ಬೆಂಗಳೂರು : ಕೋವಿಡ್ 3ನೇ ಅಲೆ ಆರಂಭವಾಗುವ ಆತಂಕದ ನಡುವೆಯೇ ನಗರದಲ್ಲಿ ಲಸಿಕೆ ಅಲಭ್ಯತೆ ತೀವ್ರವಾಗಿ ಕಾಡುತ್ತಿದೆ. ಆಸ್ಪತ್ರೆಗಳ ಮುಂದೆ ಜನ ಕ್ಯೂ ನಿಂತಿದ್ದರೂ, ಲಸಿಕೆ ಖಾಲಿಯಾಗಿದೆ ಎಂದು ವಾಪಸು ಕಳಿಸುತ್ತಿದ್ದಾರೆ. 40 ವರ್ಷ ಕೆಳಗಿನವರಿಗಂತೂ ಲಸಿಕೆಗಾಗಿ ಪರದಾಡಿದ್ರೂ ಸಿಗುತ್ತಿಲ್ಲ. ಈ ನಡುವೆ ನಿನ್ನೆ ರಾತ್ರಿ ಕೇವಲ 50 ಸಾವಿರ ಡೋಸ್ ಲಸಿಕೆ ಬಂದಿದೆ.
ಈ ಬಗ್ಗೆ ಮಾತನಾಡಿದ ಪಾಲಿಕೆ ಮುಖ್ಯ ಆಯುಕ್ತ ಗೌರವ್ ಗುಪ್ತ, ಲಸಿಕೆ ಲಭ್ಯತೆ ಕೇಂದ್ರ ಸರ್ಕಾರದಿಂದ ಬರುತ್ತದೆ. ಬಂದಿರುವಷ್ಟನ್ನು ಎಲ್ಲಾ ಕಡೆ ರಾಜ್ಯ ಸರ್ಕಾರ ವಿತರಿಸುತ್ತಿದೆ. ಕೋವಿಶೀಲ್ಡ್‌ ಕಳೆದ ಮೂರು ದಿನದಿಂದ ಕಡಿಮೆ ಆಗಿದೆ. ನಿನ್ನೆ ರಾತ್ರಿ ಬಂದಿದ್ದ ಐವತ್ತು ಸಾವಿರ ಡೋಸ್ ಲಸಿಕೆಯನ್ನು 250 ಡೋಸ್ನಂತೆ ಪ್ರತಿ ವಾರ್ಡ್ಗೆ ಹಂಚಿಕೆ ಮಾಡಲಾಗಿದೆ ಎಂದು ತಿಳಿಸಿದರು.
ಕೋವಿಡ್ ಪಾಸಿಟಿವಿಟಿ ಪ್ರಮಾಣ ಶೇ.2ಕ್ಕಿಂತ ಹೆಚ್ಚು ಬರುವ ಕಡೆ ಕೆಲವು ಕಟ್ಟುನಿಟ್ಟಿನ ಕ್ರಮಗಳ ಜಾರಿ ಬಗ್ಗೆಯೂ ಚಿಂತನೆ ನಡೆಸಲಾಗುತ್ತಿದೆ. 2%ಕ್ಕಿಂತ ಹೆಚ್ಚು ಪಾಸಿಟಿವಿಟಿ ಇರುವ ಕಡೆ ಹೊಸ ನಿಯಮ ಜಾರಿಯಾಗಲಿದೆ. ನಗರದ ಪರಿಸ್ಥಿತಿ ಮೇಲೆಯೂ ನಿಗಾ ಇಡಲಾಗಿದೆ. ಕಳೆದ 40 ದಿನಗಳಲ್ಲಿ ಶೇ.400ರಷ್ಟು ಪ್ರಕರಣ ಬರುತ್ತಿವೆ ಎಂದರು.
ಬಿಬಿಎಂಪಿ ಹೊರ ವ್ಯಾಪ್ತಿಯ, ಬೆಂಗಳೂರು ನಗರ ಜಿಲ್ಲಾಡಳಿತ ವ್ಯಾಪ್ತಿಯಲ್ಲಿ ಶೇ.92%ರಷ್ಟು ಮೊದಲ ಡೋಸ್ ವ್ಯಾಕ್ಸಿನ್ ನೀಡಲಾಗಿದೆ. ಶೇ.25ರಷ್ಟು ಮಂದಿ 2ನೇ ಡೋಸ್ ಪಡೆದಿದ್ದಾರೆ ಎಂದು ಮಾಹಿತಿ ನೀಡಿದರು.
ಕೋವಿಡ್ ಪ್ರಮಾಣ ಇಳಿಕೆಯಾಗುತ್ತಿದೆ : ಜಿಲ್ಲಾಧಿಕಾರಿ ಜೆ. ಮಂಜುನಾಥ್ ಮಾತನಾಡಿ, ಲಾಕ್ಡೌನ್ ತೆರವಾದ ಬಳಿಕ ಎಲ್ಲಾ ವಾಣಿಜ್ಯ ಚಟುವಟಿಕೆಗಳಿಗೆ ಅವಕಾಶ ಕೊಡಲಾಗಿದೆ. ಬೆಂಗಳೂರಲ್ಲಿ 350ಕ್ಕೆ ಕೋವಿಡ್ ಇಳಿಕೆಯಾಗಿದೆ. ಬಿಬಿಎಂಪಿ ಹೊರ ವ್ಯಾಪ್ತಿಯಲ್ಲೂ 25 ಪ್ರಕರಣ ಕಂಡು ಬರುತ್ತಿವೆ.
ಎಲ್ಲಾ ವ್ಯಾಪಾರ, ವಹಿವಾಟು ನಡೆಯುತ್ತಿದ್ದರೂ ಕೋವಿಡ್ ಹೆಚ್ಚಳ ಆಗಿಲ್ಲ. ಟೆಸ್ಟಿಂಗ್ ಕೂಡ ಮೊದಲ ಪ್ರಮಾಣದಲ್ಲಿಯೇ ನಡೆಯುತ್ತಿದೆ. ಅತ್ತಿಬೆಲೆ ಚೆಕ್ ಪೋಸ್ಟ್‌ನಲ್ಲಿ ಎಲ್ಲಾ ಹೊರ ರಾಜ್ಯದ ವಾಹನಗಳನ್ನು ಚೆಕ್ ಮಾಡಲಾಗುತ್ತಿದೆ ಎಂದರು.
ಅಲ್ಲದೆ, ಕೈಗಾರಿಕಾ ವಲಯಗಳಲ್ಲೂ ನಿರಂತರವಾಗಿ ತಪಾಸಣೆ ನಡೆಯುತ್ತಿದೆ. ಆನೇಕಲ್ನಲ್ಲಿ ಮಕ್ಕಳ ವಿಶೇಷ ಆಸ್ಪತ್ರೆ, ಯಲಹಂಕದಲ್ಲಿಯೂ ಐಸಿಯು ಬೆಡ್ ಸಹಿತ ಮಕ್ಕಳ ಆಸ್ಪತ್ರೆ ಸಜ್ಜು ಮಾಡಲಾಗಿದೆ ಎಂದು ವಿವರಿಸಿದರು.
