ಬೆಂಗಳೂರು: ಕೊರೊನಾ ಸೋಂಕಿತರಿಗೆ ಆಯುರ್ವೇದ ಔಷಧಿ ಪ್ರಯೋಗ ಯತ್ನಕ್ಕೆ ಮೆಡಿಸಿನ್ ಲಾಬಿ ಅಡ್ಡಿಯಾಗಿದೆ ಎನ್ನುವುದನ್ನು ಆಯುರ್ವೇದ ವೈದ್ಯ ಡಾ.ಗಿರಿಧರ್ ಕಜೆ ತಳ್ಳಿಹಾಕಿದ್ದಾರೆ. ಎರಡನೇ ಹಂತದ ಕ್ಲಿನಿಕಲ್ ಟ್ರಯಲ್ಗೆ ಸಿದ್ಧತೆ ಮಾಡಿಕೊಳ್ಳಲಾಗುತ್ತಿದೆ. ಈ ಬಾರಿ ದೊಡ್ಡಮಟ್ಟದ ಟ್ರಯಲ್ಗೆ ಮುಂದಾಗಲಿದ್ದೇವೆ ಎಂದು ಅವರು ಸ್ಪಷ್ಟಪಡಿಸಿದ್ದಾರೆ.
ಈ ಕುರಿತು 'ಈಟಿವಿ ಭಾರತ'ಕ್ಕೆ ಎಕ್ಸ್ಕ್ಲೂಸಿವ್ ಕಿರು ಸಂದರ್ಶನ ನೀಡಿದ್ದು, ತಮ್ಮ ಅಭಿಪ್ರಾಯಗಳನ್ನು ಹಂಚಿಕೊಂಡಿದ್ದಾರೆ. ಮೊದಲ ಹಂತದ ಟ್ರಯಲ್ ಯಶಸ್ವಿಯಾಗಿದೆ. ರಾಜ್ಯದಲ್ಲಿ 400 ಪ್ರಕರಣ ಇದ್ದಾಗ 10 ಜನ ಸೋಂಕಿತರ ಮೇಲೆ ಪ್ರಯೋಗ ಮಾಡಲಾಯಿತು. ಹೃದ್ರೋಗ, ಕ್ಷಯದಂತಹ ಗಂಭೀರ ಆರೋಗ್ಯ ಸಮಸ್ಯೆ ಇರುವವರನ್ನೂ ಕ್ಲಿನಿಕಲ್ ಟ್ರಯಲ್ಗೆ ಬಳಸಿಕೊಳ್ಳಲಾಯಿತು. ಎಲ್ಲಾ 10 ಸೋಂಕಿತರು ಗುಣಮುಖರಾಗಿದ್ದಾರೆ. ಈಗ ದೊಡ್ಡ ಸಂಖ್ಯೆಯ ಕ್ಲಿನಿಕಲ್ ಟ್ರಯಲ್ಗೆ ಸಿದ್ಧತೆ ಮಾಡಿಕೊಳ್ಳಲಾಗುತ್ತಿದೆ ಎಂದು ಡಾ. ಗಿರಿಧರ್ ಕಜೆ ಮಾಹಿತಿ ನೀಡಿದ್ದಾರೆ.
ಪ್ರಾಥಮಿಕ ಸಂಪರ್ಕಿತರಿಗೆ ಆಯುರ್ವೇದ ಔಷದ ಕೊಟ್ಟರೆ ಸೋಂಕು ನಿಯಂತ್ರಣಕ್ಕೆ ಸಹಕಾರ ಆಗಲಿದೆ ಅಂತಾ ಸರ್ಕಾರಕ್ಕೆ ಸಲಹೆ ಕೊಟ್ಟಿದ್ದೇನೆ. ಪ್ರಾಥಮಿಕ ಸಂಪರ್ಕಿತರ ಸಂಖ್ಯೆ ಬಹಳ ದೊಡ್ಡದಿದೆ. ಆದರೂ ಇಷ್ಟು ದೊಡ್ಡಸಂಖ್ಯೆ ನಿರ್ವಹಿಸಲು ಮಾಡಲು ತೊಂದರೆ ಇಲ್ಲ. ಪ್ರಾಥಮಿಕ ಸಂಪರ್ಕಿತರಿಗೆ ಮೊದಲು ನೆಗಟಿವ್ ವರದಿ ಬಂದು ನಂತರ ಕೆಲ ದಿನದಲ್ಲಿ ಪಾಸಿಟಿವ್ ವರದಿ ಬರಲಿದೆ. ಹಾಗಾಗಿ ಅವರಿಗೆ ಮೊದಲು ಕೊಟ್ಟರೆ ಅನುಕೂಲ ಆಗಲಿದೆ. ಸೋಂಕು ನಿಯಂತ್ರಣಕ್ಕೆ ಬರಲಿದೆ ಎಂದು ಕಜೆ ಹೇಳಿದ್ದಾರೆ.
