ಟೈಮ್ ಕೆಲಸ ಕೊಡುವುದಾಗಿ ನಂಬಿಸಿ ನೂರಾರು ಜನರಿಗೆ ಕೋಟ್ಯಾಂತರ ರೂ. ವಂಚಿಸಿದ್ದ ಹಿಮಾಚಲ ಪ್ರದೇಶದ ಓರ್ವ ಸೇರಿ ನಗರದ ಆರು ಮಂದಿಯನ್ನು ಬಂಧಿಸಿ ನ್ಯಾಯಾಂಗ ಬಂಧನಕ್ಕೊಳಪಡಿಸಲಾಗಿದೆ.
ಆರೋಪಿಗಳು ಕೀಪ್ ಶೇರರ್ ಎಂಬ ಎಪಿಕೆ ಲಿಂಕ್ ಅನ್ನು ಚೀನಾ ಲೋನ್ ಆ್ಯಪ್ ಎಂಬಂತೆ ಬಿಂಬಿಸಿ ಚೀನಾ ಐಟಿ ಡೆವಲಪರ್ಸ್‍ಗಳಿಂದ ಅಭಿವೃದ್ಧಿಪಡಿಸಿ ಈ ಲಿಂಕ್ ಅನ್ನು ದೇಶಾದ್ಯಂತ ಹರಿಬಿಟ್ಟಿದ್ದರು. ಈ ಕೀಪ್ ಶೇರರ್ ಎಂಬ ಆ್ಯಪ್ ಮೂಲಕ ಹಣ ಹೂಡಿಕೆ ಮಾಡಿ ಈ ಆ್ಯಪ್‍ನಲ್ಲಿ ಬರುವ ಸೆಲೆಬ್ರಿಟಿಗಳ ವಿಡಿಯೋ ಫೋಟೋಗಳನ್ನು ನೋಡುವುದು, ಲೈಕ್ ಮಾಡುವುದು ಹಾಗೂ ಶೇರ್ ಮಾಡುವ ಮೂಲಕ ಪ್ರತಿ ವಿಡಿಯೋಗೆ 20 ರೂ. ಸಂಪಾದಿಸಬಹುದು ಎಂದು ಆರೋಪಿಗಳು ತಯಾರಿಸಿದ್ದ ವಾಟ್ಸ್ಆ್ಯಪ್ ವ್ಯಾಲೆಟ್‍ಗಳಲ್ಲಿ ತಿಳಿಸುತ್ತಿದ್ದರು.
ನಂಬಿದವರಿಂದ ಹಣ ಹೂಡಿಕೆ ಮಾಡಿಸಿಕೊಳ್ಳಲು ಬೇರೆಯವರ ಹೆಸರಿನಲ್ಲಿ ಖರೀದಿಸಿದ್ದ ಸಿಮ್‍ಗಳ ಮೂಲಕ ತೆರೆದಿದ್ದ ಪೇಟಿಯಂ, ಯುಪಿಐ ವ್ಯಾಲೆಟ್‍ಗಳನ್ನು ದುರ್ಬಳಕೆ ಮಾಡಿಕೊಳ್ಳುತ್ತಿದ್ದರು. ಸಾರ್ವಜನಿಕರಿಂದ ಹೂಡಿಕೆ ಮಾಡಿಸಿಕೊಳ್ಳಲು 8 ಬ್ಯಾಂಕ್ ಖಾತೆ ತೆರೆದಿರುವುದು ತನಿಖೆಯಿಂದ ತಿಳಿದುಬಂದಿದೆ.
ವಂಚನೆಗೊಳಗಾದ ತಿಪ್ಪೆಸ್ವಾಮಿ ಎಂಬುವರು ಕೋಣನಕುಂಟೆ ಪೊಲೀಸ್ ಠಾಣೆಯಲ್ಲಿ ನೀಡಿದ ದೂರಿನ ಮೇರೆಗೆ ದಕ್ಷಿಣ ವಿಭಾಗದ ಡಿಸಿಪಿ ಹರೀಶ್ ಪಾಂಡೆ ಮಾರ್ಗದರ್ಶನದಲ್ಲಿ ಪೊಲೀಸರು ಕಾರ್ಯಾಚರಣೆ ನಡೆಸಿದ್ದಾರೆ. ಈ ವೇಳೆ ಆರೋಪಿಗಳು ಸಾರ್ವಜನಿಕರಿಂದ ಹಣ ಸಂಗ್ರಹಿಸಲು ತೆರೆದಿದ್ದ ಬ್ಯಾಂಕ್ ಖಾತೆ, ಯುಪಿಐ ಐಡಿಗಳು, ನಾನಾ ಪೇಮೆಂಟ್ ಗೇಟ್‍ವೇಗಳು ಪರಿಶೀಲಿಸಿದಾಗ 25 ಕೋಟಿ ರೂ ಗೂ ಹೆಚ್ಚು ಹಣ ಹೂಡಿಕೆ ಮಾಡಿಸಿಕೊಂಡಿರುವುದು ಬೆಳಕಿಗೆ ಬಂದಿದೆ.
ಸದ್ಯ ವಂಚನೆಗೊಳಗಾದ 75 ಮಂದಿ ವಿಚಾರಣೆ ನಡೆಸಿ, ಫಲಾನುಭವಿಗಳ 200ಕ್ಕೂ ಹೆಚ್ಚು ಖಾತೆಗಳನ್ನು ಪರಿಶೀಲಿಸಿ, ಚಾಲ್ತಿಯಲ್ಲಿದ್ದ 110 ಖಾತೆಗಳಲ್ಲಿನ 11.03 ಕೋಟಿ ರೂ. ತಡೆಹಿಡಿಯಲಾಗಿದೆ. ಆರು ಮಂದಿ ಆರೋಪಿಗಳನ್ನು ಬಂಧಿಸಿ ಏಳು ಮೊಬೈಲ್‍ಗಳು, ಎರಡು ಲ್ಯಾಪ್‍ಟಾಪ್, ಇತರ ದಾಖಲೆಗಳನ್ನು ಪೊಲೀಸರು ವಶಪಡಿಸಿಕೊಂಡಿದ್ದಾರೆ.
ಇದನ್ನೂ ಓದಿ: ಬೆಂಗಳೂರು: ಮದ್ಯದ ಅಮಲಿನಲ್ಲಿ ಚಾಕು ಇರಿದ ತಂದೆ, ಹಾರಿಹೋಯ್ತು ಮಗನ ಪ್ರಾಣ
