ಒಕ್ಕಲಿಗರ ಮೀಸಲಾತಿ ಬೇಡಿಕೆ ಬಗ್ಗೆ ಸಿಎಂ ಜೊತೆ ಚರ್ಚೆ: ಸಚಿವ ಆರ್ ಅಶೋಕ್

ನಾನು ಸರ್ಕಾರದ ಪರವಾಗಿಯೂ ಬಂದಿದ್ದೇನೆ, ಸಮುದಾಯದ ಪರವಾಗಿಯೂ ಬಂದಿದ್ದೇನೆ. ಸಮುದಾಯದ ಮುಖಂಡರಾಗಿ ಸರ್ಕಾರದಲ್ಲಿ ನಾವೆಲ್ಲ ಇದ್ದೇವೆ. ಸಮುದಾಯದ ಪರವಾಗಿ ನಿಲ್ಲುವ ಪ್ರಾಮಾಣಿಕ ಪ್ರಯತ್ನ ಮಾಡ್ತೇನೆ ಎಂದು ಸಚಿವ ಆರ್​ ಅಶೋಕ್ ತಿಳಿಸಿದರು.

ಬೆಂಗಳೂರು: ಒಕ್ಕಲಿಗರ ಸಂಘದಲ್ಲಿ ನಡೆದ ಮೀಸಲಾತಿ ಹೆಚ್ಚಳ ಸಂಬಂಧದ ಪೂರ್ವಭಾವಿ ಸಭೆಯಲ್ಲಿ ಒಕ್ಕಲಿಗರ ಮೀಸಲಾತಿ ಹೆಚ್ಚಳದ ನಿರ್ಣಯದ ಮನವಿ ಪತ್ರ ಸ್ವೀಕರಿಸಿ ಮಾತನಾಡಿದ ಸಚಿವ ಆರ್​. ಅಶೋಕ್​, ಯಾವೆಲ್ಲ ಬೇಡಿಕೆ ಇದೆಯೋ ಅದರ ಬಗ್ಗೆ ಚರ್ಚೆ ಮಾಡುತ್ತೇನೆ. ನಾನು ಸರ್ಕಾರದ ಪರವಾಗಿ ಬಂದು ಬೇಡಿಕೆ ಸ್ವೀಕರಿಸಿದ್ದೇನೆ ಎಂದರು.

ಒಕ್ಕಲಿಗ ಸಮುದಾಯಕ್ಕೆ 4% ಮೀಸಲಾತಿ ಇದೆ. ಇದರಲ್ಲೂ ತಾರತಮ್ಯ, ಅನ್ಯಾಯ ಆಗಿದೆ. ಜನಸಂಖ್ಯೆಗೆ ಅನುಸಾರ ಮೀಸಲಾತಿ ಸಿಗುತ್ತಿಲ್ಲ ಎಂದು ಸಮುದಾಯ ಬೇಡಿಕೆ ಇಟ್ಟಿದೆ. ಸಮುದಾಯದ ಆಗ್ರಹವನ್ನು ಸರ್ಕಾರದ ಗಮನಕ್ಕೆ ತರುತ್ತೇನೆ. ಒಕ್ಕಲಿಗ ಸಮುದಾಯದ ಜನಸಂಖ್ಯೆ ಎಷ್ಟಿದೆ ಎಂದು ಜಾತಿ ಸಮೀಕ್ಷೆಯಿಂದ ತಿಳಿಯಬೇಕಿದೆ. ನಾನು ಸರ್ಕಾರದ ಪರವಾಗಿಯೂ ಬಂದಿದ್ದೇನೆ, ಸಮುದಾಯದ ಪರವಾಗಿಯೂ ಬಂದಿದ್ದೇನೆ. ಸಮುದಾಯದ ಮುಖಂಡರಾಗಿ ಸರ್ಕಾರದಲ್ಲಿ ನಾವೆಲ್ಲ ಇದ್ದೇವೆ, ಕಾಂಗ್ರೆಸ್​ನಲ್ಲಿ ಡಿಕೆಶಿ‌ ಮತ್ತಿತರರು ಇದ್ದಾರೆ. ಸಮುದಾಯದ ಕಾರ್ಯಕ್ರಮದಲ್ಲಿ ಎಲ್ಲರೂ ಪಕ್ಷಾತೀತವಾಗಿ ಬರಬೇಕು. ಎಲ್ಲಾ ಜಾತಿಗಳ‌ ಜನ ಭಾರತದ ಸಂವಿಧಾನದ ಅಡಿ ಬದುಕುತ್ತಿದ್ದಾರೆ. ನಮ್ಮ ಸರ್ಕಾರ ಇರುವಾಗಲೇ ನಮ್ಮ ಸಮುದಾಯ ಎದ್ದು ನಿಂತಿದೆ. ಇದು ನಮಗೆ ಸಂತಸ ತಂದಿದೆ ಎಂದರು.

