ಬೆಂಗಳೂರು: ಕುಡಿದ ಮತ್ತಿನಲ್ಲಿ ಯುವಕನೊರ್ವ ವಸತಿ ಪ್ರದೇಶದಲ್ಲಿ ನಿಲ್ಲಿಸಿದ್ದ ಕಾರು ಹಾಗೂ ಬೈಕ್ಗಳಿಗೆ ಗುದ್ದಿ ಅವಾಂತರ ಸೃಷ್ಟಿಸಿದ್ದಾನೆ. ಇದನ್ನು ಪ್ರಶ್ನಿಸಿದ ಜನರ ಮೇಲೆ ಕೂಗಾಡಿ ರಂಪಾಟ ಮಾಡಿದ ಘಟನೆ ಸದಾಶಿವನಗರದ ಬಿಇಎಲ್ ರೋಡ್ನಲ್ಲಿ ನಡೆದಿದೆ.
ನಿನ್ನೆ ತಡರಾತ್ರಿ ಶಿರೀಷ್ ಎಂಬಾತನಿಂತ ಈ ಕೃತ್ಯ ನಡೆದಿದೆ. ಹುಡುಗಿಯ ಜೊತೆ ಬಂದಿದ್ದ ಶಿರೀಶ್ ವಸತಿ ಪ್ರದೇಶದಲ್ಲಿ ನಿಲ್ಲಿಸಿದ್ದ ಐದು ಬೈಕ್ ಮತ್ತು ಆರು ಕಾರುಗಳನ್ನು ಜಖಂಗೊಳಿಸಿದ್ದಾನೆ.
ಘಟನೆ ವಿವರ
ಪಬ್ನಲ್ಲಿ ಪಾರ್ಟಿ ಮುಗಿಸಿ ಬಿಇಎಲ್ ಸರ್ಕಲ್ ಬಳಿ ಶಿರೀಶ್ ಕಾರ್ ನಿಲ್ಲಿಸಿದ್ದ. ಸ್ವಲ್ಪ ಹೊತ್ತು ಜೊತೆಗಿದ್ದ ಹುಡುಗಿ ಜೊತೆ ಮಾತನಾಡಿ ನಂತರ ಅಲ್ಲಿಗೆ ವಾಕಿಂಗ್ಗೆ ಬಂದಿದ್ದ ಅಣ್ಣ-ತಂಗಿಯ ಜೊತೆ ಕುಡಿದ ಮತ್ತಿನಲ್ಲಿ ಅಸಭ್ಯವಾಗಿ ವರ್ತಿಸಿದ್ದಾನೆ ಎನ್ನಲಾಗ್ತಿದೆ. ಪ್ರಶ್ನಿಸಲು ಹೋದಾಗ ಅವರ ಮೇಲೆ ಕೂಗಾಡಿ ನಂತರ ಸಿಟ್ಟಿನಲ್ಲಿ ಅಲ್ಲಿದ್ದ ಹತ್ತಾರು ವಾಹನಗಳಿಗೆ ಡಿಕ್ಕಿ ಹೊಡೆದಿದ್ದಾನೆ ಎಂದು ತಿಳಿದುಬಂದಿದೆ.
ಘಟನೆ ನೋಡುತ್ತಿದ್ದ ಸ್ಥಳೀಯರು ಶಿರೀಶ್ ಗಾಡಿಯನ್ನ ತಡೆದು ಪ್ರಶ್ನಿಸಿದ್ದಾರೆ. ಕುಡಿದ ಮತ್ತಿನಲ್ಲಿ ಕೂಗಾಡಿದ ಶಿರೀಶ್ಗೆ ಸ್ಥಳೀಯರು ಹಿಗ್ಗಾಮುಗ್ಗಾ ಥಳಿಸಿ ಪೊಲೀಸರಿಗೆ ಒಪ್ಪಿಸಿದ್ದಾರೆ. ಆರ್.ಟಿ.ನಗರ ಸಂಚಾರಿ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.
ಗಾಂಜಾ ವ್ಯಸನ : ಘಟನೆ ನಡೆದ ಸ್ಥಳ ಡೆಡ್ ಎಂಡ್ ಆಗಿರುವ ಕಾರಣ ಗಾಂಜಾ ಸೇದಲು ಅಲ್ಲಿಗೆ ಸಾಕಷ್ಟು ಹುಡುಗರು ಬುರತ್ತಾರೆ ಎಂದು ಹೇಳಲಾಗ್ತಿದೆ. ಅಲ್ಲದೆ, ಈ ವಿಚಾರವನ್ನು ಪೊಲೀಸರಿಗೆ ತಿಳಿಸಿದರೂ ಸಮಸ್ಯೆಗೆ ಪರಿಹಾರ ಸಿಕ್ಕಿಲ್ಲ ಎಂದು ಸ್ಥಳೀಯರು ದೂರಿದ್ದಾರೆ.
