ಬೆಂಗಳೂರು: ಸಕ್ಕರೆ ಕಾರ್ಖಾನೆಯ ಸುತ್ತಮುತ್ತ 15 ಕಿ. ಮೀ ವ್ಯಾಪ್ತಿಯಲ್ಲಿ ಎಥೆನಾಲ್ ಉತ್ಪಾದನಾ ಘಟಕ ಸ್ಥಾಪಿಸುವಂತಿಲ್ಲ ಎಂದು ಹೈಕೋರ್ಟ್ ಆದೇಶಿಸಿದೆ. ಆಸ್ಕಿನ್ಸ್ ಬಯೋಫ್ಯುಯೆಲ್ಸ್ ಪ್ರೈವೇಟ್ ಲಿಮಿಟೆಡ್ ಮತ್ತು ಶ್ರೀ ಬ್ರಹ್ಮಾನಂದಸಾಗರ್ ಸಕ್ಕರೆ ಕೈಗಾರಿಕೆ ಸಲ್ಲಿಸಿದ್ದ ಅರ್ಜಿ ವಜಾಗೊಳಿಸಿ ನ್ಯಾ. ಎನ್. ಎಸ್ ಸಂಜಯ್ ಗೌಡ ಅವರಿದ್ದ ಏಕ ಸದಸ್ಯಪೀಠ ಈ ಆದೇಶ ಮಾಡಿದೆ.
1966 ಮತ್ತು 2021ರ ಕಬ್ಬು (ನಿಯಂತ್ರಣ) ಆದೇಶದ ನಿಬಂಧನೆಗಳನ್ನು ವಿಶ್ಲೇಷಿಸಿರುವ ನ್ಯಾಯಪೀಠವು, 2021ರಿಂದೀಚೆಗೆ ಸಕ್ಕರೆ ಮತ್ತು ಎಥೆನಾಲ್ ಎರಡನ್ನೂ ತಯಾರಿಸುವ ಅಗತ್ಯವಿಲ್ಲ ಮತ್ತು ಸಕ್ಕರೆ ಅಥವಾ ಎಥೆನಾಲ್ ಎರಡರಲ್ಲಿ ಒಂದು ತಯಾರಿಸಿದರೆ, ಕಾನೂನಿನ ಅಡಿಯಲ್ಲಿ ಸಕ್ಕರೆ ಕಾರ್ಖಾನೆಯನ್ನು ‘ಕಾರ್ಖಾನೆ ಅಥವಾ ಸಕ್ಕರೆ ಕಾರ್ಖಾನೆ’ ಎಂದು ವ್ಯಾಖ್ಯಾನಿಸಬಹುದಾಗಿದೆ ಎಂದು ನ್ಯಾಯಪೀಠ ತನ್ನ ಆದೇಶದಲ್ಲಿ ತಿಳಿಸಿದೆ.
15 ಕಿ. ಮೀ ವ್ಯಾಪ್ತಿಯ ನಿರ್ಬಂಧ ಅನ್ವಯಿಸುತ್ತದೆ: 2021ರಿಂದ ಕಬ್ಬು (ನಿಯಂತ್ರಣ) ತಿದ್ದುಪಡಿ ಆದೇಶ ಜಾರಿಗೆ ಬಂದಿದೆ. ಅದರಲ್ಲಿ ‘ಕಾರ್ಖಾನೆ’ ವ್ಯಾಖ್ಯಾನದಲ್ಲಿ ಬಳಸಲಾದ ಭಾಷೆ ಮತ್ತು ವಿರಾಮ ಚಿಹ್ನೆಯನ್ನು ವಿಶ್ಲೇಷಿಸಿದಾಗ, ನ್ಯಾಯಾಲಯವು ಕೇವಲ ಎಥೆನಾಲ್ ಅನ್ನು ಕಾರ್ಖಾನೆಯ ಆವರಣ/ಕಾರ್ಖಾನೆಯಲ್ಲಿ ತಯಾರಿಸಿದ್ದರೂ, ಸಕ್ಕರೆ ಕಾರ್ಖಾನೆ ವ್ಯಾಖ್ಯಾನದಲ್ಲಿ ರಚಿಸಲಾದ ಕಾನೂನು ಮೂಲಕ ‘ಸಕ್ಕರೆ ಕಾರ್ಖಾನೆ‘ ಎಂದು ಪರಿಗಣಿಸಲು ಸಕ್ಕರೆ ಉತ್ಪಾದಿಸುವ ಅಗತ್ಯವಿಲ್ಲ ಮತ್ತು ಪರಿಣಾಮವಾಗಿ ಕೇವಲ ಎಥೆನಾಲ್ ಉತ್ಪಾದಿಸುವ ಕಾರ್ಖಾನೆ ಸ್ಥಾಪಿಸಲು ಸಹ 15 ಕಿ. ಮೀ ವ್ಯಾಪ್ತಿಯ ನಿರ್ಬಂಧ ಅನ್ವಯಿಸುತ್ತದೆ ಎಂದು ಕೋರ್ಟ್ ಆದೇಶಿಸಿದೆ.