70 ಲಕ್ಷ ಮಾತ್ರೆಗಳು ಬೇಕು:
ಪ್ರಾಥಮಿಕ ಸಂಪರ್ಕಿತರಿಗೆ ಕೊಡಲು 70 ಲಕ್ಷ ಮಾತ್ರೆಗಳು ಬೇಕು. ಅದಕ್ಕೆ ಸಿದ್ಧತೆ ನಡೆದಿದೆ ಎಂದ ವೈದ್ಯ ಗಿರಿಧರ್, ಮೆಡಿಸಿನ್ ಲಾಬಿಯಂತಹ ಚಟುವಟಿಕೆ ನಡೆಸಿಲ್ಲ, ಸಚಿವರು ಕರೆದು ಮಾತನಾಡಿದ್ದಾರೆ. ಸಿಎಂ ಹಾಗು ಸರ್ಕಾರ ಸಹಕಾರ ನೀಡುತ್ತಿದ್ದಾರೆ. ಏಕಾಏಕಿ ಇದನ್ನೆಲ್ಲಾ ಮಾಡಲು ಸಾಧ್ಯವಿಲ್ಲ, ಇದು ವಿಪತ್ತು ಕಾಯ್ದೆ ಅಡಿಯಲ್ಲಿ ಬರಲಿದೆ. ಹಾಗಾಗಿ ಯಾರು ಬೇಕಾದರೂ ಟ್ರಯಲ್ ಮಾಡುವಂತಿಲ್ಲ. ಹಾಗಾಗಿ ಸಮಯ ತೆಗೆದುಕೊಳ್ಳುತ್ತಿದೆ. ಆದರೆ, ಜನರಿಗೆ ಬೇಗ ಔಷಧಿ ಸಿಗಲಿ ಎನ್ನುವ ಆತುರ ಇದೆ. ಹಾಗಾಗಿ ಇಂತಹ ಪೋಸ್ಟ್ಗಳನ್ನು ಸಾಮಾಜಿಕ ಜಾಲತಾಣದಲ್ಲಿ ಹಾಕಿರಬಹುದು ಎಂದು ಮೆಡಿಸಿನ್ ಲಾಬಿಯನ್ನು ಅಲ್ಲಗಳೆದರು.
ಸೋಂಕಿತರಿಗೆ ಕ್ಲಿನಿಕಲ್ ಟ್ರಯಲ್ ದೊಡ್ಡ ಮಟ್ಟದಲ್ಲಿ ಮುಂದುವರೆಬೇಕು. ಅದೇ ರೀತಿ ದೊಡ್ಡ ಸಂಖ್ಯೆಯಲ್ಲಿ ಪ್ರಾಥಮಿಕ ಸಂಪರ್ಕಿತರಿಗೆ ಮೊದಲು ಆದ್ಯತೆ ನೀಡಬೇಕಿದ್ದು, ಆ ನಿಟ್ಟಿನಲ್ಲಿ ಪ್ರಯತ್ನ ನಡೆದಿದೆ. ಸಾಮಾನ್ಯ ಜನರಿಗೆ ನಂತರ ಔಷಧಿ ನೀಡಲಾಗುತ್ತದೆ. ಅವರು, ಸದ್ಯ ಈಗ ಕಷಾಯ, ತುಳಸಿ ನೀರು ಸೇವಿಸಿ ಆರೋಗ್ಯ ಕಾಪಾಡಿಕೊಳ್ಳಬೇಕು ಎಂದು ಸಲಹೆ ನೀಡಿದರು.
ಸೋಂಕಿತರ ಪ್ರಾಥಮಿಕ ಸಂಪರ್ಕಿತರ ಮಾಹಿತಿ ಸರ್ಕಾರದ ಬಳಿ ಇರಲಿದೆ. ಅದರ ಆಧಾರದಲ್ಲಿ ಅವರಿಗೆ ಔಷಧ ಕೊಡಬೇಕು. ಕೊಟ್ಟ ತಕ್ಷಣ ಕೊರೊನಾ ಸೋಂಕು ಕಡಿಮೆ ಆಗಲಿದೆ ಎನ್ನುವ ಭ್ರಮೆ ಇಲ್ಲ. ಆದರೆ, ನಿಯಂತ್ರಣಕ್ಕೆ ಬರಲಿದೆ ಎಂದು ವಿಶ್ವಾಸ ವ್ಯಕ್ತಪಡಿಸಿದರು.
