ಬೆಂಗಳೂರು: ದೇಶದ ಹಲವೆಡೆ ಹಕ್ಕಿಜ್ವರ ಭೀತಿಯಿದ್ದು ರಾಜ್ಯದಲ್ಲೂ ಹೈ ಅಲರ್ಟ್ ಘೋಷಿಸಲಾಗಿದೆ. ಈ ನಿಟ್ಟಿನಲ್ಲಿ ಈಗಾಗಲೇ ಪಶುಸಂಗೋಪನಾ ಇಲಾಖೆಯ ಅಧಿಕಾರಿಗಳು ಸಭೆಗಳನ್ನು ನಡೆಸಿ ಪರಿಸ್ಥಿತಿ ಎದುರಿಸಲು ಸಿದ್ಧರಾಗಿದ್ದಾರೆ.
ಈ ಮಧ್ಯೆ ಶಿವಮೊಗ್ಗದಲ್ಲಿ 6 ಹಕ್ಕಿಗಳು ಹಾಗೂ ದಕ್ಷಿಣ ಕನ್ನಡದಲ್ಲಿ 6 ಕಾಗೆಗಳು ಸತ್ತುಬಿದ್ದಿವೆ. ಇದು ಹೆಚ್ಚು ಮಳೆಯಾದ ಕಾರಣಕ್ಕಾಗಿ ಸತ್ತಿವೆಯೇ ಅಥವಾ ಹಕ್ಕಿಜ್ವರದ ಸೋಂಕಿನಿಂದಲೇ ಸತ್ತಿದೆಯೇ ಎಂದು ಪರೀಕ್ಷಿಸಲಾಗುತ್ತಿದೆ.
ಮೇಲ್ನೋಟಕ್ಕೆ ಹಕ್ಕಿಜ್ವರದ ಲಕ್ಷಣ ಇಲ್ಲದಿದ್ದರೂ, ಪ್ರಯೋಗಾಲಯದಲ್ಲಿ ಪರೀಕ್ಷಿಸಲಾಗುತ್ತದೆ ಎಂದು ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ. ಪಶುಸಂಗೋಪನಾ ಇಲಾಖೆಯ ಉಪನಿರ್ದೇಶಕರಾದ ಡಾ. ಉಮಾಪತಿ ಮಾತನಾಡಿ, ವೈರಸ್ನಿಂದ ಬರುವ ಈ ಖಾಯಿಲೆ ಯಾವ ಹಕ್ಕಿಗೆ ಬೇಕಾದರೂ ಬರುವ ಸಾಧ್ಯತೆ ಇರುತ್ತದೆ. ಇದಕ್ಕೆ ಈಗಾಗಲೇ ರ್ಯಾಪಿಡ್ ರೆಸ್ಪಾನ್ಸ್ ಟೀಮ್ ಮಾಡಲಾಗಿದೆ. ಎಲ್ಲಾದರೂ ಸೋಂಕು ಕಂಡುಬಂದರೆ ಆ ಕೋಳಿ ಅಂಗಡಿ ಅಥವಾ ಕೋಳಿ ಫಾರ್ಮ್ಗೆ ಹೋಗಿ ಎಲ್ಲವನ್ನು ತೆರವು ಮಾಡಿ ಸ್ಯಾನಿಟೈಸ್ ಮಾಡಲಾಗುತ್ತದೆ ಎಂದಿದ್ದಾರೆ.
ಬೆಂಗಳೂರಿನಲ್ಲಿ ಈವರೆಗೆ ಯಾವುದೇ ಪ್ರಕರಣ ಕಂಡುಬಂದಿಲ್ಲ. ಜನ ಭಯಬೀಳುವ ಅಗತ್ಯವಿಲ್ಲ. ಆದರೆ ಕೋಳಿ ಉದ್ಯಮದ ಮೇಲೆ ಸ್ವಲ್ಪ ಪರಿಣಾಮ ಬಿದ್ದಿದೆ. ಒಂದು ವೇಳೆ ಕೋಳಿಗಳ ಅಸಹಜ ಸಾವು ಕಂಡುಬಂದರೂ ಲ್ಯಾಬ್ಗೆ ತೆಗೆದುಕೊಂಡು ಹೋಗಿ ಪರೀಕ್ಷಿಸಲಾಗುತ್ತದೆ. ಅದೇನಾದರೂ ಪಾಸಿಟಿವ್ ಕಂಡುಬಂದರೆ ಫಾರ್ಮನ್ನೇ ಮುಚ್ಚಲಾಗುತ್ತದೆ ಎಂದಿದ್ದಾರೆ.
