ಬೆಂಗಳೂರು: ಸಾಂಕ್ರಾಮಿಕ ಕೋವಿಡ್ ಅಟ್ಟಹಾಸಕ್ಕೆ ಇಡೀ ಜಗತ್ತೇ ನಲುಗಿದೆ. ಈ ಮಧ್ಯೆ ನಾನಾ ರೀತಿಯ ಫಂಗಸ್ ರೂಪಾಂತರಿಗಳು ಪತ್ತೆಯಾಗುತ್ತಿದ್ದು, ಜನರನ್ನು ಮತ್ತಷ್ಟು ನಿದ್ದೆಗೆಡೆಸಿದೆ. ಬ್ಲ್ಯಾಕ್, ವೈಟ್ ಹಾಗೂ ಯೆಲ್ಲೋ ಫಂಗಸ್ ಬಗ್ಗೆ ಕೇಳುತ್ತಿದ್ದವರಿಗೆ ಇದೀಗ ಗ್ರೀನ್ ಫಂಗಸ್ ನಿದ್ದೆಗೆಡಿಸಿದೆ.
ಮೈಸೂರು ಮೂಲದ ಕಾರ್ತಿಕೇಯನ್ ಎಂಬ ವೈದ್ಯರೊಬ್ಬರಿಗೆ ಏಪ್ರಿಲ್ನಲ್ಲಿ ಕೊರೊನಾ ಸೋಂಕು ಕಾಣಿಸಿಕೊಂಡಿತ್ತು. ಆಕ್ಸಿಜನ್ ಪ್ರಮಾಣ 80ರಷ್ಟು ಕುಸಿತ ಕಂಡಿದ್ದ ಕಾರಣ 12 ದಿನಗಳ ಕಾಲ ಐಸಿಯುನಲ್ಲಿದ್ದು ಚೇತರಿಸಿಕೊಂಡಿದ್ದರು. ಆದರೆ ಕೆಲ ದಿನಗಳ ಬಳಿಕ ಅವರಿಗೆ ಮುಖದ ಭಾಗ ಮರಗಟ್ಟಿದ ಹಾಗೇ ಆಗಿತ್ತು. ಅನುಮಾನಗೊಂಡು ಪರೀಕ್ಷಿಸಿದಾಗ ಫಂಗಸ್ ಪತ್ತೆಯಾಗಿದ್ದು, ಬ್ಲ್ಯಾಕ್ ಫಂಗಸ್ ಜತೆಗೆ ಗ್ರೀನ್ ಫಂಗಸ್ ಇರುವುದು ತಿಳಿದು ಬಂದಿದೆ. ಬಳಿಕ ಇವರಿಗೆ ಬೆಂಗಳೂರಿನ ಬಿಜಿಎಸ್ ಆಸ್ಪತ್ರೆಯಲ್ಲಿ ಚಿಕಿತ್ಸೆ ನೀಡಲಾಗಿದ್ದು, ಇದೀಗ ಗುಣಮುಖರಾಗಿದ್ದಾರೆ.
ಏನಿದು ಗ್ರೀನ್ ಫಂಗಸ್?:
ಬ್ಲ್ಯಾಕ್ ಫಂಗಸ್ಗೂ ಇದಕ್ಕೂ ವ್ಯತ್ಯಾಸವೇನು? ಯಾವ ಕಾರಣಕ್ಕೆ ಬರುತ್ತದೆ? ಇದರ ಲಕ್ಷಣಗಳೇನು? ಜನಸಾಮಾನ್ಯರು ಯಾವ ರೀತಿ ಮುಂಜಾಗ್ರತೆ ವಹಿಸಬೇಕು? ಚಿಕಿತ್ಸೆ ಏನು? ಎಂಬ ಮಾಹಿತಿಯನ್ನು ವೈದ್ಯರು ನೀಡಿದ್ದಾರೆ. ಗ್ರೀನ್ ಫಂಗಸ್ ಸೋಂಕಿತ ವ್ಯಕ್ತಿಗೆ ಚಿಕಿತ್ಸೆ ನೀಡಿರುವ ಬಿಜಿಎಸ್ ಗ್ಲೋಬಲ್ ಆಸ್ಪತ್ರೆಯ ಇಎನ್ಟಿ ಹಾಗೂ ಎಂಡೋಸ್ಕೋಪಿ ಸರ್ಜನ್ ಡಾ.ಪ್ರಶಾಂತ್. ಆರ್ ರೆಡ್ಡಿ ಈ ಕುರಿತು ವಿವರಿಸಿದ್ದಾರೆ.
ಕೊರೊನಾ ಸೋಂಕಿನಿಂದ ಚೇತರಿಸಿಕೊಂಡಿದ್ದ ವ್ಯಕ್ತಿಗೆ ಮುಖದ ಭಾಗದಲ್ಲಿ ಜೋಮು ಹಿಡಿದುಕೊಂಡಂತೆ ಆಗುತ್ತಿತ್ತು. ಅವರಿಗೆ ಬೇರೆ ಯಾವುದೇ ಲಕ್ಷಣಗಳು ಇರಲಿಲ್ಲ. ಹೀಗಾಗಿ, ಸಿಟಿ ಸ್ಕ್ಯಾನ್ ಹಾಗೂ ಎಂಡೋಸ್ಕೋಪಿ ಶಿಫಾರಸು ಮಾಡಲಾಗಿತ್ತು. ಈ ವೇಳೆ ಮುಖದ ಒಂದು ಭಾಗದಲ್ಲಿ ಇನ್ಫೆಕ್ಷನ್ ಆಗಿರುವುದು ಕಂಡು ಬಂದಿತ್ತು. ಆದರೆ ಇದು ಸಾಮಾನ್ಯವಾಗಿರದೆ ಫಂಗಸ್ ರೀತಿಯಲ್ಲಿ ಇದದ್ದು ಕಂಡು ಬಂದಿದೆ. ಕೂಡಲೇ ಸರ್ಜರಿ ಮಾಡಲಾಯಿತು.