ನಾವು ಮಾರಾಟ ಮಾಡುತ್ತಿಲ್ಲ:
ಕೆಲವೇ ದಿನಗಳಲ್ಲಿ ಎರಡನೇ ಹಂತದ ಟ್ರಯಲ್ ಆರಂಭಗೊಳ್ಳಲಿದೆ. ಈ ಬಾರಿ ದೊಡ್ಡ ಮಟ್ಟದಲ್ಲಿ ಮಾಡಲಿದ್ದೇವೆ. ಅದಕ್ಕೆ ಬೇಕಾದ ಎಲ್ಲಾ ಸಿದ್ಧತೆಯೂ ನಡೆಯುತ್ತಿದೆ. ಸದ್ಯ ನಾವು ಔಷಧಿಯನ್ನು ಯಾರಿಗೂ ಮಾರಾಟ ಮಾಡುತ್ತಿಲ್ಲ. ನಮ್ಮ ಪ್ರಾಮುಖ್ಯತೆ ಅಗತ್ಯ ಇರವವರಿಗೆ ಕೊಡಬೇಕು ಎನ್ನುವುದು. ಹಾಗಾಗಿ ಸರ್ಕಾರದ ಮೂಲಕ ಪ್ರಾಥಮಿಕ ಸಂಪರ್ಕಿತರಿಗೆ ತಲುಪಬೇಕು. ನೇರವಾಗಿ ಜನರಿಗೆ ಕೊಡಲು ಸಾಧ್ಯವಿಲ್ಲ. ಒಂದು ವೇಳೆ ಕೊಟ್ಟರೆ ಬೇಕಾದವರಿಗೆ ಸಿಗಲ್ಲ. ಹಾಗಾಗಿ 150 ರೂ.ಗೆ ಔಷಧಿ ಸಿಗಲಿದೆ ಎನ್ನುವ ಮಾಹಿತಿ ತಪ್ಪು, ನಾವು ಮಾರಾಟ ಮಾಡುತ್ತಿಲ್ಲ ಎಂದು ಡಾ. ಗಿರಿಧರ್ ಕಜೆ ಸ್ಪಷ್ಟಪಡಿಸಿದರು.
ಕೊರೊನಾ ನಿಯಂತ್ರಿಸುವುವುದು ಒಬ್ಬರಿಂದ ಮಾತ್ರ ಸಾಧ್ಯವಿಲ್ಲ, ಲಕ್ಷ ಲಕ್ಷ ಮಾತ್ರೆಗಳಿಗೆ ಬೇಡಿಕೆ ಬಂದಿದೆ. ಬರೀ ಮಾತ್ರೆಯನ್ನ ಮಾಡುತ್ತಾ ಕುಳಿತರೆ ನಮ್ಮ ಮಟ್ಟದಲ್ಲಿ ಮಾತ್ರ ನಾವು ಹಣ ಮಾಡಬಹುದು ಅಷ್ಟೇ. ಆದರೆ, ಮಾತ್ರೆ ದೇಶದ ಎಲ್ಲರಿಗೂ ತಲುಪಬೇಕು. ಹಾಗಾಗಿ ಪೇಟೆಂಟ್ನ್ನು ಸರ್ಕಾರಕ್ಕೆ ಕೊಡಲು ನಿರ್ಧರಿಸಲಾಗಿದೆ ಎಂದರು. ಕೊರೊನಾ ಬಗ್ಗೆ ಎಚ್ಚರಿಕೆ ಅಗತ್ಯ, ಈ ಕಾಯಿಲೆ ದೊಡ್ಡದು ಎಂದು ಹೆದರಿ ಕುಳಿತುಕೊಳ್ಳುವುದಲ್ಲ. ಇದು ದುರ್ಬಲ ವೈರಾಣು, ಕೆಲವರಿಗೆ ಮಾತ್ರ ತೊಂದರೆ ಕೊಟ್ಟಿದೆ ಅಷ್ಟೇ. ಬಹಳ ಮೈಲ್ಡ್ ಆಗಿ ಕಾಣಿಸಿಕೊಳ್ಳಲಿದೆ. ವೇಗವಾಗಿ ಹಬ್ಬುತ್ತಿದೆ. ಹಾಗಾಗಿ ಆದಷ್ಟು ಜಾಗೃತಿ ವಹಿಸಬೇಕು ಎಂದು ಜನರಿಗೆ 'ಈಟಿವಿ ಭಾರತ' ಮೂಲಕ ಕಜೆ ಸಲಹೆ ನೀಡಿದರು.