ಕೇಂದ್ರದ ಮೇಲೆ ಒತ್ತಡ ಹೇರುತ್ತೇವೆ: ಇದೇ ವೇಳೆ ಕಾರ್ಯಕ್ರಮದಲ್ಲಿ ಮಾತನಾಡಿದ ಮಾಜಿ ಸಿಎಂ, ಸಂಸದ ಡಿ ವಿ ಸದಾನಂದ ಗೌಡ, ನಾನು ಜವಾಬ್ದಾರಿಯುತ ಆಡಳಿತ ಪಕ್ಷದಲ್ಲಿದ್ದೇನೆ. ಮೀಸಲಾತಿ ಬಗ್ಗೆ ನಾನು ಎಲ್ಲಿ ಪ್ರಸ್ತಾಪ ಮಾಡಬೇಕೋ ಅಲ್ಲಿ ಪ್ರಸ್ತಾಪ ಮಾಡುತ್ತೇನೆ. ನಮ್ಮ ಸಮಾಜದ ಕೆಲಸಗಳನ್ನು ಮಾಡುವಲ್ಲಿ ನಾವು ಸ್ವಲ್ಪ ಹಿಂದೆ ಉಳಿದಿದ್ದು. ಮಾಜಿ ಪ್ರಧಾನಿಗಳ ನೇತೃತ್ವದಲ್ಲಿ ಎಲ್ಲರೂ ಸೇರಿ ಕೇಂದ್ರದ ಮೇಲೆ ಮೀಸಲಾತಿಗೆ ಒತ್ತಡ ಹಾಕ್ತೇವೆ. ಇದೇ 9ರಿಂದ ಸಂಸತ್ ಅಧಿವೇಶನದಲ್ಲಿ ಮೀಸಲಾತಿಗೆ ನೀಡುವಂತೆ ಒತ್ತಾಯಿಸುತ್ತೇವೆ ಎಂದರು.

ಮೀಸಲಾತಿ ಸಿಗದೇ ಅನ್ಯಾಯ: 10% ಮೀಸಲಾತಿ ನಮ್ಮ ಸಮುದಾಯಕ್ಕೆ ಸಿಕ್ಕಿಲ್ಲ. 10% ಮೀಸಲಾತಿ ನಮಗೆ ಸಿಗದೇ ಅನ್ಯಾಯ ಆಗಿದೆ. ನಮ್ಮ ಸಮುದಾಯಕ್ಕೆ 10% ಮೀಸಲಾತಿ ಸಿಗದೇ ವಂಚನೆ ಆಗಿದೆ ಎಂದರು.

ಇತ್ತೀಚೆಗೆ ಸರ್ಕಾರ ಎಸ್ಸಿ, ಎಸ್ಟಿ ಮೀಸಲಾತಿ ಸಂಬಂಧ ತೀರ್ಮಾನ‌ ಕೈಗೊಂಡಿದೆ. ಅದೇ ರೀತಿ ಒಕ್ಕಲಿಗ ಸಮುದಾಯಕ್ಕೆ ಜನಸಂಖ್ಯೆ ಅನುಗುಣವಾಗಿ ಕನಿಷ್ಠ ಶೇ12 ಮೀಸಲಾತಿ ಹೆಚ್ಚಳ ಮಾಡಬೇಕು. ನ್ಯಾಯಯುತ ಬೇಡಿಕೆಯನ್ನು ರಾಜ್ಯ ಮತ್ತು ಕೇಂದ್ರ ಸರ್ಕಾರಕ್ಕೆ ಕೇಳಿಕೊಳ್ತೇನೆ. ಇದು ಭಿಕ್ಷೆ ಅಲ್ಲ.. ಇದು ನಮ್ಮ ನ್ಯಾಯಯುತ ಹಕ್ಕು. ಇದಕ್ಕಾಗಿ ನಾವು ರಸ್ತೆಗಿಳಿಯಲೂ ಸಿದ್ಧರಿದ್ದೇವೆ.

ಶೇ.12ರಷ್ಟು ಮೀಸಲಾತಿ ಬೇಕು: ಇಂದು ಶೇ.10 ರಷ್ಟು ಆರ್ಥಿಕವಾಗಿ ಹಿಂದುಳಿದವರಿಗೆ, ಎಸ್ಸಿ ಎಸ್ಟಿ 6% ಮೀಸಲಾತಿ ಕೊಟ್ಟ ಬಳಿಕ ಉಳಿಯುವುದು 34% ರಷ್ಟು ಮಾತ್ರ. ನಾವು ಶೇ.16 ರಷ್ಟು ಜನಸಂಖ್ಯೆ ಹೊಂದಿದ್ದೇವೆ. ನಮಗೆ 12% ರಷ್ಟಾದರು ಮೀಸಲಾತಿಯನ್ನು ಕೊಡಬೇಕು. ನಮ್ಮ ಸಮುದಾಯದ ಒಟ್ಟು ಜನಸಂಖ್ಯೆಯ ಬಗ್ಗೆ ಗಣತಿ ಮಾಡಬೇಕು. ಕಾಂತರಾಜ ವರದಿಯಲ್ಲಿ ನಮ್ಮ ಜನಸಂಖ್ಯೆಯ ಬಗ್ಗೆ ತಿರುಚಲಾಗಿದೆ ಎಂದು ಆಕ್ಷೇಪ ವ್ಯಕ್ತಪಡಿಸಿದರು.

ಇದನ್ನೂ ಓದಿ: ಒಕ್ಕಲಿಗರ ಪ್ರಮುಖರ ಸಭೆ.. ಮೀಸಲಾತಿ ಹೆಚ್ಚಳ ಬೇಡಿಕೆ ಈಡೇರಿಕೆಗೆ ಜ. 23ರ ಗಡುವು