ಸಕ್ಕರೆ ಕಾರ್ಖಾನೆಗೂ ತೊಂದರೆ ಆಗಲಿದೆ: ಎಥೆನಾಲ್ ತಯಾರಿಕೆಯು ಕಬ್ಬಿನ ರಸ/ ಸಕ್ಕರೆ ಪಾಕ/ಮೊಲಾಸಿಸ್ ಆಧರಿಸಿದ ಕಾರಣದಿಂದ ಈ ವ್ಯಾಖ್ಯಾನವು ಅಗತ್ಯವಾಯಿತು ಎಂಬುದು ಸ್ಪಷ್ಟವಾಗಿದೆ. ಇದು ಕಬ್ಬಿನ ಉಪ ಉತ್ಪನ್ನವಾದ್ದರಿಂದ 15 ಕಿ ಮೀ ವ್ಯಾಪ್ತಿಯ ನಿರ್ಬಂಧದೊಳಗೆ ಎಥೆನಾಲ್ ಅನ್ನು ಅನುಮತಿ ನೀಡಿದರೆ ಸಕ್ಕರೆ ಕಾರ್ಖಾನೆಗೂ ತೊಂದರೆ ಆಗಲಿದೆ ಎಂದು ನ್ಯಾಯಪೀಠ ಅಭಿಪ್ರಾಯಪಟ್ಟಿದೆ.
ಪ್ರಕರಣದ ಹಿನ್ನೆಲೆ ಏನು ?: 2022ರ ಜು. 25 ರಂದು ಕಬ್ಬು ಅಭಿವೃದ್ಧಿ ಆಯುಕ್ತರು ಮತ್ತು ಸಕ್ಕರೆ ನಿರ್ದೇಶಕರು ಆದೇಶ ಹೊರಡಿಸಿ ಎಥೆನಾಲ್ ಕಾರ್ಖಾನೆಯ ನಿರ್ಮಾಣ ಸ್ಥಗಿತಗೊಳಿಸಲು ಆಸ್ಕಿನ್ಸ್ ಕಂಪನಿಗೆ ನಿರ್ದೇಶನ ನೀಡಿದ್ದರು. ಜತೆಗೆ ಕಬ್ಬಿನ ರಸವನ್ನು ಬಳಸಿ ಎಥೆನಾಲ್ ಉತ್ಪಾದನೆ ಪ್ರಾರಂಭಿಸದಂತೆ ಮತ್ತು ಬ್ರಹ್ಮಾನಂದಸಾಗರ್ ಕಾರ್ಖಾನೆ, ಆಸ್ಕಿನ್ಸ್‌ಗೆ ಕಬ್ಬಿನ ರಸವನ್ನು ಸರಬರಾಜು ಮಾಡದಂತೆ ಸೂಚಿಸಿದ್ದರು. ಅದನ್ನು ಪ್ರಶ್ನಿಸಿ ಎರಡು ಕೈಗಾರಿಕೆಗಳು ಹೈಕೋರ್ಟ್ ಮೊರೆ ಹೋಗಿದ್ದವು.
ಸಕ್ಕರೆ ಕಾರ್ಖಾನೆ ಸ್ಥಾಪನೆಗೆ ನಿರ್ಬಂಧ ಅನ್ವಯಿಸುತ್ತದೆ: ಕಬ್ಬನ್ನು ಅರೆಯದೆ ನೇರವಾಗಿ ಕಬ್ಬಿನ ರಸವನ್ನು ಪಡೆಯುವ ಮೂಲಕ ಎಥೆನಾಲ್ ತಯಾರಿಸಲು ಉದ್ದೇಶಿಸಿರುವ ಕಾರ್ಖಾನೆ ಮತ್ತು ಕಾರ್ಖಾನೆಯಲ್ಲಿ ಸಕ್ಕರೆ ಮತ್ತು ಎಥೆನಾಲ್ ಎರಡನ್ನೂ ಉತ್ಪಾದಿಸಿದರೆ ಮಾತ್ರ 15 ಕಿ ಮೀ ವ್ಯಾಪ್ತಿಯೊಳಗೆ ಸಕ್ಕರೆ ಕಾರ್ಖಾನೆ ಸ್ಥಾಪನೆಗೆ ನಿರ್ಬಂಧ ಅನ್ವಯಿಸುತ್ತದೆ ಎಂದು ಅರ್ಜಿದಾರರ ಕಂಪನಿಗಳು ಹೈಕೋರ್ಟ್ನಲ್ಲಿ ವಾದ ಮಂಡಿಸಿದ್ದವು.
ಓದಿ: ಬಾಲಬ್ರೂಯಿ ಗೆಸ್ಟ್ ಹೌಸ್‌ನಲ್ಲಿ ಕಾನ್ಸ್ಸ್ಟಿಟ್ಯೂಷನ್ ಕ್ಲಬ್ ಸ್ಥಾಪನೆಗೆ ಹೈಕೋರ್ಟ್ ಅನುಮತಿ