ಪ್ರಾಣಕ್ಕೆ ಕುತ್ತು:
ಈ ಫಂಗಸ್ನ್ನು ಹಾಗೇ ಬಿಟ್ಟರೆ ಕಣ್ಣಿಗೆ ಹರಡಿ ನಂತರ ಮೆದುಳಿಗೆ ಹೋಗುವ ಸಾಧ್ಯತೆ ಹೆಚ್ಚಿರುತ್ತದೆ. ಈ ರೀತಿ ಆದಾಗ, ಕಣ್ಣು ಗುಡ್ಡೆ ತೆಗೆಯಬೇಕಾದ ಪರಿಸ್ಥಿತಿ ಉಂಟಾಗುತ್ತದೆ. ಒಂದು ವೇಳೆ ಮೆದುಳಿಗೆ ಹೋದರೆ ಬ್ರೈನ್ ಸ್ಟ್ರೋಕ್ ಆಗಿ, ಪ್ರಾಣಕ್ಕೆ ಕುತ್ತು ಬರಬಹುದು.
ಅಂಗದಲ್ಲಿ ಸೇರಿರುವ ಫಂಗಸ್ ತೆಗೆಯದೆ ಹಾಗೆ ಔಷಧಿ ಕೊಟ್ಟರೆ ಅದು ಅಡ್ಡ ಪರಿಣಾಮಗಳಿಗೆ ದಾರಿ ಮಾಡಿಕೊಟ್ಟಂತೆ ಆಗುತ್ತದೆ. ಹೀಗಾಗಿ ಆ ಫಂಗಸ್ ಟಿಶ್ಯು ತೆಗೆದು ಅದನ್ನ ಪರೀಕ್ಷೆಗೆ ಕಳಿಸಿದಾಗಲೇ ನಮಗೆ ಯಾವ ರೀತಿ ಫಂಗಸ್ ಎಂದು ತಿಳಿಯಲು ಸಹಕಾರಿ ಆಗುತ್ತದೆ. ಹಾಗೇ ಈ ವ್ಯಕ್ತಿಯ ಫಂಗಸ್ ಟಿಶ್ಯುವನ್ನ ಟೆಸ್ಟ್ಗೆ ಕಳುಹಿಸಿದಾಗ ಎರಡು ರೀತಿಯ ಫಂಗಸ್ ಇರುವುದು ತಿಳಿದು ಬಂತು. ಅದರಲ್ಲಿ ಬ್ಲ್ಯಾಕ್ ಫಂಗಸ್ (ಮ್ಯುಕೋರ್ಮೈಕೋಸಿಸ್ ಫಂಗಸ್) ಹಾಗೂ ಗ್ರೀನ್ ಫಂಗಸ್ (ಆಸ್ಪರ್ಜಿಲೊಸಿಸ್ ಫಂಗಸ್) ಇದ್ದದ್ದು ಕಂಡು ಬಂದಿತ್ತು.
ರೋಗ ಲಕ್ಷಣಗಳು:
ಈ ಎರಡಕ್ಕೂ ಬೇರೆ ಬೇರೆ ಜಾತಿ ಅನ್ನೋದು ಬಿಟ್ಟರೆ, ಇದರ ರೋಗ ಲಕ್ಷಣಗಳು ಎಲ್ಲ ಒಂದೇ ರೀತಿಯಲ್ಲಿರಲಿದೆ. ಯಾವುದೇ ಫಂಗಲ್ ಇನ್ಫೆಕ್ಷನ್ ಆದರೂ ಅದರ ಕಾರ್ಯ, ತೀವ್ರತೆ ಒಂದೇ ರೀತಿಯಲ್ಲಿ ಇರುತ್ತದೆ. ಹೀಗಾಗಿ, ಕಣ್ಣಿನ ಕೆಳಗೆ ಹಾಗೂ ಮೇಲೆ ನೋವು ಬರುವುದು, ಕೆಂಪು ಊತ ಆಗುವುದು, ಮೂಗು ಕಟ್ಟುವುದು, ಕಣ್ಣಿನ ರೆಪ್ಪೆ ನೋವು ಆಗುವುದು ಸೇರಿದಂತೆ ಮುಖದ ಭಾಗದಲ್ಲಿ ಯಾವುದೇ ರೀತಿ ಅಸಹಜವಾದ ಕ್ರಿಯೆ ಶುರುವಾದರೆ ಒಮ್ಮೆ ಪರೀಕ್ಷಿಸಿಕೊಳ್ಳುವುದು ಉತ್ತಮ ಎಂದು ಅವರು ಮಾಹಿತಿ ನೀಡಿದರು.