ಇಂದು ಆಯುಕ್ತರ ನೇತೃತ್ವದಲ್ಲಿ ಸಭೆ ನಡೆದಿದ್ದು, ಯಾವ ರೀತಿ ಸಜ್ಜಾಗಿರಬೇಕು ಎಂಬ ಸೂಚನೆ ನೀಡಿದ್ದಾರೆ. ಎಲ್ಲಾ ಜಿಲ್ಲೆಗಳಿಗೂ ಆರ್ಆರ್ಟಿ ಟೀಮ್ ಮಾಡಲಾಗಿದೆ. ಸತ್ತ ಹಕ್ಕಿಗಳ ಮುಚ್ಚಿ ಸುಣ್ಣ ಹಾಕಲು ಸುಣ್ಣದ ಕಲ್ಲು ಎಲ್ಲೆಲ್ಲಿ ಸಿಗುತ್ತದೆ ಎಂಬ ಸಿದ್ಧತೆ, ಹಳ್ಳ ತೋಡಲು ಜೆಸಿಬಿ ಸಿದ್ಧತೆ ಮಾಡಲಾಗಿದೆ ಎಂದರು.
ಹಕ್ಕಿಜ್ವರದಿಂದ ಸಂಕಷ್ಟದಲ್ಲಿ ಕುಕ್ಕುಟೋದ್ಯಮ
ಕರ್ನಾಟಕ ಸಹಕಾರ ಕುಕ್ಕುಟ ಮಹಾಮಂಡಳಿ ಉಪಾಧ್ಯಕ್ಷ ರುದ್ರಮೂರ್ತಿ ಮಾತನಾಡಿ, ಕೇರಳದಿಂದ ಬರುವ ಕೋಳಿಗಳ ಆಮದು ರದ್ದಾಗಿದೆ. ತಮಿಳುನಾಡಿನ ಕೋಳಿಗಳು ಬ್ಯಾನ್ ಆಗುವ ಸಾಧ್ಯತೆ ಇದೆ. ರಾಜ್ಯದ ಕೋಳಿಗಳನ್ನು ಬಳಸಲು ಸಮಸ್ಯೆ ಇಲ್ಲ. ಇಲಾಖೆಯಿಂದ ಮಾದರಿ ಸಹಿತ ನಮಗೆ ಮಾಹಿತಿ ಕೊಡುತ್ತಾರೆ. 24 ಗಂಟೆಯೊಳಗೆ ಈ ಮಾಹಿತಿ ನಮಗೆ ಬರಲಿದೆ. ಆ ಕೂಡಲೇ ಫಾರಂ ಬಂದ್ ಆಗಲಿದೆ.
ರಾಜ್ಯದಲ್ಲಿ ಈಗ ಶೇ.10ರಷ್ಟು ಪರಿಣಾಮ ಬಿದ್ದಿದೆ. ಮುಂದೆ ಹೆಚ್ಚಾದರೆ, ಕೋಳಿಯ ಬೆಲೆ ರೂ. 50ಕ್ಕೆ ಇಳಿಕೆಯಾಗಲಿದೆ. ಜನರು ಭಯದಿಂದ ಕೋಳಿ, ಮೊಟ್ಟೆ ಖರೀದಿ ನಿಲ್ಲಿಸುತ್ತಾರೆ. ಆದರೆ ಈವರೆಗೆ ಪ್ರಪಂಚದಲ್ಲಿ ಈ ವೈರಸ್ನಿಂದ ಸಾವು ಸಂಭವಿಸಿರುವುದು ಖಾತ್ರಿಯಾಗಿಲ್ಲ ಎಂದರು.
ಇದನ್ನೂ ಓದಿ: ಬೆಂಗಳೂರಿನಲ್ಲಿ ವ್ಯಕ್ತಿಯ ಮೇಲೆ ತಡರಾತ್ರಿ ಮಾರಣಾಂತಿಕ ಹಲ್ಲೆ..!
